詩篇 53章1節 到 53章6節   背景資料  上一筆  下一筆
Chit-ê首詩篇除了第5節有無仝之外,其它ê lóng kah第十四篇仝款。Koh講,就是對上帝ê稱呼mā無仝款;tī現代中文譯本第五十三篇用「上帝」,原文是用「以羅伊」,tī第十四篇用「上主」,原文是「耶和華」。對上帝稱呼ê無仝,mā顯示時代背景有差別;「耶和華」,這是比較khah久遠ê名稱,而「以羅伊」ê名之文獻是比較khah晚。二者之間相差大約有兩百年時間。

第1節,chia所講ê「狂傲」,表示心中無上帝,á是根本m̄承認有上帝ê人。Chit種人就是kā家己當做上帝。Chit種人,siōng容易kā家己神化,認為家己所做ê事,lóng是正確ê。M̄-koh án-ne真危險。Tī chit種「狂傲」者身上,in就算去做「行善」ê事,mā bē是為tio̍h beh彰顯上帝ê疼,因為in根本就m̄相信有上帝。因為án-ne,in去愛人、做好事,lóng是為tio̍h beh hō͘人認bat伊、感謝伊。

第2到3節,上帝自有一套標準來衡量世事,m̄是照人類ê標準。Chit二個之間ê cheng差真大(參考以賽亞書五十五:8—9)。

「明智」,意思是「智慧」,而智慧,是teh指認bat上帝。

「善」,這是teh指上帝ê形像,chit種形像表明上帝對性命ê疼。
認bat上帝ê人會謙卑,知影家己有ê才能lóng是tùi上帝來賞賜,只有狂傲ê人會認為he是伊家己ê才華。

第4節,chit節是上帝teh指控chiah-ê狂傲ê人,óa靠家己ê才能,欺騙招搖,甚至認為上帝lóng m̄知道。其實不然,上帝深知in tī隱密處ê所做所為。

第5節,ná親像頭前已經講過ê,chit節kah第十四篇5到6節無相仝。Chit節真清楚講tio̍h,一個人平時lóng m̄相信有上帝,甚至藐視信上帝ê人。有一工tú-tio̍h困境ê時,in就會發見家己ê才能並無作用,chiah會tī心中生出「非常驚惶」,而且chit種驚惶是超過以往所經歷過ê,特別是當上帝進行審判ê時,in chiah驚覺原來是有上帝。Hit時,in就會感覺見笑萬分。

第6節,chit節講出以色列人民tùi巴比倫帝國奴隸之地得tio̍h釋放,thang tńg去故鄉重整家園,這就m̄是狂傲ê人有能力做得出來ê事。是上帝ê能力chiah有辦法。因為án-ne,屬tī上帝子民ê人,lóng會因性命ê得救而歡欣phut-phut-tiô。相對ê,只有狂傲ê人會感覺見笑。因為inchiah發見家己根本bē-tàng為力。


重新查詢 專卷研經 詩篇系列
錯誤回報,請聯繫