Io-a-si chē-ūi ê sî chhit hòe, tī Ê-lú-sa-lèm chò ông keng-kòe sì-cha̍p nî. I ê lāu-bú ê miâ kiò-chò Chi-bí-ah, sī Bel-sí-bah lâng. 24:2 Chè-si Io-ho-iá-tah tī-.leh ê ji̍t, Io-a-si kiâⁿ Siōng-chú só͘ khòaⁿ-chò hó ê tāichì. 24:3 Io-ho-iá-tah kā i chhōa nn̄g-ê bó͘, i seⁿ kiáⁿ-jî. 24:4 Āu-lâi, Io-a-si ū ì-sù beh siu-lí Siōng-chú ê tiān, 24:5 Chiū tiàu-chi̍p chè-si kah Lē-bī lâng, kā in kóng, " Lín tio̍h khì Iô-tah hiahê siâⁿ, tùi I-su-la-el jîn-bîn bō͘-khoán, thang ta̍k nî siu-lí lín ê Siōng-tè ê tiān; lín tio̍h kóaⁿ-kín pān-lí chit-ê tāichì. " Chóng-.sī, Lē-bī lâng bô teh kóaⁿ-kín. 24:6 Ông tiàu tōa-chè-si Io-ho-iá-tah lâi, kā i kóng, " Lí ná ē bô pek Lē-bī lâng tùi Iô-tah kah Ê-lú-sa-lèm bō͘-khoán lâi, to̍h-sī chiàu Siōng-tè ê lô͘-po̍k Mô͘-se kah I-su-la-el ê hōe-chiòng, só͘ tiāⁿ tio̍h tio̍h hiàn chò kiàn-chèng ê pò͘-pêⁿ ê lō͘-ēng ê? " 24:7 In-ūi hit-ê pháiⁿ chabó͘ lâng A-tha-lí-iah ê chèng kiáⁿ bat thiah-húi Siōng-chú ê tiān, koh ēng Siōng-chú tiān lāi hun-pia̍t chò sèng ê mi̍h hiàn hō͘ hiahê Ba-al. 24:8 Chiū ánne, ông chhut bēng-lēng, in chiū chò chi̍t-ê kūi, hē tī Siōng-chú tiān ê mn̂g gōa. 24:9 Koh tùi Iô-tah kah Ê-lú-sa-lèm ê jîn-bîn soan-pò͘, tio̍h chiàu Siōng-tè ê lô͘-po̍k Mô͘-se tī khòng-iá bēng-lēng I-su-la-el lâng só͘ tiāⁿ tio̍h tio̍h hiàn ê gîn, tòa-lâi hō͘ Siōng-chú. 24:10 Chèng siú-léng kah chèng lâng lóng hoaⁿ-hí tòa-lâi hiat tī kūi-.ni̍h, ti̍t-kàu oân-boán. 24:11 Lē-bī lâng tòa hit-ê kūi ji̍p-khì ông ê pān-kong-sek, in khòaⁿ tio̍h gîn chin chē, ông ê su-kì kah tōa-chè-si ê úi-goân chiū lâi, piàⁿ khang hit-ê kūi, āu-lâi ēng kūi koh hē tī goân ūi. Ji̍t-ji̍t ánne chò, khioh gîn chin chē. 24:12 Ông kah Io-ho-iá-tah kā gîn hō͘ chò Siōng-chú tiān lāi pān-sū ê lâng, in chiū chhiàⁿ chio̍h-chhiūⁿ, ba̍k-chhiūⁿ lâi siu-chéng Siōng-chú ê tiān, koh chhiàⁿ thih-kang, tâng-chhiūⁿ, lâi siu-lí Siōng-chú ê tiān. 24:13 Chò kang ê lâng chò in ê kang, hit-ê kang chiū oân-sêng, siu-lí Siōng-chú ê tiān chiàu kū ê khoán, koh hō͘ i chin kian-kò͘. 24:14 Oân kang liáu-āu, in chiū tòa só͘ chhun lo̍h-.lâi ê gîn, lâi-kàu ông kah Io-ho-iá-tah ê bīn-chêng, ēng hiahê gîn lâi chō khì-kū, chò Siōng-chú tiān ê lō͘-ēng, to̍h-sī ho̍k-sāi ê khì-kū, lâi hiàn sio-chè, koh chō sî kah kim-gîn ê khì-kū.
