彌迦書 3章1節 到 3章12節   背景資料  上一筆  下一筆
續接第二章13節所提起ê,上帝kā親自牧養祂ê子民,beh帶領in重新tńg來到自由,teh過快樂、充滿性命力ê日子。相對ê,tī chit第三章則清楚指出以色列人民會墮落ê原因,to̍h是kui個社會充滿tio̍h虛假,chiah-ê lóng kah當ê時社會ê領袖有密切關係,包括君王(統治者)kah宗教領袖(先知),in lóng m̄真實,卻是專門做欺騙ê工作帶來ê結果。

    Tī先知彌迦之作品中就thang發見kui個社會充滿tio̍h假先知,in ê特色to̍h是為tio̍h beh「飼腹肚」而講假預言,講坦白to̍h是kā先知ê工作當做一種職業,chit種先知是只ài有人出錢,伊就講in歡喜聽ê話,只為tio̍h beh討好人。這to̍h是先知阿摩司ê時代所tú-tio̍h ê情景(參考阿摩司書七:14—15)。Thang án-ne瞭解:真正先知,並m̄是家己想當先知to̍h是先知,先知mā無法度靠學習變成先知。先知是傳講上帝ê信息,所以上帝會親自啟示祂所揀選ê奴僕先知。若無得tio̍h上帝ê啟示,卻假借上帝ê名義發表任何言論,chit種人to̍h是屬tī假先知。假先知會行神跡奇事(參考馬太福音七:21—23),m̄-koh m̄-thang bē記得,in所傳講ê話kan-taⁿ會迷惑人心遠離上帝而已,對人ê性命是m̄是得救並無甚麼意義thang講。

第1節,先知彌迦有真強烈ê聲音teh譴責當ê時ê社會已經失去公義。Tī第二章1到2節伊指出當ê時hiah-ê有權勢ê貴族、達官顯要,看tio̍h歡喜ê土地、房屋,就想出所有ê辦法beh侵佔,mā因為án-ne,所以「無一個人ê家庭á是財產是安全ê」(參考二:2b)。現先知彌迦講一個統治者應該提供「正義」ê原則。所講「正義」,簡單地講to̍h是「公平」,大家tī上帝面前lóng仝款有性命ê尊嚴。

第2到4節,chit段經文thang清楚看出先知彌迦指出伊看見ê景象,to̍h是司法人員所做出來ê,ná親像活活地kā人ê皮「剝」落來,kā chit種人ê肉「剔下」khǹg入去鍋裡煮,mā像殘酷ê屠夫「phah碎」了人ê「骨頭」仝款ê惡質。先知彌迦真清楚指出,chit種人無論怎樣祈禱,上帝lóng bē聽,因為in m̄-nā無替受冤屈ê人伸冤,反卻是趁機會欺負弱勢者。因為上帝是公義ê,祂bē眼睜睜地看tio̍h祂ê子民受tio̍h欺壓而不聞無問。

第5到6節,chit段經文是針對hiah-ê專門迷惑上帝子民ê假先知而傳出上帝beh懲罰in ê信息。Tī chit段經文中,先知彌迦提起有kóa先知是為tio̍h混一嘴飯就亂講話,chit種先知to̍h是名符其實ê假先知。Chiah-ê假先知會用「戰爭恐嚇」人民,只因為為人民無想beh供養in。M̄-koh上帝對付chiah-ê假先知ê方式,to̍h是hō͘ in koh khah án怎都無「好日子」thang過。M̄-nā án-ne,mā bē有「異象」thang看,而且「講bē出預言」。Chiah-ê lóng teh表示上帝已經棄sak chiah-ê人,因為chiah-ê假先知竟然是用占卜、巫師用預測ê方式,試beh明白性命是m̄是安危,上帝就用懲罰chiah-ê巫師kah占卜ê人所得tio̍h ê懲罰仝款,hō͘ in「蒙羞」。

    第7到8節,chit兩節tú好呈現對比;tī第7節講hiah-ê假先知á是行巫術ê人,必定聽bē-tio̍h上帝tńg來應in ê話kah祈禱,因為in是欺騙上帝子民ê人,上帝當然bē聽in ê祈禱。Á第8節則先知彌迦明確表示家己ê身分—上帝ê奴僕,有上帝ê靈kah伊同在。先知彌迦講家己充滿tio̍h「主ê靈kah 能力」,先知以賽亞bat傳出上帝揀選祂ê奴僕ê時,會以祂ê靈充滿被揀選ê人(參考以賽亞書四十二:1)。有上帝ê靈充滿ê人,必定會充滿「正義感kah勇氣」,會明確地指出人民ê錯誤,所犯ê「罪」。卻m̄是kan-taⁿ會講咱人歡喜聽ê話。Hō͘徒保羅就講伊不講「諂媚ê話」,「免討人ê歡喜,只求取悅hit位察驗」人心ê上帝(參考帖撒羅尼迦前書二:4—6)。

    第9到11節,chit段話koh一pái tńg來到南國iáu大ê執政者身上;先知彌迦kā伊譴責們胡作非為ê事實。先知彌迦Tī chit段預言中就真清楚指出南國iáu大ê官員ê問題,to̍h是in侮辱上帝ê名,因為in並無按照誠實來治理國家,卻一koh再以污穢、lah-sap ê手段teh侮辱上帝ê名。咱tī chit段經文中看tio̍h幾件恐怖ê行為:一是:憎惡正義、顛顛倒是非(第9節);二是:tī耶路撒冷城有殘酷刣戮ê行為,是暗刣ê行踏,是非法ê,無經過公平審判ê(第10節);三是:法官接受o͘-se,這是顛顛倒是非ê主要因素(第11節a句);四是:宗教領袖敗pháiⁿ了信仰基礎-—kan-taⁿ知影圖謀財利(第11節b句)等。當先知彌迦指出南國iáu大官員有頂面所講chiah-ê問題了後,隨時指出上帝teh beh毀滅chit種國家,準講in用「上帝之城」所稱呼ê耶路撒冷城mā仝款,因為in已經kā上帝ê城變成刣害無辜ê性命ê城。Ná親像瑪the̍h西王所做仝款ê惡事,引起上帝ê忿怒(參考列王記下廿一:16)。

    第12節,「錫安山kā像田地被翻動;耶路撒冷會變成廢墟」,chiah-ê後來lóng tī主前586年巴比倫帝國攻入耶路撒冷了後驗證à。

重新查詢 專卷研經 彌迦書系列
錯誤回報,請聯繫