詩篇 42章1節 到 42章11節   背景資料  上一筆  下一筆
詩篇第四十二到七十二篇,是第二集。

詩篇第四十二kah四十三篇:原本是仝一個篇,tùi in ê最後一節thang看tio̍h仝款ê結語,真可能第四十二篇5、11節kah四十三篇5節,是「副歌」。

第1到5節,讀chit段詩歌,就會知影台灣基督長老教會台語聖詩第14首(新版聖詩210首)就是根據chit首詩篇寫做ê。

詩人表示心中對上帝ê渴慕,就ná親像嘴乾ê鹿期待lim到溪水。Tùi第2到3節thang看出,詩人真可能是流亡它國做奴隸ê時chūn,敵人teh恥笑伊,認為上帝已經m̄-chhap伊,chiah hō͘伊落魄到今á日án-ne失魂、艱苦心。

「你ê上帝tī tó位?」chit句詩歌mā出現tī第七十九篇10節、第一一五篇2節。Chit種句話mā出現tī上帝ê子民性命陷入困境ê時,身邊ê人不時提問ê問題。當仇敵án-ne問ê時,往往hō͘上帝ê子民無法度回答,hit種心內ê痛苦就koh khah劇烈起來。

第4節,就Tī痛苦中,詩人想起過去,hit種以歡欣歡喜ê心境去聖殿敬拜上帝ê日子,taⁿ lóng已經成做過去。這mā表示chit-má詩人是teh經歷tio̍h痛苦,無koh有chit種日子。往事只有ē-tàng成做回憶。

第5節kah第11節,以及第四十三篇5節仝款,lóng是結語,mā thang做「副歌」吟唱。Chit節是teh激勵家己,mā用來激勵kah家己仝款處境ê同胞。M̄-thang鬱卒,ài對上帝有信心。因為祂是拯救ê上帝。

第6到11節,chit段詩歌是chit首詩篇ê第二首。

前一首詩歌講詩人ê目屎夠額「lim食」當飯食,chit-má chia是講流落來ê目屎chē到ná親像「大水」、「瀑布」般ê流向「約旦河」。詩人用chit種方式teh表達心中艱苦心到極點。

第8節是chit首詩歌ê中心,詩人向上帝祈求,賞賜hō͘伊ê疼是永恆ê。Án-ne,伊就ē-tàng日夜頌讚上帝。

第9到10節,chit兩節詩歌thang對照第3節看,lóng是詩人teh表示心中ê痛苦kah孤獨、無力。因為敵人是一再正khau倒削譏笑伊。
第11節kah第5節仝款。

重新查詢 專卷研經 詩篇系列
錯誤回報,請聯繫