詩篇 80章1節 到 80章19節   背景資料  上一筆  下一筆
Chit首詩篇kah第七十九篇真類似,不過歷史背景卻無相仝,lóng是屬tī集體吟唱ê哀歌,是一首祈求上帝「復興」以色列人民ê詩歌。

第1到3節,「以色列ê牧者」,這是聖經作者一再表達ê方式,上帝就是祂ê子民ê牧者,祂ê子民就是上帝ê羊群(參考詩篇廿三:1、七十四:1、七十八:52,以賽亞書十四:30、四十:11,以西結書三十四:11—16,彌迦書四:8、五:4)。進一步koh認為君王、領袖等,lóng是上帝委託ê牧者(參考歷代志上十一:2,詩篇七十七:20、七十八:71—72,以賽亞書五十六:11,耶利米書廿五:34,以西結書三十七:24,撒迦利亞書十一:4)。

Tùi第2節詩句thang看出這是屬tī北國以色列ê詩。因為án-ne,真可能指ê是主前721年亞述帝國入侵撒馬利亞ê時代。

第3節提起「復興咱」,kah第7節、第19節等等節仝款,是chit首詩篇ê「副歌」。

第4到7節,chit句「萬軍ê統帥」tī詩篇中一再出現,tī chit篇就出現有四pái ê chē(參考第7、14、19節)。Tī先知ê文獻中,chit種方式稱呼上帝比較khah chē,特別是先知以賽亞、耶利米、撒迦利亞等特別chē。作者ài用chit種句話來表示,上帝是一個大有能力ê救主,óa靠祂就ē-tàng得tio̍h得救ê氣力。詩人tī chia祈求上帝拯救in,復興in,m̄-thang koh再hō͘仇敵「任意愚弄」in。

第8到13節,Tī chit段詩歌中,詩人用「葡萄樹」來表示以色列民族。講上帝就是tùi埃及kā chit棵葡萄樹帶出來,栽種tī新開墾ê土地頂面,chit種譬喻ê方式mā出現tī以賽亞書第五章1到2節。M̄-koh問題是這棵特選ê葡萄樹苗,長大後卻變了種,因為án-ne,hō͘上帝傷心,任它hō͘人踐踏。

第14到19節,詩人祈求上帝重新看顧這棵祂親自精選ê葡萄樹,重新栽培,hō͘伊茁壯起來。只要有上帝看顧、保守,in就ē-tàng興旺起來,祈求上帝顯示祂ê慈愛。

重新查詢 專卷研經 詩篇系列
錯誤回報,請聯繫