啟示錄 22章6節 到 22章21節   背景資料  上一筆
Tī chit段經文中,作者用「看!我teh要來à」chit句話,說明上帝審判ê時刻teh beh來臨,救主耶穌真緊to̍h會來到。

    第6節,「chiah-ê話是真實可靠ê」,是teh指天使傳達上帝ê信息是「真實可靠」ê話(參考啟示錄廿一:5)。上帝ê話ê範圍包括kui本聖經,作者特別指出上帝「賞賜聖神hō͘眾先知」,而先知就是tī傳達上帝ê話語,舊約聖經中大部分lóng是先知ê信息。Koh講是「主上帝差遣伊ê使者」,chiah-ê使者mā包括摩西,伊是舊約聖經中siōng重要ê使者。因為án-ne,chit節所講ê「chiah-ê話」,就是teh指摩西律法冊kah先知文獻,這就等於是kui本聖經ê意思。

    「短期內beh發生ê事」,thang對照啟示錄第一章1節、19節、第四章1節。指ê就是耶穌koh再臨ê事件,表示時間真緊to̍h會來臨,bē等真久。有真chē ê「奴僕」會為tio̍h án-ne事件做見證。

    第7節,Tī chit章中共計出現三pái,kah第12節、第20節是仝款ê話。
    「看!我teh要來à」,這第一pái是天使講ê,第二pái kah第三pái lóng是耶穌家己講ê。這是天使引用耶穌所講ê話,表示耶穌koh再臨ê時刻就beh來到,chit對hiah-ê tú-teh受難中ê基督徒來講,是非常大ê安慰kah鼓舞,mā是陷tī被迫害中ê苦難性命,siōng好ê信息。

    「hit-ê遵守chit-ê冊頂面預言ê人」,chit句話thang參考啟示錄第一章3節。這真清楚說明一件事:上帝啟示ê話語所寫做ê聖經,一定tio̍h遵守,若是只有研究而無去遵守,án-ne就無甚麼意義thang講,因為聖經上帝ê話,無法度只有研究,而是beh去遵行、實踐。相對ê,無研究清楚,就根本m̄知上帝ài咱遵行ê是甚麼事。

    「實在有福氣」,這是第六pái ê「實在有福氣」,啟示錄總共提了「七」次(參考一:3、十四:13、十六:15、十九:9、二十:6、廿二:7、14)。

    第8到9節,chit兩節thang參考啟示錄第十九章10節。這是第二pái提起bē-tàng拜天使,因為天使kah先知等,「仝款lóng是上帝ê奴僕」,m̄-thang去拜人,唯一beh敬拜ê對象只有上帝。Mā tùi chit兩節thang想像會tio̍h,為何早期教會發生崇拜天使ê錯誤行為。

    「聽見mā chhōe -tio̍h」,chit句話講出作者是kā家己親目看見、親耳聽見ê事見證出來(參考使徒行傳四:20),chit種見證siōng真實。

    第10節,「m̄-thang kā chit本冊頂面ê預言封閉起來」,koh一pái強調耶穌koh再臨ê時刻就beh快到à。因為án-ne ài kā chiah-ê來自天頂ê信息公開來,hō͘ koh khah chē ê人聽見、明白,並且ē-tàng tùi án-ne信靠上帝羊羔而得tio̍h拯救ê恩典(參考啟示錄一:3)。

    第11節,chit位天使真清楚指出:tī末後ê日子,是kā性命kah死亡攤開,這ná親像摩西tī往生chìn前對以色列人所講ê(參考申命記三十:1、15)。Chia啟示錄作者記落來天使傳出來上帝ê信息是:tī chit最後ê機會,若iáu不醒悟過來,就無機會à。每一個人beh為家己ê選擇負責。

    第12節,「我beh帶來報賞」,這是天使傳出耶穌ê信息。Kah第7節所講ê「有福」有仝款ê含意,chia講遵守教導ê信徒必定會有獎賞ê。「報賞」chit字,原希臘文「misthos」,是teh指應得ê待遇(參考啟示錄二:23)。

    第13節,參考啟示錄第一章8節、第廿一章6節。

    Chit節講「開始kah終結」,這表明性命之主有「權威」,祂thang啟動一切,mā thang kā它停止。Tī chia用「事(tāi)先kah末後」,表明「永恆」ê意思。
    第14到15節,這是相對存在ê現象。

