第12節講「耶穌進入聖殿」，參考約翰福音第二章14節就會清楚，he是指聖殿ê外院，是所有民眾thang聚集ê所在。Tī chit-ê外院ê所在設有兌換錢幣kah販賣粉鳥ê攤位，為tio̍h方便外地tńg來ê猶太僑民到聖殿獻祭kah奉獻時ê需要，chiah-ê攤位lóng是由聖殿ê祭司teh掌管。耶穌會kā chiah-ê攤販lóng推倒，是因為祂認為chiah-ê攤販有欺騙ê行為，已經污衊了聖殿ê聖潔，hō͘聖殿變成「賊窩」。伊引用以賽亞書第五十六章7節，認為聖殿原本是beh「作祈禱ê殿」，這表示聖殿是kah上帝對話ê所在，怎樣ē-tàng有欺騙ê心á是行為？若此，ná會敢koh進入聖殿面對上帝？