啟示錄 18章9節 到 18章17節   背景資料  上一筆  下一筆
Chit段經文是用先知以西結書第廿七章ê資料,該處經文是先知teh為泰爾城ê滅亡哀哭之哀悼文,作者約翰引用chit-ê資料來預言羅馬帝國滅亡ê景況。作者用此來講述上帝審判巴比倫帝國ê情景,並且是用君王(第9到10節)、商人(第11到17節a句)、水手(第17節b句到19節)等三種無仝人物為巴比倫帝國滅亡所唱哀悼ê詩歌,表示各階層ê人lóng看tio̍h巴比倫帝國被毀滅ê慘狀。其實,in並m̄是為該國ê淪亡感覺傷心,卻是因為會失去本來ê利益。因為in只有ē-tàng khiā tī遠處觀看,而且一面觀看、一面吐氣。

    Koh講,chit段經文比較特別ê所在,是先知文獻有說明hiah-ê hō͘ 上帝忿怒而遇tio̍h毀滅者ê原因。M̄-koh tī啟示錄ê作者約翰,並無說明為甚麼上帝beh毀滅巴比倫帝國。原因是大家lóng已經清楚知影當時羅馬帝國統治者是怎樣teh對待基督徒,就ná親像早年埃及、亞述、巴比倫等帝國怎樣對待上帝ê子民仝款。

    第9到10節,chit兩節是為君王哀悼ê內容。Chiah-ê君王mā teh代表tī羅馬帝國興盛時代,kah之聯盟,á是被統轄而成做附庸國家ê君王。In目睹「火燒tio̍h」ê帝國所冒出來ê「煙」mā只有ē-tàng khiā tī遠處觀望,kah第10節所講ê「遠遠khiā-teh」是仝款ê意思,m̄-koh卻只有ē-tàng「為伊哀哭」。

    「慘ah!慘ah!」chit-ê用詞ê意思是teh指「禍哉!禍哉!」(參考以賽亞書五:8、11、18、20)。表示原本就m̄是teh為hit-ê城ê毀滅哀傷,卻是面對審判來臨ê時,感覺憂心重重之態。

    「iáu未到一點鐘」,表示時間非常短促。這thang看出上帝懲罰ê時刻隨時來臨,真緊、緊迫。換句話講,榮華富貴只不過是瞬間ê享受而已,而上帝懲罰時刻來臨之快,hō͘人連想tio̍h預防á是預測ê機會都無。

    第11節,tùi chit節開始直到第16節,lóng是借用商人所敘述ê內容,來說明巴比倫帝國毀滅ê慘狀。

    「koh khah án怎都無人來買in ê貨品了」,chit句話mā thang看出當時ê環境kah背景,是羅馬城差不多就是kui個歐洲kah中東世界ê中心。Chit句話mā說明過去tī-chia經商貿易ê商人看tio̍h hit-ê城被毀,mā等於in看tio̍h家己過去所有ê產業、thàn錢ê機會,taⁿ lóng消失了,in mā會因為án-ne而艱苦心。

    第12到14節,chit三節提起詳細ê貿易商品ê名稱。對照以西結書第廿六到廿七章來看,就會發見二者ê內容真接近。Mā tùi chit三節所描述ê商品內容,thang看出當時羅馬帝國ê繁榮、興盛。

    Thang kā chiah-ê商品分做六大類:
    一是金銀珠寶類:包括有(1)金、(2)銀、(3)寶石、(4)珍珠等。

    二是高級服飾類:包括有(5)麻紗、(6)絲綢、(7)紫色衣料、(8)朱紅色衣料等。

    三是高級藝術雕刻飾品:包括有(9)香木、(10)象牙、(11)木器、(12)銅器、(13)鐵器、(14)大理石等。

    四是高級香料:(15)肉桂、(16)香料、(17)香、(18)香水、(19)乳香等。

    五是食品:(20)酒、(21)油、(22)麵粉、(23)麥á、(24)牛、(25)羊等。

    六是生產力工具:(26)馬、(27)馬車、(28)奴隸、(29)人口等。

    Tùi以上所列舉ê項目中,tio̍h注意第(28)kah第(29)兩項是「奴隸」kah「人口」,這表示當時羅馬帝國時代,人口販賣ê情景真興盛。

    Tī第14節提起「貪愛」,是teh指人心內ê意念,mā ē-sái講是心內嚮往ê意思。

    「koh khah án怎都chhōe不tńg來了」,意思是完全消失了ê意思。

    第15節,chiah-ê商賈mā是kah hiah-ê kan-taⁿ會講諂媚之言ê附庸君王仝款,只有ē-tàng「遠遠khiā-teh」(參考第10節)觀看,這表示兩種意義:其一是知影家己無能力搶救,因為災難實在siuⁿ大,是in從來無見過ê。其二是in已經heⁿh驚kah m̄知如何是好à。

    第16到17節a,「慘ah!慘ah!Chit-ê大城ah!」,thang參考第10節。

    「iáu未到一點鐘,這一切財富lóng喪失!」,chit句話mā出現tī chiah-ê富有ê商人嘴中,因為連「一點鐘」都未到,結果hō͘ chiah-ê seng-lí人、好額人就算是想beh搶救財物,卻因為時間siuⁿ短促soah會失去一切財富。

重新查詢 專卷研經 啟示錄系列
錯誤回報,請聯繫