羅馬書 3章1節 到 3章8節   背景資料  上一筆  下一筆
Chit章是繼續第二章討論ê問題:猶太人kah外邦人有甚麼無仝?tī第二章17到29節這後半段,使徒保羅已經真清楚提起猶太人ê問題,m̄-nā是觀念iáu有待釐清,而且tī信仰ê認知上mā有真chē無正確ê想法。親像in kā割禮看kah非常重要,認為he是kah上帝之間bē-tàng切割ê記號,這是正確ê。M̄-koh真正割禮,並m̄是止tī肉體上ê,á應該是tī心靈上ê(參考耶利米書四:4、九:25—26)。因為「約」ê記號,無應該kan-taⁿ以肉體上ê割禮做記號號,á應該kā它寫tī「心版上」,而且tio̍h對上帝忠實,chiah是真實ê約(參考耶利米書三十一:33)。使徒保羅mā強調:一個真實ê猶太人,á是上帝ê選民,應該會落實上帝ê教導,á m̄是kan-taⁿ會教導別人,家己卻對所禁止ê行為一犯koh再犯。

Tī使徒保羅看起來,若是提起上帝ê救恩,無論是猶太人á是非猶太人,tī上帝面前lóng仝款ê,無差別,因為所有ê人lóng是罪人,chit點是非常基本ê論點。既然lóng是罪人,面對上帝「公義」ê審判,就無任何人ē-tàng例外。因為上帝是公義ê,á公義ê上帝,面對犯罪ê人,bē因為伊是屬tī特定族群,就kā應處ê刑責減輕。使徒保羅否定了chit種觀念,á chit點卻是猶太人久長以來所確信ê。In認為亞伯拉罕已經為in買了chit份「保單」──割禮,m̄-koh使徒保羅否定了chit項看法。

Tī使徒保羅ê觀念中,割禮當然有特別ê意義。它至少表達了兩個基本認bat:一是上帝ê應允—上帝是以色列人ê上帝;以色列人民是上帝ê子民。Á chit-ê應允就是透過割禮顯明了以色列人民kah上帝之間有「約」ê關係。二是律法ê要求。Chit-ê律法是上帝親自頒佈ê。M̄-koh chit-ê律法是根據第一項ê「約」而來。因為án-ne,無遵行律法ê規範、教導,等於無照「約」過生活仝款,mā就是破壞了kah上帝之間ê「約」ê關係。

使徒保羅並m̄是teh諷刺猶太人,koh khah m̄是鄙視(siùⁿ)猶太人tī信仰上ê堅持,顛倒,伊非常肯定猶太人kah上帝之間有特殊關係,m̄-koh伊koh khah燒熱切ǹg望,真實ê猶太人,bē總是tī肉體上是m̄是接受割禮á爭論不休,卻是tī言行舉止上,真正活出上帝選民ê樣式。

使徒保羅進一步用「對話」ê方式來說明伊ê看法,mā就是假設有人提出問題伊來回答。內容主要teh說明一點:若是猶太人無法度因為割禮á kah伊外族有所差別,án-ne,身為猶太人koh有甚麼特別ê所在?Á上帝揀選猶太人ê用意何在?使徒保羅真清楚ê Tī chit段經文中回答chiah-ê問題,伊是用肯定ê語句講「有」意義,而且「當然有」。

羅馬教會內一定有真chē猶太基督徒,in對使徒保羅ê「因信耶穌á得永恆ê性命」ê觀點無掠做當然。In認為chit種講法無疑是kā摩西ê律法kā它廢除。甚至有人mā認為按照使徒保羅ê講法,ná 會hō͘人koh khah容易犯罪,因為人會利用使徒保羅ê「上帝tī耶穌內面白白ê恩典」,強化犯罪ê動機,為tio̍h是beh hō͘耶穌ê救恩凸顯出來。因為án-ne,tī chit段經文中使徒保羅提出伊ê答辯。

第1到4節,使徒保羅非常肯定講猶太人必定有特別ê價值是贏過外邦人ê,伊提起一個真重要ê基礎:上帝kā祂拯救ê信息交託hō͘猶太人,這就是伊tī第一章16節所講ê,先是猶太人,á後外邦人,其意在此。Chia使徒保羅強調無論猶太人án怎棄sak上帝,上帝仝款「信實」,chit-ê詞表示上帝永遠守tiâu祂kah猶太人祖先之間所立ê約。因為上帝是真實ê,祂bē因為猶太人背信,祂就無koh chhap in,上帝不會án-ne,卻是會一再想辦法beh kā chiah-ê背信ê人導正過來。

第5到6節,公義ê上帝,祂ê審判絕對有根據,而且不偏左mā不偏右,祂是鑒察人心內ê上帝。為tio̍h beh強調上帝ê公義,使徒保羅對hiah-ê誤傳上帝信實ê疼ê講法,一再用「當然不」、「當然m̄是」等chit種用詞,tī羅馬書出現真chē pái(參考羅馬書三:6、31、六:2、15、七:7、13、九:14、十一:1、11)。

第7到8節,使徒保羅提出一個真實ê問題是:猶太人豈m̄是一再犯罪?即使in已經受過割禮了,mā是仝款繼續犯罪,ē-sái講是上帝並無因為án-ne就停止祂ê慈愛。上帝ê疼,並無因為人ê因素有增減,祂ê疼是永遠ê、bē改變ê。因為án-ne,做一個人明白上帝ê疼了後,chit-ê人kan-taⁿ會感覺見笑kah不配,á bē koh再想beh繼續犯罪,是beh hō͘上帝ê疼顯得koh khah chē。使徒保羅講,如果人存有chit種「繼續犯罪,顯明上帝ê疼」ê想法,chit種人是絕對無法度得tio̍h赦免ê。這是因為有人反對使徒保羅,就藉機講使徒保羅講過人犯罪koh再得赦免,thang彰顯上帝ê疼koh khah chē,使徒保羅講故意曲解伊講chit種話ê人,一定會hō͘上帝定罪。

重新查詢 專卷研經 羅馬書系列
錯誤回報,請聯繫