羅馬書 12章9節 到 12章21節   背景資料  上一筆  下一筆
Chit段話真親像哥林多前書第十三章ê內容。使徒保羅強調一個真誠ê心內,m̄-nā是用來敬拜上帝,mā tio̍h仝款用來對待所有kah咱同齊過信仰團契生活ê兄弟姊妹。如果tī信仰團契中,無法度án-ne對待仝款信仰ê兄弟姊妹,就真oh講出信仰ê意義tī tó位。

第9到12節,chit段經文真類似哥林多前書第十三章ê內容。主要teh強調基督徒chit-ê信仰團契,ná親像一個家庭中ê兄弟姊妹,有手足之情,應該彼此相疼,會彼此分享。Tī患難中有喜樂,而且存 ǹg望。Chiah-ê勸勉對早期受迫害ê基督徒有真大鼓舞作用。

第13節,chit節thang參考利未記第十九章33到34節,以及申命記第十五章7到8 節。Lóng是teh強調tio̍h好款待外出ê人,mā就是sàn-chhiah人。

第14節,chit節thang參考馬太福音第五章44到46節,路加福音六:27到28節。Lóng是耶穌教導祂ê門徒kah跟隨者所講ê話。

第15節,chit節ē-sái講是「愛人如己」siōng好ê寫照。

第16節,「同心彼此關懷」,這清楚講出一個信仰團契,ē-tàng維持而且bē變質,á是發生分裂,就是建構tī chit種基礎之上。「bē-tàng心高氣傲」,chit句話thang參考第3節。使徒保羅勸勉基督徒,無論是甚麼身分,lóng應該存謙卑ê心。。M̄-thang自高,因為有ê才華lóng是tùi上帝來ê賞賜。

第17到18節,「M̄-thang以惡報惡」chit句話,tī帖撒羅尼迦前書第五章15節koh一pái出現。這kah摩西ê教示—「以牙還牙、以眼還眼」無仝(參考出埃及記廿一:24—25)。耶穌就是教導祂ê門徒,tio̍h用疼來贏過仇敵(參考馬太福音五:38—42),使徒保羅傳承耶穌chit種教導。Mā只有án-ne,chiah ē-tàng tī信仰團契中,大家和睦相處,並且擴大到所khiā起kah工作ê環境中。

第19節,thang參考利未記第十九章18節;詩篇第九十四篇1到2節、第一三五篇14節;箴言第二十章22節。因為人ê判斷會有誤差,m̄-koh上帝明白所有ê一切,特別是上帝鑒察人ê心內,知影人心內真正計謀,只有上帝ê審判chiah是公正ê,á這m̄是人ê能力所及。Chit節mā teh強調對上帝ài有信心(參考申命記三十二:34)。聖經mā一再提起上帝是會「報應」ê,這報應mā teh表明上帝是會懲罰迫害、陷害、欺壓別人者。

第20到21節,thang參考箴言第廿五章21到22節。「羞慚交加」,chit句話tī《中文和合本》ê翻譯是用「Kā火炭堆tī敵人頭殼頂」。這是古代ê人懲罰仇敵ê方式之一。另外,古埃及ê時代,做一個人表明懺悔ê時chūn,就是the̍h-tio̍h一爐火炭khǹg tī家己ê頭殼頂,表示真心懺悔。使徒保羅強調ê是用「善」勝惡。Mā就是用疼來贏過仇敵,因為報仇,kan-taⁿ會帶來koh khah chē ê仇恨,bē解決彼此之間ê問題。

重新查詢 專卷研經 羅馬書系列
錯誤回報,請聯繫