詩篇 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
102:1 Hoān-lān Tiong ê Kî-tó
( Khùn-khó͘ ê lâng ke̍k loán-jio̍k ê sî, tī Siōng-chú ê bīn-chêng thò͘-chhut khó͘-chêng ê kî-tó. )Siōng-chú ah, kiû Lí thiaⁿ góa ê kî-tó, hō͘ góa kiû-kiò ê siaⁿ thàu kàu Lí ê bīn-chêng!
102:2 Góa tī gûi-kip ê sî, kiû Lí m̄ thang am Lí ê bīn m̄-khòaⁿ góa; kiû Lí àⁿ hīⁿ-khang thiaⁿ góa! Góa kiû-kiò ê sî, kiû Lí sûi-sî ìn góa!
102:3 In-ūi góa ê ji̍t-chí chhin-chhiūⁿ hóe-ian siau-sòaⁿ, góa ê kut-thâu chhin-chhiūⁿ hóe-lô͘ ê chhâ teh sio.
102:4 Góa ê sim-sîn siū-siong, chhin-chhiūⁿ chháu ta-.khì, góa lóng bē kò͘-tit chia̍h.
102:5 In-ūi góa thó͘-khùi âu-kiò, góa siau-sán kah phôe pau kut.
102:6 Góa chhin-chhiūⁿ khòng-iá ê thê-ô͘-chiáu; mā chhin-chhiūⁿ pha-hng só͘-chāi ê àm-kong-chiáu.
102:7 Góa kui mê bô khùn; chhin-chhiūⁿ chhù téng ko͘-toaⁿ ê chhek-chiáu-á.
102:8 Góa ê tùi-te̍k kui ji̍t húi-pòng góa; thòng-hūn góa ê lâng kí góa lâi chiù-chó͘.
102:9 Góa ēng hóe-hu chún pn̄g chia̍h, só͘ lim ê lóng ū chham ba̍k-sái.
102:10 Che sī in-ūi Lí ê hoat sèng-tē tōa siū-khì; in-ūi Lí kā góa kí-khí, koh kā góa hiat lo̍h-.khì.
102:11 Góa ê ji̍t-chí chhin-chhiūⁿ ji̍t-iáⁿ í-keng chhiâ; góa mā chhin-chhiūⁿ chháu ta-.khì.
102:12 Chí-ū Lí — Siōng-chú éng-oán chûn-chāi; Lí hō͘ lâng kì-liām kàu bān-sè-tāi.
102:13 Lí beh khí-lâi liân-bín Si-óng, in-ūi hiān-chāi sī khó-liân i ê sî, tiāⁿ tio̍h ê ji̍t-chí í-keng kàu à.
102:14 Lí ê lô͘-po̍k ì-ài Si-óng ê chio̍h-thâu, liân i ê thô͘-soa hún to pó-sioh.
102:15 Lia̍t kok ē kèng-ùi Siōng-chú ê miâ; sè-chiūⁿ ê kun-ông lóng ē kèng-ùi Lí ê êng-kng.
102:16 In-ūi Siōng-chú khí-chō Si-óng, tī I ê êng-kng tiong hián-hiān.
102:17 I àⁿ-lo̍h thiaⁿ sànchhiah lâng ê kî-tó, bô khòaⁿ-khin in ê kî-kiû.
102:18 Che beh ūi tio̍h āu-tāi ê lâng kì-chài, hō͘ chiong-lâi chhut-sì ê lâng thang oló Siōng-chú.
102:19 Siōng-chú tùi I chì-koân ê sèng-só͘ khòaⁿ lo̍h-.lâi; I tùi thiⁿ-téng khòaⁿ lo̍h tē,
102:20 beh thiaⁿ siû-hoān ê thó͘-khùi, beh tháu-pàng siū phòaⁿ sí-hêng ê lâng;
102:21 hō͘ lâng tī Si-óng thoân-pò͘ Siōng-chú ê miâ, tī Ê-lú-sa-lèm soan-iông oló I ê ōe;
102:22 Chiū-sī bān-bîn kah lia̍t kok chū-chi̍p lâi ho̍k-sāi Siōng-chú ê sî.
102:23 I hō͘ góa ê khùi-la̍t tī pòaⁿ-lō͘ soe-lám, hō͘ góa ê ji̍t-chí kiám-chió.
102:24 Góa kóng: Góa ê Siōng-tè ah, m̄ thang tī góa tiong-liân ê sî thó góa ê sèⁿ-miā. Lí ê nî-hòe bān-sè-tāi bû kiông-chīn!
102:25 Lí khí-thâu hē tē ê tē-ki; thiⁿ mā sī Lí ê chhiú só͘ chhòng-chō ê.
102:26 Thiⁿ-tē ē siau-sit-.khì, chí ū Lí kú-tn̂g chûn-chāi. In ē chhin-chhiūⁿ saⁿ-khò͘ chiām-chiām kū khì; Lí ē kā in ōaⁿ sin, chhin-chhiūⁿ ōaⁿ sin saⁿ-khò͘, in chiū piàn-ōaⁿ.
102:27 Chí-ū Lí bē piàn-ōaⁿ; Lí ê hòe-siū bû kiông-chīn.
102:28 Lí ê lô͘-po̍k ê kiáⁿ-sun ē kú-tn̂g an-ún khiā-khí; in ê kiáⁿ-sun ē tī Lí ê bīn-chêng khiā chāi.
各聖經譯本著作權如版權說明。
本畫面由信望愛資訊中心之CBOL計畫產生,歡迎連結,無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人,來榮耀祂自己的名。