民數記 25章6節 到 25章18節   背景資料  上一筆  下一筆
Chit段經文強調引誘以色列人民犯姦淫罪ê就是米甸ê cha-bó͘人,有幾種對chit段經文ê看法:一teh表示對前段描述以色列人民犯姦淫罪ê解說,因為以色列人民一再犯姦淫,而且雖然有處置,人民iáu-koh不聽,結果koh因為án-ne帶來瘟疫ê懲罰á死去二萬四千人。二是說明以色列人民tī chit所在khiā起ê時間khah長些,就已經看見in kah當地人混合做伙,並且學會曉了in ê宗教信仰kah生活行為。結果帶來ê是koh khah大ê災難。三是teh說明祭司ê角色真重要,ná親像出埃及記第三十二章描述以色列人民鑄造金牛去拜,背叛上帝,是利未支族ê人進行潔淨ê舉動,chiah避免災難擴大。chit-má是祭司非尼哈kā誘惑以色列人民犯姦淫ê cha-bó͘人刣死。

第6到9節,tùi第6節thang看出有一個名叫「心利」ê以色列人(第14節),竟然敢公然tī摩西kah眾人面前帶米甸ê cha-bó͘人進入帳棚行淫,chit時chūn,tú好是大家chiah teh為前次因為淫亂罪á遇tio̍h死刑處置ê領袖哀傷,卻有人iáu敢án-ne囂張行踏,表示以色列人民脫序ê行為jú來jú嚴重。祭司非尼哈決定beh潔淨chit-ê tāi-chì,m̄准有chit種事發生,因為án-ne,伊tòe這兩人ê背後進入帳棚,kā chit兩個人殺害,阻止以色列人民繼續犯罪ê行為。M̄-koh為tio̍h án-ne件淫亂ê事,以色列人民付出相當大ê代價,遇tio̍h瘟疫ê打擊有二萬四千人死去。

後來使徒保羅引用chit段記事,勸勉哥林多教會信徒bē-tàng信了耶穌了後,iáu繼續kah當地人仝款teh過淫亂無清氣ê信仰生活,因為tī chit-ê事件中有「二萬三千人倒斃」(參考哥林多前書十:8),tī數字上kah民數記chia相差有一千人。其實,重要ê m̄是tī數字正確á無,卻是tī行為準則。

第10到13節,chit段經文說明上帝喜愛亞倫ê祭司家族,肯定非尼哈所代表ê家族,chit-ê家族當祭司絕對不容有任何懷疑。後來mā一再提起非尼哈kah伊ê家族ê人tī以色列民族中佔有真重要ê角色kah地位(參考民數記三十一:6—12,約書亞記廿二:13、30、32,士師記二十:27—28)。詩人講因為非尼哈ê潔淨動作,lóng受後代以色列人民ê記念(參考詩篇一○六:28—31)。

另外一方面,chit段經文mā回應了第1到5節ê事件,表示以色列人民絕對bē-tàng kah迦南地ê宗教行為仝款,一定tio̍h嚴格區隔出來。因為迦南地ê宗教信仰有嚴重ê淫亂現象。

第14到15節,chit兩節紹介西緬kiáⁿ孫中ê一個族長,á hit位米甸cha-bó͘人mā是出身首領ê cha-bó͘-kiáⁿ。這lóng teh表示犯罪者,m̄是一般人,卻是領導階層者,chit種領導者敢án-ne帶頭犯罪,若無hō͘ in嚴格而且馬上處置,真容易hō͘ kui個以色列人民陷入紀律敗壞ê行為,kah迦南人無分別。其實這mā是teh表示:chit件事m̄是單獨個人行為,卻是kui個部落ê集體行動,chiah會因為án-ne淫亂事件致使集體死亡ê慘痛結果。

第16到18節,chit段經文主要teh說明以色列人民kah米甸人之間ê衝突ê原因。

重新查詢 專卷研經 民數記系列
錯誤回報,請聯繫