啟示錄 6章1節 到 6章8節   背景資料  上一筆  下一筆
Tùi第六章開始直到第十一章止,ē-sái講是啟示錄siōng主要ê部分。Tī chit段經文中,記載有關用七個印加封ê冊卷被phah開(六:1—八:1),以及tùi phah開ê冊卷中所出現ê七個天使吹起號筒ê情景(八:2—十一:19)。

    Tī phah開ê七個印中,koh分做兩個段落,第一個段落是前四個印(六:1—8),第二個段落,是後三個印(六:9—八:1)。M̄-koh比較特別ê所在,是第七個印tú phah開,就koh出現連串ê「七支號筒」,每一個號筒lóng有一個吹號ê天使。Chit七個號筒有一kóa部分重複頭前七個印之信息,m̄-koh mā有真chē新ê信息出現。這就kah-ná七個印加上七個號筒,然後彼此相連攀結交織做伙,不斷重複mā不斷「脫」出。這「脫」出來ê部分,就是七個號筒ê信息,而交織做伙ê,就是重述七個印ê意義。

    Chit段經文是記載羊羔phah開七個印中ê前四個印,chit四個印所表明出來ê,就是罪惡,為人類社會帶來禍害。M̄-koh無論chiah-ê罪惡是多強大力量,lóng會因上帝ê忿怒、懲罰,面臨大災難—戰爭、饑荒、瘟疫,並且受tio̍h野獸攻擊。每pái chit四個印一phah開,lóng會重複一個重要ê動詞,就是「來」。續落來就有一匹無仝顏色ê馬會出現。這是一種編輯上ê技巧,teh說明人類tī苦難中ê一種心靈ǹg望,期待tio̍h公義ê上帝ê審判會趕緊臨到,好制止當teh毀滅人類世界ê邪惡力量。

    第1節,這是開啟「第一個印」,四個活物中ê一個發出「雷轟ê響聲」聖經作者ài用「雷轟ê響聲」來表達上帝臨到,á是祂ài beh進行審判ê工作,啟示錄作者kúi-nā pái使用「雷轟」、「響聲」ê詞,lóng是teh表達chit種信息(參考四:5、十一:19、十四:2、十六:18)。對照第四章7節,chit第一個活物是「獅」。

    「來!」,chit-ê「來」字,tī希臘文mā thang當做「去」ê意思解釋。M̄-koh tī chia,以及以後ê「來」字中,這是對騎tio̍h馬ê騎士講ê。騎士騎馬ê速度jú快,表示耶穌koh再臨ê時辰已經接近,審判ê時刻隨時會來臨。

    第2節,「看見一匹白馬」,然續後落來講chit匹馬所代表ê意義是「得勝」,mā用來表示好兆頭,而且「得勝koh得勝」。M̄-koh比馬iáu重要ê是「hit-ê騎馬ê」,伊得tio̍h勝利者ê「冠冕」,這並m̄是代表傳承王位ê王冠。

    Chia講騎士手上the̍h「弓」,表明這是來自外族攻擊者所用ê兵器。「弓」mā thang代表「軍隊」。

    第3到4節是phah開「第二個印」,第二個活物講話,如果對照第四章7節,第二個活物乃是小牛。Chia並無清楚講出是甚麼人phah開「第二個印」,m̄-koh thang理解,必定是「羊羔」chiah有資格kah能力。Chit位騎士所騎ê馬是「紅色ê」。「紅」,chit-ê字有含血、濺血ê意思,這tú好就是戰爭死傷者身上ê所呈現ê畫面,這mā是人世間siōng殘酷ê影像:家己人「互相殘殺」。這表示「內戰」頻繁,tú好kah第一匹白馬所代表ê外患相對照。Mā因為án-ne,用「紅色」ê馬來表示血濺四界,人民ê性命被嚴重摧殘。

    「一把大劍」,這mā是戰場上ê兵器。表示殺戮ê事件kā層出不窮。

    第5到6節,phah開「第三個印」,出現ê是一匹「烏馬」,這代表ê就是食物缺乏,這kah饑荒有密切關係。Thang án-ne了解:戰爭kah饑荒是分bē開ê,因為戰爭,hō͘人力lóng投入了戰場,田園自然會廢耕。因為廢耕,á是田園成做戰場,就bē有任何收成,饑荒tòe之而來。

    「Hit-ê騎馬ê手中the̍h一個天平」,就是古代ê秤,tī chia mā是一種象徵饑荒ê時代,按照公道分配糧食,m̄-koh每一個人所分配到ê食物非常ê少,無夠生活所需要ê。因為tī chia講每工所得tio̍h ê「工資只有ē-tàng買一公升小麥」,á是只買tio̍h「三公升大麥」,表示生活已經陷入困境。

    若是用一工ê工資是一個「銀á」(denarius,參考馬太福音二十:2),一個銀á tī平時thang供一間六口食飽三餐。Tī平時一個銀á大約thang買tio̍h八到十二升ê小麥,á是二十á是三十升大麥。饑荒,另外一方面所呈現出來ê社會問題,就是經濟上有嚴重ê通貨膨脹。

    「橄欖油kah酒bē-tàng糟蹋」,表示tī饑荒、缺乏糧食ê時代,任何thang食物lóng真珍貴。

    第7到8節,這是phah開「第四個印」,看tio̍h ê是一匹「phú色ê馬」。Chit種顏色mā是死亡了後屍體ê顏色,因為án-ne,「phú色」所代表ê意義,就是「死亡」。Á kah「死亡」相tòe ê就是「陰間」。

    Chia講死亡「管轄四分之一ê土地」,表示iáu有四分之三乃是清氣ê,有性命ê,m̄是被「死亡」kah「陰間」所控制。M̄-koh被控制ê所在,則有「戰爭、饑荒、瘟疫,kah地上ê野獸」等tio̍h beh懲罰人。

重新查詢 專卷研經 啟示錄系列
錯誤回報,請聯繫