啟示錄 1章1節 到 1章20節   背景資料  下一筆
無論啟示錄記載內容過去án怎受tio̍h真chē聖經學者ê爭議,ná親像chit章第3節所講ê「讀chit本冊ê人jōa-ni̍h-á有福ah」仝款,詳細閱讀就會發見上帝ê信息透過真chē「異象」來顯示出來。

	Chit章講tio̍h上帝透過作者約翰寫hō͘「亞細亞ê七個教會」ê信,chit七間教會就是「以弗所、示每拿、別迦摩、推雅推喇、撒狄、非拉鐵非、老底嘉等教會。然後接落去就是有一位看起來ná親像「人子」ê出現tī伊身邊,開始kā chit七間教會ê狀況kah會tú-tio̍h ê審判講述出來。

    第1節,作者一開始就講chit本冊是「記載耶穌基督ê「啟示」。所謂「啟示」,希臘文是teh指「phah開來看」,就是kā隱密ê事掀開來,無koh有隱藏。M̄-koh這並m̄是由人來「掀開」,卻是由上帝家己來掀開。Chit種講法真清楚說明,啟示錄chit本經冊中所講述、記載ê事,lóng是tùi上帝來ê「啟示」。Chia講是「基督差遣天使向伊ê奴僕約翰顯示」所beh傳達ê信息。作者ài用「天使」,這是啟示文學喜愛採用ê素材之一,單單tī啟示錄中就用了chē kah六十五次。 
第2節,講本經冊ê作者是名叫「約翰」。Tī kui本啟示錄總共記載六pái,lóng說明約翰就是此本經冊ê作者(參考一:1、2、4、9、廿二:8、18)。有bē少聖經學者認為作者約翰chit-ê人,真可能就是耶穌基督ê門徒。M̄-koh是m̄是就是伊?iáu teh討論中。因為約翰chit-ê名tī猶太人ê社會真平常,咱ē-tàng確定ê一件事,就是作者乃是一個猶太人,對舊約經典非常熟悉。Chit位約翰是beh為「上帝ê信息kah耶穌基督所啟示ê真理做見證」,chit點mā是本經冊ê重點。

第3節,作者講「讀chit本冊ê人是jōa-ni̍h-á有福ah」,這是第一pái提起「有福」。Tī啟示錄中,共計有七pái提起「有福」(另外六pái請參考十四:13、十六:15、十九:9、二十:6、廿二:7、廿二:14)。Chit-ê「有福」一詞kah馬太福音第五章3到10節所提起ê「八福」所用ê「福」字仝款,意思是teh指kah上帝有合宜ê關係,這mā是使徒保羅tī羅馬書ê中心信息(參考羅馬書一:17)。

「聽見chit-ê預言並遵守冊中所記載ê人」,必定成做「有福」ê人,而chia ê「預言」,指ê m̄-nā是未來ê事,mā包括tùi聖經中所得tio̍h ê「勸勉」kah「安慰」ê信息,chiah-ê信息就是kui本聖經ê話語。

「日子快到à」chit種呼籲lóng kah「末日」來臨、審判ê日子teh要到等chit種觀念親密地連結做伙,是分bē開ê。M̄-koh「末日」並無一定就是teh指世界ê路尾講ê,有時是teh指審判ê來臨,人遇tio̍h無法度忍受ê苦難來講。

第4到5節,koh一pái hō͘咱看tio̍h新約時代寫書信ê模式,就是tùi自我紹介開始,了後就是請安。Chit兩節有請安mā有祝福。Chia講chit本書信是寫hō͘亞細亞省ê「七個教會」。有聖經學者認為chia ê「七」,並無一定是teh指chit「七」間教會,卻是用「七」來表明所有教會lóng需要聽從chit本經冊所傳達ê信息。因為Tī聖經中,「七」所表示ê意義包括有神聖、祝福、完全、圓滿、夠額等等ê意思。

Chia提起「昔tī-teh、今tī-teh、將來永tī-teh ê上帝」,chit句話kah出埃及記第三章14節ê「我是創始成終ê主宰」是仝款ê意思。表明上帝是萬物ê創造者,一切性命ê來源lóng是上帝創造ê。

