羅馬書 16章17節 到 16章27節   背景資料  上一筆
Chit段經文是最後勸勉ê話。Tùi使徒保羅傳福音ê過程中所tú-tio̍h ê情形thang了解,每pái伊開拓一間教會,一離開後,馬上就有人跟tòe tī後面進入教會破壞伊所建立ê教會內部和諧。這mā是為甚麼伊雖然離開了當地ê教會,卻iáu tio̍h ê時常用書信處理教會所發生ê事務ê原因。因為án-ne,伊不時寫phoe去處理所發生ê問題。m̄-nā是信仰ê,mā包括了生活方面ê問題,以及信徒彼此之間ê糾紛。

羅馬書雖然m̄是為chiah-ê事所寫,m̄-koh使徒保羅擔心會有人故意去破壞該教會已經領受tio̍h ê福音信息。使徒保羅tī chia用「滿足家己ê腹肚」chit句話,來形容hiah-ê專門teh破壞福音事工者ê真正目的,就是kā福音事工看做是「職業」,á無想hō͘性命更新ê使命感。因為án-ne,使徒保羅tī chia ài羅馬教會ê眾信徒,一定tio̍h防範chit種人進入教會中。使徒保羅tī chia提醒羅馬教會ê信徒,講chiah-ê專門用花言巧語講「另外一種福音」ê人,乃是「職業傳道者」,in m̄是teh傳福音,卻是為tio̍h「滿足家己ê腹肚」。

第17到19節,羅馬教會雖然m̄是伊開拓ê教會,伊mā m̄-bat去過,m̄-koh伊ài in預防有人滲透進入該教會去攪亂in tī信仰上ê美好見證。因為chit款tāi-chì tī外面邦ê教會已經屢見不鮮了(參考哥林多後書十一:12—15,加拉太書一:6、9,腓立比書三:2、19)。使徒保羅指出會去騷擾、攪亂教會ê人,是kā福音當做一種職業,chit種人是為tio̍h肚腹之需,出賣良知、真理(參考哥林多後書二:17)。In並m̄是真正teh傳揚耶穌koh活ê信息,mā m̄是用耶穌為性命ê主。Tùi第19節thang看出使徒保羅o-ló羅馬教會信徒tī信心ê表現上,確實真有口碑。chit-má伊tī chit-ê封信ê結尾ê時,koh一pái表示對羅馬教會信徒ê堅定信心非常敬佩。第19節講in「tī好事頂面聰明,tī pháiⁿ事頂面無知」,所謂「聰明」,指ê是智慧,mā teh表示對tī信靠上帝ê事,ài有堅定ê信心。「pháiⁿ事」,是teh指棄sak上帝ê教導,chit種人是愚戇ê。「無知」,是teh指lóng bē,就算是有人teh教導、誘惑,mā bē去學、去接觸。

第20節,chit句「主耶穌賜恩典」,是teh指耶穌ê koh活kah救贖,這是tùi上帝來白白ê恩典,是上帝賞賜hō͘忠於祂ê子民,hō͘ chiah-ê忠實ê子民會得thang kah上帝和好。

第21節,「提摩太」,伊是使徒保羅第二pái傳福音ê時,tī路司得得tio̍h ê門徒。老母是猶太人,mā是信徒,á老父是希臘人。提摩太tī家己ê家鄉路司得kah附近ê以哥念一直有真好ê風評,表示伊是一個真頂真koh認真正青年。因為án-ne,使徒保羅決定帶伊同齊去傳福音。Tī出發chìn前,使徒保羅iáu特別為提摩太行割禮(參考使徒行傳十六:1—3)。「路求」,是使徒保羅tī第一pái旅行傳道ê時,tī安提阿教會tú-tio̍h ê宣教同伴,伊是古利奈人(參考使徒行傳十三:1—3)。「耶孫」,伊是Tī使徒保羅tī帖撒羅尼迦傳道tú-tio̍h暴亂ê時,收留使徒保羅kah西拉到in-tau裡避難ê人。因為耶孫幫忙使徒保羅kah西拉,暴徒們大表不滿,衝進伊ê厝,並控訴伊,beh掠伊去見地方官。結果伊被要求「繳款具保」後,chiah得tio̍h tháu放(參考使徒行傳十七:5—9)。「所西巴德」,伊可能就是使徒行傳第二十章4節中所講ê「所巴特」chit-ê人,bat kah使徒保羅tī馬其頓、希臘傳道。

第22節,chia講代寫此書信ê人是「德提」,伊真可能是使徒保羅ê秘書。

第23到24節,「該猶」,可能kah哥林多前書第一章14節所提起ê是仝一個人,伊是使徒保羅親自行洗禮ê信徒。該猶可能mā是一個富有ê人,chiah ē-tàng容納全體會友「tī in-tau聚集」。「以拉都」,伊是負責財務ê工作。「括土」,這是奴隸ê名,意思是「第四子」。

第25到26節,chit兩節是非常重要ê經文,清楚講出使徒保羅kā耶穌所傳「上帝國度福音」,轉變成「福音是關係耶穌基督ê信息」,伊kā耶穌kah上帝國度福音親密地結合做伙。

第27節,chia「全智」ê意思,是teh指一切決定lóng是tī上帝手中。Beh隱藏起來成做奧秘,á是beh掀開來hō͘眾人lóng清楚看見,這lóng是tī上帝ê決策,m̄是人ê能力ē-tàng左右。

重新查詢 專卷研經 羅馬書系列
錯誤回報,請聯繫