腓利門書 1章1節 到 1章25節   背景資料
Chit張phoe是使徒保羅所寫ê書信中siōng簡短ê一封,只有短短25節而已。是寫hō͘歌羅西教會ê一位名叫腓利門信徒ê書信,主要是teh替腓利門厝裡一位名叫阿尼西謀ê奴隸懇求,希望腓利門ē-tàng因為耶穌基督ê緣故赦免伊逃亡ê罪刑。Mā tùi chit張phoe中thang看tio̍h使徒保羅真盡心ê替一位弱勢者參詳拜託,是真值得學習ê一門信仰功課。

第1節,ná親像使徒保羅寫hō͘以弗所教會ê書信中仝款,伊自稱是作耶穌基督ê「囚犯」,意思是teh指伊為tio̍h見證耶穌基督死去koh活ê信息,受掠入監獄。Chit點tùi第9節、第10節、第13節、第23節等等,koh一pái重複出現「囚犯」、「坐牢」等詞,就thang確定chit張phoe是使徒保羅tī監獄中寫ê。

Koh講,伊講chit張phoe是伊kah提摩太同齊寫ê,這表示伊寫chit張phoe ê時chūn,提摩太就tī伊ê身邊。M̄-koh mā有另外一個可能,就是腓利門認bat提摩太,而使徒保羅用提摩太ê名,是beh hō͘腓利門知影,伊kah提摩太對phoe內beh講起有關阿尼西謀ê事有共識。

第2節,chit節提供一個非常重要ê資料,就是腓利門ê厝已經是信徒聚會ê所在。Chit種聚會ê方式mā是早期教會siōng大ê特色,lóng是用家庭聚會ê方式開始教會chit種信仰團契。伊特別提起teh聚會ê信徒中有「亞腓亞姊妹」;伊真可能就是腓利門ê bó͘,而「亞基布」則in ê gín-á。因為阿尼西謀是in厝裡ê奴隸,所以in lóng關心此事件。而且chia用「服役」一詞,是因為使徒保羅ài kā傳福音如同在相戰仝款,表示in lóng是同齊為福音事工努力ê同伴。

第3節,這通常lóng是當時寫phoe ê一種禮貌,就是tī自我紹介了後,隨時有請安kah祝福ê話。

第4到5節,伊講每pái為腓利門祈禱,因為腓利門是一個真有疼心kah信心ê人。這真可能是伊除了提供家己ê厝當做聚會ê所在,並且tī每pái聚會了後供應愛餐。另外有一個可能,就是伊不時資助貧困ê家庭,hō͘貧困ê信徒thang得tio̍h溫飽,伊chit種ê疼心傳到使徒保羅hia去。

第6節,特別提起「仝一個信仰內面ê團契」,chit句話teh表明大家lóng是耶穌基督ê信徒,mā lóng相信獨獨信靠耶穌基督是koh活ê主。因為án-ne,chiah ē-tàng藉這kah耶穌基督「連結」,享受死去koh活ê「一切好處」。

第7節,koh一pái肯定腓利門tī疼心上ê美好見證。

第8節,tùi chit節開始直到第21節,使徒保羅chit段經文中講tio̍h伊寫chit張phoe主要目的,就是beh向腓利門提起有關阿尼西謀ê事。

第8到9節,使徒保羅講寫chit張phoe是為tio̍h一項「請求」,而且chit項請求是出tī心甘情願ê態度。換句話講,伊beh hō͘腓利門知影,伊m̄是因為腓利門請託而寫chit張phoe,mā m̄是因為某種私人ê利益chiah寫chit張phoe,而純粹是為tio̍h beh實踐耶穌基督ê疼。Chia伊特別提起家己雖然貴為福音ê「大使」,卻因為福音ê緣故而成做「囚犯」。這mā teh暗示腓利門必需要有仝款準備,無一定mā成做囚犯,m̄-koh可能會帶來損失。

第10節,使徒保羅講阿尼西謀乃是伊「tī基督裡ê kiáⁿ」,是「靈性上ê老父」。Chit種方式ê譬喻說明一件事:信仰kah性命相連。Chia用來表明伊kah阿尼西謀ê性命是連結做伙,無法度分離。

第11節,chit節真有意思,原因是使徒保羅講阿尼西謀逃離腓利門ê厝了後,就成做一個「無甚麼路用」ê人,原因是逃離ê奴隸ná親像一個逃犯仝款,即使koh再kā伊掠去奴隸市場販賣,mā bē賣到好價錢。使徒保羅講過去阿尼西謀對腓利門看起來「無甚麼路用」,m̄-koh chit-má則對腓利門kah使徒保羅lóng有「路用」à。Chit-ê「路用」一詞,tú好就是阿尼西謀名ê意思。使徒保羅án-ne講,siōng主要就是beh hō͘腓利門明白,阿尼西謀改變了,而且是變kah kah過去無仝款à。伊希望腓利門會重新hō͘阿尼西謀一pái機會。

第12節,使徒保羅提起chit張phoe ê主題,就是beh kā阿尼西謀送tńg去iáu hō͘腓利門。Chia使徒保羅用「送tńg去」,chit-ê詞原本是由兩個動詞合併做伙ê複合動詞。第一個動詞是「ana」,意思是teh指「回覆」,另外一個動詞是「pempo」,意思是teh指「轉呈」。Án-ne意思就是teh指一個屬下kā一個案件轉「呈」到上級去。這就有真特別ê意義了,表示使徒保羅並無想beh指導腓利門怎樣處理阿尼西謀,卻是由腓利門家己決定該怎樣辦。意思就是伊會完全尊重腓利門ê意見。

