歷代志上 線上收聽:中文和合本 現代中文譯本修訂版 現代台語 台語聖經 客語 福州話 希伯來文讀經 下載檔案 關於語音聖經
19:1 Ta-bi̍t Phah-iâⁿ Am-móng Lâng kah A-lâm Lâng
( SMH 10: 1-19)
Chit sî liáu-āu, Am-móng lâng ê ông Na-ha-si sí, i ê kiáⁿ sòa-chiap i chò ông.
19:2 Ta-bi̍t kóng, " Góa ē hó khoán-thāi Na-ha-si ê kiáⁿ Ha-nun, in-ūi i ê lāu-pē chá-chêng hó khoán-thāi góa." Ta-bi̍t chiū chhe kúi-nā-ê sù-chiá, ūi tio̍h i sí lāu-pē khì kā i an-ùi. Ta-bi̍t ê jîn-sîn lâi-kàu Am-móng lâng ê tē kìⁿ Ha-nun, beh kā i an-ùi.
19:3 Chóng-.sī, Am-móng lâng ê kùi-cho̍k tùi Ha-nun kóng, " Ta-bi̍t chhe lâng lâi an-ùi lí, siūⁿ kóng i sī teh chun-kèng lí ê lāu-pē? I ê jîn-sîn lâi kìⁿ lí, kám m̄-sī beh siông-sè cha-khòaⁿ, thàm-thiaⁿ chit-ê tē, beh lâi kā i húi-bia̍t? "
19:4 Ha-nun chiū kā Ta-bi̍t ê jîn-sîn thì i ê chhùi-chhiu, chián-tn̄g i ê saⁿ-khò͘ ê chi̍t-pòaⁿ, lō͘-hiān i ê ē-sin, chiah hō͘ i khì.
19:5 Ū lâng kā chiahê lâng só͘ tú-.tio̍h ê khì kā Ta-bi̍t kóng, i chiū chhe lâng khì chiap in, in-ūi hiahê lâng chin kiàn-siàu; ông hoan-hù kóng, " Tio̍h chhiáⁿ tòa tī I-é-lī-kho siâⁿ, thèng-hāu chhùi-chhiu hoat tn̂g chiah thang tńg-.lâi. "
19:6 Am-móng lâng chai-iáⁿ tùi in ê só͘ chò ū hō͘ Ta-bi̍t thó-ià in, Ha-nun kah Am-móng lâng chiū kià gîn chi̍t-chheng tha-lan-t, tùi Me-so͘-pho-ta-miah, A-lâm-má-ka, Cho͘-ba, chhiàⁿ chiàn-chhia kah bé-peng.
19:7 Chiū ánne, chhiàⁿ saⁿ-bān nn̄g-chheng tâi ê chiàn-chhia kah Má-kah ông í-ki̍p i ê jîn-bîn; in chiū lâi chat iâⁿ tī Me-tí-ba ê thâu-chêng. Am-móng lâng mā tùi in hiahê siâⁿ chhut-.lâi, chū-chi̍p beh lâi kau-chiàn.
19:8 Ta-bi̍t thiaⁿ-.tio̍h, chiū chhe Io-ap kah ióng-béng ê kun-tūi chhut-.khì.
19:9 Am-móng lâng chhut-.lâi, pâi tīn tī siâⁿ mn̂g chêng, só͘ lâi chiahê ông lēng-gōa pâi tīn tī kau-iá.
19:10 Io-ap khòaⁿ tio̍h tùi-te̍k tī i ê chêng-āu pâi tīn, chiū tùi I-su-la-el kun tiong kéng-soán cheng-peng, hō͘ in pâi tīn lâi tùi-hù A-lâm lâng.
19:11 Kî-tha ê peng kau hō͘ i ê sió-tī A-bi-sai, hō͘ i pâi tīn lâi tùi-hù Am-móng lâng.
19:12 Koh kóng, " A-lâm lâng nā pí góa khah kiông, lí tio̍h lâi pang-chān góa; Am-móng lâng nā pí lí khah kiông, góa chiū khì pang-chān lí.
19:13 Tio̍h hó-táⁿ, lán tio̍h ūi lán ê jîn-bîn kah lán ê Siōng-tè chiahê siâⁿ, chò tāi-tiōng-hu, goān Siōng-chú chiàu I só͘ khòaⁿ-chò hó ê lâi kiâⁿ. "
19:14 Io-ap chiū kah tòe i ê lâng chìn-chêng, tī A-lâm lâng ê bīn-chêng pâi tīn, A-lâm lâng chiū tī i ê bīn-chêng tô-cháu.
19:15 Am-móng lâng khòaⁿ tio̍h A-lâm lâng tô-cháu, in mā tī Io-ap ê sió-tī A-bi-sai ê bīn-chêng tô-cháu ji̍p siâⁿ. Io-ap chiū tò tńg-khì Ê-lú-sa-lèm.
19:16 A-lâm lâng khòaⁿ tio̍h in thâi-su I-su-la-el lâng, chiū chhe sù-chiá chū-chi̍p tōa hô hit pêng ê A-lâm lâng, Ha-ta-te-chel ê chiong-kun Sok-hoat chhōa in lâi.
19:17 Ū lâng thong-ti Ta-bi̍t, i chiū chū-chi̍p I-su-la-el jîn-bîn, kòe Iol-tàn hô, lâi-kàu A-lâm lâng hia, pâi tīn kā in tí-te̍k. Ta-bi̍t í-keng pâi tīn kong-kek A-lâm lâng, in chiū kah i kau-chiàn.
19:18 A-lâm lâng tī I-su-la-el lâng ê bīn-chêng tô-cháu. Ta-bi̍t thâi A-lâm lâng, chhit chheng tâi chhia ê peng, koh thâi pō͘-peng sì bān, mā thâi-sí chiong-kun Sok-hoat.
19:19 Ha-ta-te-chel chiahê jîn-sîn, khòaⁿ tio̍h in thâi-su I-su-la-el lâng, chiū kah Ta-bi̍t kóng-hô, lâi kā i ho̍k-sāi. Chiū ánne, A-lâm lâng bô koh pang-chān Am-móng lâng.
各聖經譯本著作權如版權說明。
本畫面由信望愛資訊中心之CBOL計畫產生，歡迎連結，無須申請。CBOL計畫之資料版權宣告採用GNU Free Documentation License。願上帝的話能建造每一位使用這系統的人，來榮耀祂自己的名。