詩篇 72章1節 到 72章20節   背景資料  上一筆  下一筆
Kah詩篇第二、第一一○篇仝款,lóng是用tī國王登基時chūn唱ê詩歌。當然像chit種詩歌mā用tī新年為國王祝賀ê時唱ê。

Chit首詩歌siōng大ê特色是,時常提起sàn-chhiah人ê需要,親像第2節、第4節、第12節、第13節、第14等節。真有可能作者是出身sàn-chhiah ê背景,因為án-ne Tī chit首詩中,作者提出一個好ê君王ê理想:伊會照顧貧困,á是受tio̍h壓迫ê人,會守護in,hō͘ chiah-ê貧困ê人得tio̍h應該有ê性命尊嚴。其實chit種詩歌內容,mā是teh表明一個社會siōng基層人民心中ê聲音kah ǹg望。

頂面所講chiah-ê lóng thang tùi先知何西阿、阿摩司、彌迦、以賽亞,以及耶利米等in ê作品中看會出來,chiah-ê先知ê作品一再出現譴責統治者怎樣teh壓搾人民、圖利家己。因為án-ne,Tī chit首詩歌ê起頭,就出現詩人祈求上帝「Kā公正教導君王」,賜hō͘王子有上帝ê「公義」(參考第1節),會知影用「正義治理」上帝ê子民,而且會用「公道對待被壓迫ê窮苦人」(參考第2節),hō͘全國ê人民lóng ē-tàng「共嘗正義」,用「公平維護窮苦人」(參考第3節、第4節),tī伊掌權ê日子裡,國家、社會lóng知影國王伸張「正義」。這就ná親像申命記第十七章14到20節摩西律法中所提起ê,祭司tio̍h tī君王上任ê時,抄一份上帝ê法令hō͘君王知影,而君王tio̍h kā上帝ê律法誡命khǹg tī身邊,隨時the̍h起來閱讀、學習,知影敬畏上帝。因為一位敬畏上帝ê人, 一定會知影怎樣kā上帝ê話pái tī第一位。

koh講,chit首詩篇mā是詩人teh向上帝祈求,賞賜hō͘ chit種有上帝公義形像ê君王,tī伊治理之下,國家ē-tàng享受上帝特別ê恩典,m̄-nā是日月星辰ê運轉順利,也ē-tàng hō͘甘霖照時降落來滋潤大地草原(參考第5到7節),án-ne,土地就會盛產五穀,kui片山陵佈滿莊稼,收成豐富,án-ne,人民就ē-tàng生湠chē-chē,hō͘城市ê人口稠密,像野地滋生青草仝款chē(參考16節)。所謂「國泰民安」,to̍h是chit首詩篇ê主題(參考第7節)。

第18到20節並無屬tī chit首詩歌本來ê範圍,是chit首詩篇編者hō͘ in加添上去ê結語,用來表示詩篇第二集ê總結,kah第一集ê結語仝款(參考四十一:13)。


重新查詢 專卷研經 詩篇系列
錯誤回報,請聯繫