使徒保羅續落來講阿尼西謀是帶伊ê「心」同齊去ê,這就是teh向腓利門暗示,阿尼西謀ná親像teh代表伊仝款,而伊願意用性命擔保阿尼西謀確實是無仝款à。

第13到14節,使徒保羅一直認為得tio̍h福音ê人,lóng對傳福音hō͘伊ê人欠tio̍h「福音債」,而還「福音債」siōng好ê方法,就是kā福音koh再傳hō͘別人,若無,就會欠福音ê債便jú chē。伊強調阿尼西謀是已經替腓利門還了這筆「福音債」,m̄-koh伊無希望chit種講法hō͘腓利門感覺被強求,因為án-ne送tńg去阿尼西謀,hō͘腓利門家己決定這筆福音債ê還方式。

第15節,使徒保羅提出新ê看法,認為阿尼西謀雖然bat擅自逃離,看起來kah-ná是一種損失,m̄-koh chit-má阿尼西謀「甘願」tńg去侍奉腓利門,必定比以前伊iáu未得tio̍h福音ê時,koh khah努力tī奴隸ê角色kah工作上,而且bē koh再逃離,會是一個koh khah可靠ê奴僕,án-ne對腓利門來講的確是一件koh khah好ê報償。

第16節,這是chit張phoe siōng重要ê一節。使徒保羅希望腓利門接納阿尼西謀ê時,m̄-thang koh再kā伊看做是奴隸,是kā伊看做一個信仰內面ê兄弟。這真清楚teh表示:腓利門kah阿尼西謀tī信仰上lóng是使徒保羅ê「kiáⁿ」,in當然就是「兄弟」à。其實,這mā是使徒保羅beh提醒腓利門ê一點,因為tī腓利門ê厝提供給信徒聚會,而且阿尼西謀thang幫助腓利門分擔福音ê事工。

第17節,chit節mā是teh回應第12節所講ê,使徒保羅講阿尼西謀tńg去,ná親像帶伊ê「心」去腓利門hia仝款。Tī chia,伊進一步講,接納阿尼西謀就等於接納伊仝款。因為伊kah阿尼西謀tī信仰上ná親像「父子」,是分bē開ê。

第18到19節,真有可能阿尼西謀會逃離腓利門ê厝,是kah伊做甚麼錯事有關,而tùi chia所提起ê「虧欠」ê用詞來看,可能就是teh指金錢á是財物上ê「欠」。使徒保羅講伊願意負責賠償這部分ê債務。不過,tī chia使徒保羅提醒腓利門mā欠伊ê債,就是福音ê債。因為福音乃是kah性命有關ê「財產」。換句話講,使徒保羅認為阿尼西謀若是欠腓利門ê「金錢」之債,he是身外ê物,而腓利門欠使徒保羅ê債,則永恆性命ê債。兩個之間ê大細、chē少一目了然。

第20節,使徒保羅講「咱lóng是基督內面ê兄弟」,chit句話講出kui個教會信仰團契ê意義,就是大家tī教會內,就ná親像一個大家庭裡ê兄弟姊妹仝款,無甚麼人是甚麼人ê主人、奴僕ê位階cheng差。

第21節,伊表明對腓利門有清楚ê認bat,mā相信腓利門會聽從伊ê指導。因為chit-ê緣故,伊「chiah寫chit張phoe」,並且深信腓利門會用koh khah chē ê疼來接納阿尼西謀tńg來到身邊。

第22節,當使徒保羅寫chit張phoe ê時,可能想tio̍h koh過無久就ē-tàng出獄tńg去,án-ne就ē-tàng去探望一下腓利門,tùi án-ne,伊ài腓利門替伊準備一個房間,chit種寫法對腓利門來講mā是一項極大ê鼓勵,因為當時大家lóng感覺接待使徒保羅,是一項光榮ê事,thang接待上帝忠實ê奴僕,就是一件甜美ê事。

第23節,「以巴弗」,可能是開拓歌羅西、老底嘉,kah西拉坡里等三間教會ê一位忠實之福音奴僕(參考歌羅西書四:12—13)。伊chit時真可能就是陪伴使徒保羅tī監獄中,因為án-ne,伊講「kah我同齊坐牢」。

第24節,chia提起同工「馬可」,這是teh指約翰‧馬可,伊原本是Tī使徒保羅第一pái旅行傳道ê時,由巴拿巴推薦同行ê伙伴(參考使徒行傳十三:5),後來m̄知何故半途離開(參考使徒行傳十三:13),使徒保羅bat為tio̍h án-ne事大大受氣(參考使徒行傳十五:37—38)。chit-má chia koh出現,表示伊koh加入使徒保羅ê行列,後來得tio̍h使徒保羅ê o-ló(參考提摩太後書四:11)。

	Á「亞里達古」則帖撒羅尼迦人,mā是使徒保羅ê好同工(參考使徒行傳十九:29、二十:4,歌羅西書四:10)。

	「底馬」,後來Tī使徒保羅寫hō͘提摩太ê書信中,bat提起伊「貪愛現世」,離開使徒保羅,家己到帖撒羅尼迦去。Tī chia,伊則kah使徒保羅同工ê。

	「路加」,伊是一位醫生,一直是使徒保羅傳福音ê時ê好幫手,真少離開使徒保羅(參考提摩太後書四:11)。

	第25節,ná親像tī頭前已經提過ê,使徒保羅遵照當時寫phoe ê方式,tī結束ê時koh一pái祝福收phoe ê人。


重新查詢 專卷研經 腓利門書系列
錯誤回報,請聯繫