Io-ho-iá-tah ê Chèng-chhek Pī Hùi-tû
Tng Io-ho-iá-tah oa̍h-.leh ê ji̍t, lâng tiāⁿtiāⁿ hiàn sio-chè tī Siōng-chú ê tiān. 24:15 Io-ho-iá-tah chiām-chiām lāu, ji̍t-chí boán-chiok chiū sí. Sí ê sî chi̍t-pah saⁿ-cha̍p hòe, 24:16 lâng kā i chòng tī Ta-bi̍t siâⁿ kah lia̍t ông ê tiong-kan, in-ūi i tī I-su-la-el tiong-kan ū ǹg Siōng-chú kah I ê tiān kiâⁿ hó sū. 24:17 Io-ho-iá-tah sí-liáu, Iô-tah chèng siú-léng lâi tiâu-pài ông, ông chun-thàn in. 24:18 In pàng-sak Siōng-chú — in chó͘-sian ê Siōng-tè ê tiān, khì ho̍k-sāi hiahê A-si-lah kah ngó͘-siōng; in-ūi in chit-ê chōe, chiū ū Siōng-chú ê siū-khì lîm-kàu Iô-tah kah Ê-lú-sa-lèm. 24:19 Chóng-.sī, Siōng-tè chhe sian-ti kàu in hia, beh ín-chhōa in kui-ǹg Siōng-chú. Sian-ti tùi in chò kiàn-chèng, m̄ koh, in m̄-thiaⁿ. 24:20 Hit sî, Siōng-tè ê Sèng Sîn lîm-kàu chè-si Io-ho-iá-tah ê kiáⁿ Cha-kha-lī-a; i chiū khiā tī jîn-bîn ê téng-bīn, tùi in kóng, " Siōng-chú ánne kóng, ' Lín ná ē hoān tio̍h Siōng-chú ê kài-bēng, tì-sú bē tàng heng-thong? In-ūi lín khì-sak Siōng-chú, Siōng-chú mā khì-sak lín. '" 24:21 In chiū kiat-tóng lâi hāi i, chiàu ông ê bēng-lēng, tī Siōng-chú tiān ê īⁿ lāi, ēng chio̍h-thâu kā i tìm-sí. 24:22 Án-ne, Io-a-si ông bô siàu-liām Cha-kha-lī-a ê lāu-pē Io-ho-iá-tah só͘ kā i chò ê, lâi kā i ê kiáⁿ hāi-sí. Cha-kha-lī-a sí ê sî, kóng, " Goān Siōng-chú kàm-chhat sin-oan. " 24:23
Io-a-si ê Thóng-tī Kiat-sok
Nî bóe, A-lâm ê kun-peng khí-lâi kong-kek Io-a-si, lâi-kàu Iô-tah kah Ê-lú-sa-lèm, tùi jîn-bîn tiong-kan bia̍t jîn-bîn hiahê siú-léng, kā só͘ chhiúⁿ ê mi̍h ūn kàu Ta-má-su-ko ông hia. 24:24 A-lâm ê kun-peng chhōa chi̍t sió-tūi ê lâng lâi, Siōng-chú ēng tōa tūi ê lâng kau tī in ê chhiú, sī in-ūi in pàng-sak Siōng-chú — in chó͘-sian ê Siōng-tè, chiah ēng ánne lâi chek-hoa̍t Io-a-si. 24:25 Tùi-te̍k lī-khui i, kā i pàng-sak, tī i tio̍h tāng pēⁿ ê sî, i ê lô͘-po̍k ūi tio̍h chè-si Io-ho-iá-tah hiahê kiáⁿ ê hoeh kiat-tóng lâi kong-kek i, tī i ê bîn-chhn̂g kā i thâi, i chiū sí, lâng kā i bâi-chòng tī Ta-bi̍t ê siâⁿ, chóng-.sī, bô kā i chòng tī lia̍t ông ê bōng. 24:26 Kiat-tóng lâi hāi i ê sī Am-móng ê chabó͘ lâng Si-me-at ê kiáⁿ Cha-bat kah Mô͘-ap ê chabó͘ lâng Sī-bí-lī ê kiáⁿ Io-cha-bat. 24:27 Kóng tio̍h i hiahê kiáⁿ kah i só͘ siū ê kéng-kài, í-ki̍p i siu-lí Siōng-chú ê tiān ê tāichì, lóng kì tī Lia̍t ông-kì lio̍k ê chù-kái. I ê kiáⁿ A-má-chiah sòa-chiap i chò ông.