詩篇 89章1節 到 89章52節   背景資料  上一筆  下一筆
Chit首詩篇kah第六十三篇仝款,lóng是為君王祈求祝福ê詩歌。Chit首詩歌有一個特色,就是用上帝kah大衛王之間ê「約」做基礎而寫做ê詩歌。因為án-ne,mā teh表明詩人心內ê期待:有án-ne ê一工,上帝會koh再像以前一般,疼以色列人民,ná親像祂以前疼大衛王仝款。Chit篇詩歌mā是第三集詩篇ê結束。

	第1到4節,chit首詩歌ná親像第八十八篇10到12節所提起ê,詩人期待上帝ê「慈愛」、「信實」,這兩項chiah是生存kah性命力ê來源。Á這兩項mā是Chit篇詩歌siōng中心ê主旨。上帝ê「信實」,所表示ê是上帝對所立之約堅守tio̍h,永bē改變。Ná親像伊ê慈愛仝款,是永bē改變ê。

	chia提起上帝kah大衛立約,chit-ê約是beh hō͘伊ê後代kiáⁿ孫lóng ē-tàng傳承王位,chit點mā是上帝透過先知拿單對大衛所講ê(參考撒母耳記下七:16)。

	第5到18節,這是一段歌頌ê詩歌,詩人teh o-ló上帝有真chē奇妙ê作為,chit種o-ló上帝ê聲音,連天kah地lóng會仝款用順服ê態度,表示in對上帝ê尊崇、頌讚。因為天kah地lóng是上帝所創造ê。Chit種偉大ê氣力,m̄是任何神明thang比並,像迦南人所崇奉ê「海怪拉哈伯」tī上帝打擊下,lóng kā無所遁形。

	詩人Tī chit段詩歌中特別強調,上帝治理ê國度,就是用「正義公道」做基礎,統治ê君王所做出來ê事,lóng會顯明上帝ê「信實慈愛」。Tī chit種國度之下ê子民,lóng是有福氣ê人,因為án-ne,唱出歡樂ê歌聲頌讚上帝,四界thang聽tio̍h。

第19到37節,chit段詩歌是kā第3到4節所講ê,koh-khah詳細敘述。

Tùi第19節開始,一直到第27節,chit段詩歌主要teh說明上帝tī萬民中揀選大衛,並膏立伊為以色列人民ê君王。上帝答應kah伊同在,並且賜hō͘伊力量。Siōng特別ê所在,是上帝賜hō͘大衛ê氣力khah贏過掃羅,hō͘大衛治理之下ê以色列國土疆域,tùi地中海直到幼發拉底河之寬闊。

第26到27節chit兩節,thang看出上帝kah大衛之間確實有特殊ê「父子」關係。

Koh講,是tùi第28到37節chit段詩歌,描述上帝疼大衛,chit種特殊ê慈愛,一直延續到伊後代ê kiáⁿ孫身上。上帝beh用「無變ê疼」kah大衛立chit-ê約,就是beh hō͘「伊ê kiáⁿ孫中有人kā永掌王權」。

值得注意ê是tī第30到32節,chit段詩歌中雖然提起講若以色列人民違背上帝ê律法誡命,上帝會因為in ê罪懲罰in,m̄-koh並無講beh改變chit-ê約,卻是懲罰,m̄-koh iáu是會hō͘大衛家族ê kiáⁿ孫繼續掌權,上帝bē收tńg來伊對大衛ê應允。這ē-sái講是上帝hō͘大衛非常特別ê恩典。

第38到45節,chit段明顯ē-tàng看出kah前一段大無相仝。Mā tùi chit段詩歌中看tio̍h以色列人民顯然已經陷入了痛苦ê境遇。原因是in知影家己違背上帝ê話,棄sak了kah上帝所立ê約。作者心中有種矛盾ê疑問:上帝既然揀選大衛王朝來管理祂ê子民,Án-ne,為甚麼會koh hō͘祂ê子民受難?

Tī第39節提起「王冠丟tī土腳」,chit句話真清楚講出國王已經hông掠去做奴隸。Tùi第40節看tio̍h這是teh指耶路撒冷城已經毀了,因為án-ne,這應該是tī巴比倫帝國攻陷耶路撒冷城了後,以色列人民慘敗kah慘痛ê境遇,in受盡所有ê恥辱。

第46到51節,詩人tùi悲傷中轉為懇切祈求上帝停止祂ê忿怒,祈求上帝kā以前hō͘ in大衛ê慈愛、信實ē-tàng koh一pái出現tīin ê身上,不beh hō͘ in繼續受tio̍h別人ê凌辱。

第52節,chit節是詩篇第三集ê結束,kah第四十一篇13節第一集,以及第七十二篇19節第二集等之結語仝款,lóng是歌頌上帝作結尾。

重新查詢 專卷研經 詩篇系列
錯誤回報,請聯繫