利未記 25章35節 到 25章38節 背景資料 上一筆 下一筆 |
Chit段經文是非常人道ê律法規定,即使tī今á日,mā無chit種律法出現。 第35節,任何以色列人民有義務kah責任幫助sàn-chhiah到無法度維持生活ê同胞。這m̄是關係愛心ê問題,卻是應盡ê責任。 第36到37節,借錢hō͘家己ê同胞,bē-tàng索取利息。Á賣糧食,mā bē-tàng索取無應該有ê利潤。Chiah-ê lóng是為tio̍h beh hō͘ hiah-ê sàn-chhiah ê同胞有生存空間。Án-ne,就bē有高利貸、地下錢莊ê出現。後來,申命記小khóa做修改,講借錢á是物件hō͘家己ê同胞bē-tàng計算利息,m̄-koh借錢hō͘外族人,就ē-tàng計算利息(參考申命記廿三:19—20)。 第38節,會有chit種規定,就是kah in tī埃及當過奴隸有關,hit時,in一無所有,是上帝賞賜hō͘ in,in chiah富裕起來。因為án-ne,想tio̍h今á日有人困苦,就當想tio̍h家己過去tī埃及做奴隸ê時,bat仝款困苦。 |