瑪拉基書 1章1節 到 1章14節   背景資料  下一筆
Tī舊約聖經中最後一本經冊就是瑪拉基書,tī宗教改革後chiah kā chit本經冊編輯tī舊約聖經中最後一本,這可能是因為先知瑪拉基是舊約先知中khah晚期ê一位先知。Tùi伊所傳達ê信息來看,thang明確知影ê是chit位先知可能是tī主前第五世紀出來傳講上帝ê信息,kah所羅巴伯、尼希米、以斯拉、哈該、撒迦利亞等人真可能是同時代,tī時間上真可能比in lóng tio̍h早一點á。

    Ná親像頭前紹介chit本經冊有提起ê,chit本經冊編撰ê特色,就是用人kah上帝之間ê對話方式,真類似哈巴谷書ê樣式。Chit章開始就是chit種編撰形式。值得注意ê是chit章特別針對祭司傳出上帝ê信息,認為連祭司lóng用輕視ê態度teh看獻祭ê事,若án-ne,以色列人民koh ná會對敬拜禮儀ê事重視?不可能。所以先知瑪拉基真無客氣地傳出chit種信息:上帝beh拒絕聽祭司ê祈禱。

第1節,chia開始講「上主交帶瑪拉基轉告以色列人民ê信息」,chia ê「交帶」,mā thang當做「啟示」解釋。Koh講,這「交帶」一詞ê原希伯來文是「masha」,chit-ê字tī以色列人民ê意思是「負擔」,這表示上帝「交帶」某一個個人一件事,chit件事就成做被交帶者ê一種「負擔」,意思就是無法度拒絕m̄做,m̄-koh做卻無一定討人歡喜,koh khah可能會為家己帶來麻煩。「瑪拉基」chit-ê名ná親像第三章1節所提起ê是上帝差派ê「使者」。Á上帝ê使者主要ê工作,就是忠實地kā上帝所交帶ê話傳達出來(參考列王記上廿二:14),á是真確ê完成。

第2到3節,tùi第2節開始出現「問」kah「答」ê特色。Chit節mā顯示出上帝kah以色列人民之間發生bē爽快ê事。

開始上帝表示伊「一直愛」tio̍h以色列人民。Á以色列人民卻用懷疑ê句話問上帝「怎樣表現」對in ê疼。Chia所用ê「疼」字,是teh指含有「契約」ê疼,而這「契約」指ê就是「揀選」。上帝揀選雅各,並且kah伊立約,這就是先知瑪拉基信息裡所講ê「疼」ê意思。所以chia講上帝ê回答是伊偏愛「雅各」,贏過愛「以掃」。雖然「以掃kah雅各是兄弟」。M̄-koh上帝卻「憎惡以掃」。Á chia「憎惡」一詞,用使徒保羅ê觀點,就是上帝用「揀選」ê方式來表示(參考羅馬書九:10—13)。使徒保羅引用ê目的khah強調上帝揀選ê要件,並m̄是根據人ê條件,卻是有上帝ê主權tī其中。上帝ài怎樣揀選,he是上帝teh決定,m̄是人thang質疑ê(參考羅馬書九:10—18)。

第4節,當以東人m̄信in ê國家會hō͘上帝嚴懲而被敵人摧毀ê時,上帝ê回答是講以東chit-ê「罪惡ê國」,並且講「上主永遠惱怒ê人民」,這一定tio̍h tùi歷史層面去瞭解,tī主前587年當巴比倫帝國teh包圍猶大耶路撒冷城ê時,以東chit-ê親兄弟,並無出兵協助猶大ê同胞,反tńg幸災樂禍、恥笑in,這mā是詩人向上帝提出控訴ê原因(參考詩篇一三七:7,耶利米哀歌四:21—22)。Á koh khah嚴重ê,恐驚就是先知俄巴底亞所控訴ê,以東人做兩件siōng bē-tàng原諒ê事,其一就是kah敵人仝款,進入耶路撒冷城內掠奪以色列人民ê財產。其二是故意在耶路撒冷城門口,堵住hiah-ê想beh逃離災難ê以色列人民,甚至替敵人掠hiah-ê想beh逃難ê人,這是引起上帝大憤怒ê惡質行為(參考俄巴底亞書)。

第5節,先知瑪拉基講上帝ê審判必定會實現,hō͘以色列人民「親眼看見」上帝懲罰以東人,而確信上帝是萬軍ê統帥,全世界lóng是屬tī祂ê。

第6節,tùi chit節開始,直到第二章9節止,lóng是teh討論祭司奉獻態度ê問題。Chit節真清楚提出祭司ê問題是in根本「不尊敬」上帝,上帝直接講出祭司「藐視」上帝。Chia先知瑪拉基用兩個譬喻:一是上帝kah以色列人民ê關係,ná親像父子。二是ná親像主僕。所講「不尊敬」,thang講是用潦草隨便ê方式獻祭。Tī chiah-ê祭司ê心中並無存「敬畏」ê心。

