詩篇 94章1節 到 94章23節   背景資料  上一筆  下一筆
這是一首真特別ê詩歌,內容充滿哀歌ê韻味。Chit首詩篇m̄-nā有團體吟唱ê部分(第1到7節),mā有一個人ê哀歌(第16到23節),有智慧詞句ê詩歌(第8到11節),mā有訓誨ê詩歌(第12到15節)。

第1到7節,上帝是宇宙萬物ê創造者,因為án-ne,祂mā是一切受造物ê裁決者,詩人祈求上帝對hiah-ê「邪惡ê人」、「作惡ê人」、「殺害寡婦孤兒」、「寄居ê生份人」等hō͘ in嚴厲ê審判,因為chiah-ê人ê作惡,hō͘受tio̍h迫害ê人心生懍neh,m̄知該怎樣生存落去。因為chiah-ê人siōng 可惡ê所在,就是作惡殘害別人iáu「洋洋得意」,而且「誇耀」家己ê「罪行」,真是恬m̄知恥到極點。In會án-ne做,就是認為上帝看bē-tio̍h,就算看見mā bē關心chit種人間ê世事。這表示in傷害別人,並m̄是無注意,卻是故意殘害無辜ê性命,這是非常可惡ê心態,mā是藐視上帝ê一種方式。

第8到11節,chit段hông稱做是「智慧ê詩歌」。Tú好回應了第1到7節所提起邪惡ê人ê惡質行踏。Thang用句流行台灣ê俗語:「用腳頭u想就知影。」指出上帝既然創造ê人類有「耳á」、「目睭」,就是beh hō͘人聽見祂ê聲音,mā看清楚上帝ê道路。若是上帝造人有耳á、目睭,kám講上帝家己無目睭kah耳ámah?因為án-ne,上帝m̄-nā會聽,mā會看,而且會鑒察人心內ê意念,真清楚知影邪惡ê人所想ê一切。

第12到15節,chit段詩歌有真chiok厚ê訓誨、勸勉ê意思。第12節一開始就提起有上帝ê律法教導,是件真有福氣ê事,ná親像第十九篇7到11節ê詩人所講ê,會hō͘人ê性命更新,得tio̍h智慧仝款。有上帝ê律法,就會明白tī祂公正ê審判中,祂會kah祂ê子民同在,永遠bē棄sak,即使tī患難中,mā會保守祂ê子民享受「平安」。因為án-ne,只要是「正直ê人」lóng會知影維護「正義」,就是tī回應上帝ê疼。

第16到23節,chit段詩歌是屬tī個人ê哀歌,m̄-koh詩歌卻是充滿tio̍h堅定ê信心。詩人表示,若m̄是有上帝幫助,早就性命不保。上帝看顧被欺壓者ê性命,並且安慰心中操心ê人。上帝絕對不會kah chiah-ê邪惡ê人有任何來往,因為in所做ê事,lóng是上帝所討厭ê。M̄-nā án-ne,祂一定會消滅in。

第20節描述作惡ê人常使用ê手段,就是會「以律法掩護不義」,這mā是不時聽見ê一句「鑽律法漏洞」,á是故意編制不義ê律法,所講ê「惡法mā是法」,用chit種方式hō͘ in所行邪惡、殘害伊人生命ê事,有律法根據,成做合法。Chit種情形tī戒嚴時代、獨裁者ê身上lóng看會tio̍h。

重新查詢 專卷研經 詩篇系列
錯誤回報,請聯繫