    「洗淨家己衫褲ê人」,參考啟示錄第七章14節,指出ē-tàng洗淨家己ê衫褲,並m̄是用人ê氣力做會到,而是beh用羊羔ê血(參考哥林多前書六:11),因為chiah-ê污穢乃是指性命中ê罪狀、斑點。想用人ê氣力除去是枉然ê(參考羅馬書七:14—25)。

    Chia第七pái提起「有福」。
    「有權食性命樹á頂ê果子」,chit種人就是「有福」,因為從來無人食過chit種果子(參考創世記三:22—24)。Á食chit-ê果子ê人ē-tàng擁有永恆ê性命。

    相對tī另外一種人,就是所謂「留tī城外」ê人,in ê結果會ná親像啟示錄第廿一章8節所提起ê人仝款,會面臨「第二pái ê死」,永遠tī「火湖」中(另外參考詩篇一○一:7)。

    第16節,thang參考啟示錄第一章1節。作者一開始就講chit本冊乃是得自耶穌ê啟示而寫落來ê。M̄-koh tī冊內mā有真chē pái提起天使對作者講ê話(參考啟示錄十九:9、廿一:9、廿二:6)。天使mā是受命傳達上帝á是耶穌ê信息,卻m̄是跟tòe己意而講話。

    「大衛ê kiáⁿ孫」,參考啟示錄第五章5節,以賽亞書第十一章1節、10節。Tùi人ê族譜來看,耶穌就是大衛ê kiáⁿ孫(參考馬太福音一:1)。伊是「明亮ê星辰」,表示伊是性命ê拯救者,帶hō͘信tùi伊ê人看會tio̍h性命ê亮光(參考約翰福音八:12、九:5)。

    第17節,chit節連續用三pái「來」回應第7節、第12節、第20節ê「我teh要來à」。Chia第一pái用「聖神kah新娘」,第二pái用「所有聽見ê人」,第三pái是「口渴kah願意ê人」。

    「新娘」chit-ê詞tī chia就是teh指基督ê教會,它對所有ê人呼召講「來」,而呼召ê對象不限,只要是願意聽從「聖神」所啟示ê聲音,而且願意回應講「來」ê人。因為án-ne,tī chia ê「來」,是一個聽tio̍h就隨時力行ê態度。只要是「所有聽見ê人」願意用謙卑ê心來領受,就ē-tàng得tio̍h。

    「口渴ê人lóng來」,Tī以賽亞書第五十五章1到3節記載所有心靈飢渴ê人lóng thang來領受,而且無需要付出任何代價,只要是「願意ê人lóng thang白白來接受」。

「白白接來接受」,chit句話mā是使徒保羅所講ê上帝恩典,就是「白白」賞賜hō͘人,只要願意,就ē-tàng領受得tio̍h(參考羅馬書三:24)。

    「性命ê水」,chit句話thang參考約翰福音第四章14節。另外,耶穌mā bat對hiah-ê四界去chhōe伊ê民眾講,伊就是性命ê糧食,tùi伊ê身上領受chit-ê糧食ê人永遠bē飢渴(參考約翰福音六:35)。

    第18到19節,chit兩節強調chìn前所寫落來ê,lóng是tùi上帝來ê預言,因為án-ne,無論加添á是刪減,lóng是對上帝極大ê褻瀆,是hō͘嚴厲禁止ê行為。箴言ê作者mā提起仝款ê警告(參考箴言三十:5—6)。Chit種「鄭重警告」,mā表示是一種非常忠誠ê心意,而且用嚴肅ê態度講話。

    「享受性命樹kah聖城ê福澤」,指ê就是永恆性命ê福氣。

    第20節,kui本啟示錄ê中心題旨,就是beh kā讀者講:耶穌就「teh要來」。早期教會有一個觀點:當耶穌koh再臨ê時chūn,mā就是上帝審判ê時刻來臨,而chit點mā是早期教會共同ê期待(參考哥林多前書十六:22)。因為in lóng面臨嚴厲ê迫害,生活tī極大ê痛苦裡。

    第21節,「願主耶穌賜恩典hō͘ lín大家」,chit句祝福ê話,tùi作者寫作ê時代到chit-má,一直是教會聚會中不時使用ê祝福。

重新查詢 專卷研經 啟示錄系列
錯誤回報,請聯繫