詩篇 127章1節 到 127章5節   背景資料  上一筆  下一筆
Chit篇kah第一二八篇chit兩篇詩歌lóng hō͘人認為是屬tī「智慧文學」作品ê詩歌,mā同時被看做是所羅門王所寫ê詩歌之一。Mā有人認為chit首詩歌是由兩首詩合併而成ê;一是第 1到2節,二是第3到5節。

第1到2節,chia ê「房屋」kah「城池」,分別teh表示家庭、國家ê意思。詩人beh傳達一個重要信息:一個家庭若是無上帝參與其中,人ê努力成果會ná親像泡影;國家若是無上帝保守看顧,tú-tio̍h強敵來入侵,即使堅固ê城池mā無法度守tiâu。續落來詩人就講出伊想beh講ê,人kui工ê勞碌,若無上帝ê賜福,所有ê勞碌lóng會白做無功。

上帝會賜「安眠hō͘祂所疼ê人」,chit句話清楚表示敬畏上帝ê人,伊所有ê勞碌lóng會得tio̍h上帝ê看顧、賜福,thang安心享受成果。Chia ê「安眠」表示安息ê意思,有上帝賜福ê安息,chiah ē-tàng得tio̍h新ê性命力。

第3到5節,詩人真清楚講出,「kiáⁿ」、「kiáⁿ孫」lóng teh表示延續性命ê意思,而chit種延續性命ê氣力是tùi上帝來ê賞賜,m̄是人ê努力就ē-tàng得tio̍h。

「戰士手中ê箭」,表示豐富ê性命力,thang進攻,mā thang用來防守用。因為án-ne,得tio̍h上帝賜福ê人,就會充滿chit種性命ê氣力,hō͘伊tī法庭(城門口,以前是人民訴訟,法官審案ê所在)kah對敵者對抗、爭辯,lóng bē失敗,因為伊有上帝所賞賜夠額ê智慧,知影án怎應對性命ê威脅。


重新查詢 專卷研經 詩篇系列
錯誤回報,請聯繫