「七個靈」,指ê乃是上帝全備ê「靈」。Tī以賽亞書第十一章2節提起上帝ê靈包括有:一是智慧、二是聰明、三是謀略、四是能力、五是知識、六是敬畏等。有一本Tī聖經版本上非常有權威ê《七十人譯本》則tī chia koh加上了一個「敬虔ê靈」,án-ne共有「七個靈」。Tī chia,作者講耶穌基督就是chit「七個靈」ê見證者。Tùi祂ê「死裡koh活」開始,beh hō͘所有接受上帝信息ê人lóng仝款lóng享受耶穌基督koh活ê恩典。

Chia提起耶穌基督疼咱,祂為咱「犧牲流血,tùi罪中kā咱釋放出來」,chit種信仰認知mā是基督教信仰ê基礎。

第6節,chit節真可能採用出埃及記第十九章5到6節ê觀點,認為只要是遵行上帝旨意者,lóng會成做上帝「神聖ê國民」,是事奉上帝ê「祭司」。

第7節,thang參考但以理書第七章13到14節,講述hit位teh beh來臨ê拯救者,會駕雲來到世間。啟示錄作者用chit種方式teh說明當末日來臨ê時,上帝就是審判者,祂ê威嚴是人無法度ê抵擋ê。Koh講,chit節mā回應撒迦利亞書第十二章10節所提起ê,當眾人teh為「hō͘ in鑿死ê hit位」哀哭ê時,taⁿ卻相對看tio̍h當chit位拯救者駕雲來到世間,mā tio̍h為伊榮耀ê來臨哀哭,因為過去所做ê事,接受嚴厲ê審判而哀哭。Chit節mā teh暗示基督徒tī受tio̍h迫害ê時,將來會得tio̍h極高度ê榮耀,而相對ê,迫害基督徒ê,會開始哀哭、咬牙切齒à。

第8節,chit節ê句話mā同時出現tī第廿一章6節、第廿二章13節。
「阿爾法」kah「亞米茄」了後,加上說明「開始」kah「終結」chit-ê說明詞ê,mā出現tī第一章17節、第二章8節。對照第廿二章13節來看,作者有特別說明chit位「開始」kah「終結」者就是耶穌基督。Á tī第廿一章6節則講chit位「開始」kah「終結」擁有「性命ê泉水」,thang白白賜hō͘口渴ê人lim。

「全能ê上帝」,chit句話說明基督教信仰ê上帝有三大特性ê其中一種。另外兩大特性就是「全在ê上帝」kah「全知ê上帝」。

第9節,作者「約翰」講伊是bat為tio̍h傳福音而「被囚禁tī名叫拔摩ê海島上」。Chit-ê「拔摩島」是設tī愛琴海中ê一個多石小島,kui個島面積大約是六公里寬、十三公里長,靠近現今ê土耳其海岸。

作者強調伊kah同信ê兄弟姊妹(指chit七個教會)同齊「分擔患難、同齊忍耐」,表示伊並無tī非常困難、惡質ê環境下離開in,卻是tī耶穌基督內面kah in同在同齊。因為有chit種條件,伊chiah ē-tàng講同時mā tio̍h kah chit七間教會「分享」tī耶穌裡ê「主權」。Chit-ê「主權」,意思是teh指耶穌基督koh活了後,審判時刻ê來到,所有信靠耶穌基督到終末都無改變ê人,lóng會分享chit份被拯救ê榮耀(參考帖撒羅尼迦前書四:16—18)。

第10節,「有一個主日」,chit句話至少說明當時ê基督徒已經tùi猶太人ê「安息日」聚會,轉成耶穌基督koh活ê日子—「主日」作為聚會ê時間,無koh是用猶太人ê安息日聚會à。

Chit節提起作者被「聖神支配」,仝款ê詞句mā出現tī第四章2節、第十七章3節、第廿一章10節。作者約翰講伊tī聖神ê支配之下,「聽見了一個大tân聲,kah-ná吹號ê響聲」,而且聲音來自「背後」,意思是teh指chit-ê異象,是tī看bē-tio̍h、預防bē-tio̍h ê狀況下出現ê。
第11節,chit聲音說明作者寫chit本經冊ê主要目的,就是beh kā所看見ê異象、聽見ê話,kā「以弗所、示每拿、別迦摩、推雅推喇、撒狄、非拉鐵非、老底嘉七個教會」講。

