Chit段經文是描述有關第六枝號筒吹響了後，發出ê景象。Tī chia出現ê，並m̄是怪獸，卻是「天使」，而且koh一pái出現「三分之一」ê懲罰。咱mā thang講chit-ê「異象」真特別，原因是tī「異象」中koh有另外ê「異象」（四個天使）出現。

    第13節，「金祭壇ê四角」，照摩西律法ê規定，祭壇頂ài有凸出ê四角（參考出埃及記廿七：1—2），這是當做赦免罪犯用ê（參考列王記上一：50—53）。Tī chia，指chit-ê金祭壇是pái tī上帝面前。Á聲音tùi chit-ê金祭壇發出，表示上帝審判ê聲音。

    第14節，發出ê聲音向chit-ê吹第六枝號角ê天使講，beh去釋放被關ê「四個天使」，in是被關tī「幼發拉底河」。注意tī chit「四位天使」chìn前有加上冠詞，表示chit四位天使是真特別ê對象。

    第15節，chit節講被釋放ê「四個天使」，是beh為上帝進行毀滅工作ê。In kā毀滅「全人類ê三分之一」。M̄-koh這mā同時teh表示尚且iáu有「三分之二」ê人類iáu被看顧tio̍h，bē受tio̍h毀滅力量ê波及。

    Tī chia作者用「此年、此月、此日」來表示有一個特定ê時間一到，上帝就會照計畫進行摧毀ê工作。

    第16節，騎兵「兩億」，表示騎兵非常chē，chē到無法度數算ê意思（參考詩篇六十八：17，啟示錄五：11）。

    第17到19節，chit三節描述chiah-ê騎兵ê穿插以及進行毀滅工作ê情景。

    「紅得像火，藍得像藍寶石，黃得像硫磺」等，chit三項lóng是teh描述災難來臨ê時，連想beh逃避ê空間kah機會mā無。

    「馬ê頭像獅ê頭」，表示chiah-ê馬非常凶悍，看起來就hō͘人膽寒心怯。而且會tùi in ê嘴中噴出「火、煙，kah硫磺」等物，chit種描述lóng tī說明，這表示in會帶來徹底ê毀滅。而且毀滅ê數字仝款是「三分之一」。

    馬ê「尾溜像蛇，頂面有頭」，而蛇ê頭有毒牙會致人tī死。Chiah-ê lóng teh表示只要被chit種馬ê尾溜phah到，必死無疑。

    第20到21節，chit兩節chiah是作者約翰想beh提醒讀者ê經文。Tī第15節kah第18節lóng有提起第六個天使吹出號角聲，原本是beh毀滅「三分之一」ê人類。M̄-koh真正用意，就是beh勸勉hiah-ê iáu有機會得tio̍h拯救ê三分之二，ài in趕快悔改，若無，in mā會親像hit-ê被毀滅ê人類。

    Chia提起「無tī chiah-ê災難中被刣ê人」，就是teh指chhun落來ê「三分之二」ê人，可惜是in「猶原不悔改」，繼續去拜家己「親手所造ê偶像」，是「無法度看、無法度聽、無法度行ê物件」（參考詩篇一一五：4—8、一三五：15—18，以賽亞書四十四：12—17、四十六：6—7，耶利米書十：3—5）。Mā因為所拜ê是虛假偶像ê神，因為án-ne，bē想beh「悔改」，顛倒，iáu繼續做出「凶刣、邪術、淫亂、偷the̍h」等罪惡行踏，kan-taⁿ會為家己帶來koh khah大ê懲罰而已。