詩篇 87章1節 到 87章7節   背景資料  上一筆  下一筆
Chit首詩篇mā是被稱做「錫安ê歌」,kah第四十六篇、第四十八篇、第七十六篇、第八十四篇kah第一二二篇等,lóng是屬tī「錫安ê詩歌」。

Chit首詩歌非常特別,tī第4節講耶路撒冷會成做所有ê人ê中心城市,無koh有任何國籍、族群ê分別,大家lóng是屬tī上帝ê子民。Á chiah-ê人iáu包括tī歷史上kah以色列人民有極大衝突ê族群在內,mā lóng會是上帝聖城耶路撒冷ê「公民」。

第1到3節,chia kā耶路撒冷看做是上帝siōng愛ê城,因為tī chia有上帝ê聖殿,而且聖殿之內有約櫃。上帝透過約櫃顯現,並且向以色列人民講話。

第4到6節,chia提起巴比倫、非利士、泰爾,kah古實等國家,in lóng bat kah以色列人民對立,甚至統治過以色列人民。M̄-koh taⁿ lóng會臣服tī上帝ê治理之下,lóng tio̍h到耶路撒冷來敬拜上帝,成做上帝ê子民,kah以色列人民仝款,lóng是上帝手中名冊上有名ê子民。

第7節,koh一pái肯定耶路撒冷是性命ê中心,是hiah-ê人領受上帝賜福ê來源。

Chit種詩歌有一種異象:希望有án-ne ê一工,以色列會成做世界ê中心,所有萬民lóng kā聚集tī耶路撒冷──上帝ê聖城,向上帝敬拜。Chit種看法真接近先知以賽亞ê思想(參考以賽亞書二:2─3)先知彌迦ê預言中mā講出仝款ê話(參考彌迦書四:1—2)。

重新查詢 專卷研經 詩篇系列
錯誤回報,請聯繫