第12節,作者講伊「轉身」就「看見七個金燈臺」。Tī第20節作者有說明「七個金燈臺」指ê是用弗所等七間教會ê意思。

第13到16節,作者Tī chit段經文描述伊看見「有一位像人子」ê人出現。「人子」,chit-ê用詞kah但以理書第七章13節ê「人子」有關,是teh指tùi上帝來ê拯救者(參考使徒行傳七:56)。

Chit位「像人子」ê是「穿插長袍,胸前繫tio̍h金帶」,chit種穿著有如摩西律法中所規定ê祭司大禮服(參考出埃及記三十九:2—3、29)。

伊ê「頭毛潔白像雪」,這是用但以理書第七章9節ê背景,描述拯救者耶穌基督ê樣式。Chit種用ná親像雪hit種潔白,表明ê另外一個意義,就是發光到目睭無法度正視仝款(參考馬太福音廿八:3,馬可福音九:3)。

「目睭像火燄」,腳像擦亮ê銅一般明亮,這是採用但以理書第十章5到6節ê資料。這mā teh說明chit位偉大ê審判者ê目睭,thang看透人心內ê意念。

「七顆星」一詞thang參考第20節,teh代表「七個教會ê天使」。
「嘴中吐出一把雙刃利劍劍ê劍」;劍,是用來攻擊、審判、刑罰ê(參考二:16、十九:15、21,以賽亞書四十九:1—2)。

「面像透中晝ê陽光」,表明正義、公平,真清楚,無隱遮。

以上chiah-ê lóng teh表示一種非常崇高ê威儀,hō͘人看了會不寒而慄。

第17到18節,因為有頂面所講ê「形像」出現,致使作者看tio̍h了後,馬上仆倒tī土腳,嚇得ná親像死人一般,連動mā m̄敢動。「mài驚」,chit句話一再出現tī耶穌基督傳福音ê過程中(參考馬可福音五:36、六:50、路加福音五:10、十二:32),lóng是耶穌基督teh安慰、鼓勵祂ê門徒,以及對性命失去希望ê人(會堂ê主管葉魯)所講ê話。

Chit兩節mā同時提出耶穌基督teh紹介家己,有三個特點:
一是「我是開始,mā是終結」。二是「永存者—bat死過,chit-má活teh,會永遠活teh」,chit句話表示出耶穌基督已經贏過死亡。三是「掌掠tiâu死亡kah陰間ê鎖匙」,thang參考馬太福音第十六章18節。這說明信靠耶穌基督ê人thang贏過死亡ê威脅。

綜合頂面所講三點,作者約翰想beh kā chiah-ê因為堅守對耶穌基督ê信心ê信徒講,雖然有ê親人、朋友已經死去,m̄-koh耶穌基督就是掌握「死亡kah陰間ê鎖匙」ê主宰,伊有權thang kā hiah-ê迫害信徒ê人關入陰間,mā thang hō͘ hiah-ê因被迫害來死去ê人,tùi陰間koh活起來,kah耶穌基督同齊享受永恆ê性命,因為耶穌基督已經tùi死裡koh活起來,而且永遠活teh。使徒保羅講基督徒就是kah耶穌基督同死,mā同koh活(參考羅馬書六:5、8)。
第19節,傳達聲音者kā作者約翰講一定tio̍h kā「所看見ê,無論是chit-má iáu是將來beh發生ê事,lóng寫落來」。Chiah-ê所看見ê事,就是teh指chit-ê異象,這是關係耶穌基督審判kah拯救一切ê權柄。

第20節,「奧秘」,並m̄是「秘密」,卻是指過去bē明白,chit-má「曉悟」、「明白」,chiah發覺tāi-chì真奇妙。Chia ê「七個教會ê天使」到底是甚麼人?是teh指人,á是teh指天使?真oh分清楚。因為「天使」mā thang講是教會ê代表。

重新查詢 專卷研經 啟示錄系列
錯誤回報,請聯繫