Chit-ê篇詩歌是屬tī詩篇中七篇懺悔詩歌之一，另外六篇是：第六篇、第三十二篇、第三十八篇、第五十一篇、第一○二篇、第一四三篇等。Tī詩中，詩人懇求上帝ê憐憫、赦免，伊燒熱切ǹg望ē-tàng得tio̍h上帝ê憐憫，其渴望之殷切，ná親像守夜ê人teh等待天光一般ê迫切。Kā chit首詩篇列teh進入聖殿敬拜ê詩集中，真有意思，主要是teh kā人民講，來到上帝ê聖殿敬拜，一定tio̍h先想一件事：如果上帝真正beh追究人ê罪過，有甚麼人ē-tàng逃得過？無！仝款ê，teh敬拜上帝ê教會內，如果上帝追究罪過，有甚麼人ē-tàng面對？因為án-ne，來到教會chit-ê信仰團體裡，無法度誇耀家己ê能力，á是展寶家己ê奉獻、服事有jōa-chē，上帝所賞賜ê恩典，遠大大超過人所ē-tàng回應上帝賞賜hō͘人ê恩典。

第1到2節，「絕望」，表示性命陷入siōng谷底ê狀況。詩人懇求上帝垂聽伊ê呼叫、哀號。Chia ê「絕望」mā thang做「海洋深處」，表示kah死亡只是一牆之隔hit種ê接近。

第3到4節，詩人講如果上帝「記錄」人所犯ê罪過，無任何人ē-tàng逃得過上帝ê懲罰。原因是聖經一再提起上帝手中有本冊子，記錄tio̍h每一個人ê性命腳跡，chit本冊子mā thang做是人ê「性命冊」來看（參考腓立比書四：3，啟示錄二十：12）。M̄-koh上帝憐憫祂ê子民，hō͘ in知影悔改、認罪，上帝就「赦免」in所犯ê罪過。

第5到6節，詩人表示因為上帝有豐富ê慈愛，因為án-ne，伊「仰望」上帝ê救恩，比守夜ê人「thèng候天光iáu koh khah迫切」，chit種迫切ê狀況，tī詩篇中不時用「日」kah「夜」連做伙來表示，mā說明he是時時刻刻無停止ê意思。

第7到8節，詩人呼籲以色列同胞，一定會「信靠上主」，因為上主有「無變ê疼」，chit種愛ná親像「豐盛」ê宴席，享受不盡。Chit種愛，是拯救ê氣力。