所講「藐視」,thang tùi摩西律法看見有真chē嚴格ê規定,一個祭司beh進入上帝ê祭壇前,一定tio̍h先沐浴潔淨家己ê身軀、腳手,了後chiah thang進入祭壇(參考出埃及記廿九:4、三十:19—21)。摩西律法會訂定chiah-ê規矩ê原因只有一點:希望以色列人民teh敬拜上帝ê時,ē-tàng專心、真實。講白些是眾祭司並無看重敬拜上帝ê事,照規矩來進行獻祭ê禮儀,卻是以隨便應付ê態度辦理人民獻祭ê禮儀。

第7節,先知瑪拉基提出koh khah具體ê事證來說明以色列祭司ê墮落kah錯誤ê態度。Chia提起所講「藐視」ê態度,就是kā「污穢ê食物」當做獻hō͘上帝ê物件。所講「污穢」指ê是無清氣ê物件,這tī後來以色列人民發展出koh khah詳細ê規定,說明甚麼是無清氣?有四個要件:

一是teh指過期ê物件,mā就是無新鮮ê。

二是用無清氣ê動物,á是teh煮食祭物ê時參雜了無清氣ê食物tī內面。

三是hō͘無清氣ê人摸過ê物件。

四是已經腐pháiⁿ ê食物。
Tī利未記第十一章有真清楚ê規定toh一kóa是潔淨kah無清氣ê物件。所以身為祭司應該lóng真清楚甚麼是潔淨、甚麼是無清氣。

第8節,chit節講獻祭ê動物有「chheⁿ-mê、跛腳、破病ê cheng-seⁿ帶來」獻hō͘上帝,這實在是真過份ê事。Á chit種態度根本就是無kā上帝放tī眼內,這就是「藐視」ê意思,koh khah免講所講「尊敬」á無ê問題à。
先知瑪拉基提出chit種問題:tio̍h用色列人民想看看in是m̄是會kā有殘缺ê cheng-seⁿ當做禮物帶去送kā in賜福ê「官長,看in歡喜無歡喜,領不領」in ê情,了後chiah來kah上帝談chit件奉獻ê事。

第9節,先知瑪拉基特別強調講,無論祭司怎樣向上帝祈禱,lóng是無用ê,因為上帝根本「bē垂聽」in「祈禱」ê聲音,原因真簡單,就是in既然褻瀆上帝在先,用跛腳ê、有殘缺ê cheng-seⁿ獻tī祭壇上,án-ne對上帝hiah-ni̍h無尊敬、藐視,然後又ài向上帝祈求「施恩」憐憫,上帝怎樣可能會聽?

第10節,「Kā聖殿ê門關起來」,因為上帝kā拒絕接納in tī祭壇所獻ê祭物,因為hiah-ê所獻ê物件並m̄是潔淨、好ê。Tio̍h注意ê一點,就是先知瑪拉基所講ê chiah-ê有殘缺之cheng-seⁿ,並m̄-nā kan-taⁿ是teh指表面上ê「chheⁿ-mê、跛腳、破病」等,而且mā有koh khah深ê含意,表示從來m̄-bat正當ê手段所得tio̍h ê物lóng是。先知瑪拉基mā清楚表明上帝「無歡喜in」,這是真嚴重ê一件事,特別是對以色列人民來講,明明是就是一件無法度接納ê大事。
第11節,tú好kah第10節呈現出強烈ê對比;第10節講以色列人民並m̄是真心敬拜上帝,連獻祭物件lóng是hit種lah-sap、殘缺不全。M̄-koh相對ê,tī以色列以外ê地區,人民是hiah-ni̍h-á歡喜用真實ê心敬拜上帝,獻siōng好ê禮物hō͘上帝,以表示對上帝ê尊崇。真自然tek,上帝會「垂聽ná敬拜伊、並實行祂旨意ê人」(參考約翰福音九:31)。

第12節,chit節真清楚teh譴責chiah-ê祭司,家己先污穢上帝ê祭壇,soah koh推卸責任講祭壇本來就是lah-sap ê。先知瑪拉基指出,chit種態度就是tī「褻瀆」上帝ê神聖。

第13節,chia講出祭司行為koh khah嚴重ê問題,明明知影he是「偷來ê、跛腳ê、破病ê動物」,卻iáu kā它當做祭品「獻hō͘」上帝。這真清楚teh說明祭司kah以色列人民勾結,用不正當方法得tio̍h ê物件,當做獻祭品hō͘上帝,m̄-koh he m̄是奉獻,ná已經是teh褻瀆上帝ê神聖à。

第14節,chit節進一步指出祭司「不誠實」ê心,就是用色列人民並無照所下ê願來回報上帝ê慈愛,這已經是違背摩西律法所規定ê(參考申命記廿三:21—23)。Chit種態度所奉獻出來ê物件,就是不誠實。只要是不誠實,無論奉獻ê是甚麼,lóng是teh欺騙上帝。欺騙上帝ê人等於是「Pián仙á」,就是犯罪了,是「該受詛咒」。


重新查詢 專卷研經 瑪拉基書系列
錯誤回報,請聯繫