Lóng有一個共同ê主題，就是用耶和華上帝為性命ê主、為王、是一切萬物ê統治者。Chiah-ê詩篇mā因為chit種主題，lóng用tī聖殿ê敬拜禮儀中大聲歡唱。

這是一首呼籲大家同齊用o-ló ê聲音歌頌上主ê詩歌。Chit首詩歌通常會用tī季節、慶典ê時吟唱比較khah chē，特別是tī收割結束ê時ê Tòa棚節，全體民眾感謝上帝而唱ê詩歌。因為第1到7節ê內容kah第8到11節ê內容差別真大，有人認為這是由兩首無仝ê詩歌組合而成ê。

第1到7節，這是部落á是宗族ê長老，帶領所有ê族人beh敬拜上帝ê時ê宣召詩歌，呼籲所有ê人lóng tio̍h來歌頌o-ló拯救in ê上帝。Tio̍h用感恩ê心來敬拜祂。因為chit位上帝是大有能力ê上帝，祂mā是創造一切ê上帝，無論是海洋á是大地，lóng是上帝創造ê。

第4節thang參考詩篇第一三九篇8節，無論是深淵á是上天，lóng會看見上帝，因為祂掌管一切。

第6到7節c句是chit首詩ê中心，呼籲民眾tio̍h會記得上帝，beh聽上帝ê話。第7節koh一pái用上帝是顧羊人，祂ê子民就是祂ê羊群，表明這二者之間親密ê關係。聖經一再表示上帝kah以色列人民之間，就是顧羊人kah羊群之間ê特殊關係（參考詩篇廿三：1、七十八：52，以賽亞書十四：30，耶利米書三十一：10，以西結書三十四：15，彌迦書四：8、五：4）。

第7節d句到11節，chit段詩歌比較khah sêng是先知á是祭司á是族長ê勸勉詩句。踏話頭就用「Lín chit-má聽伊所講ê話pah」，續落來就是用上帝傳出ê信息之模式，敘述以色列民族經歷過ê歷史做教材。

第8節ê「米利巴」、「瑪撒」，有關chit兩個地名ê記事記載tī出埃及記第十七章1到7節，以色列人民因為chhōe bē-tio̍h水lim，而埋怨上帝。上帝ài摩西用手中ê柺á phah石磐，結果有泉水tùi石磐中流出來。「瑪撒」ê意思是「試探」，用tī chia是teh指懷疑上帝ê意思。「米利巴」ê意思是「鬥爭」，指以色列人民kah摩西鬥爭，mā kah上帝teh鬥爭。

Tī曠野漂流ê「四十年」，以色列人民是一再經歷上帝奇妙ê作為，m̄-koh iáu是一再埋怨上帝，甚至iáu有過背叛上帝，鑄造金牛崇拜。

第11節thang參考民數記第十四章26到38節。背景是摩西派十二位以色列各支族代表去探視迦南地，結果去ê探á 回報告，其中有十個人一再講無法度入去，入去一定會死，若無，就是變成奴隸。只有猶大支族ê迦勒，kah以法蓮支族ê何希阿（後來改名成做約書亞）表示全力支持進入迦南地。Chit件事hō͘上帝大大傷心。結果決定hō͘年紀滿二十歲以上ê人，lóng死tī曠野，無法度進入應允之地迦南。