利未記 21章1節 到 21章9節   背景資料  上一筆  下一筆
Chit章kah第廿二章lóng是講tio̍h有關祭司應該tio̍h遵守ê條例,á這第廿一章主要teh強調祭司ê聖潔行為。因為祭司teh代表以色列人民獻祭hō͘上帝,因為án-ne,若是祭司無遵守聖潔ê條例,就會teh獻祭ê禮儀上隨便,á是無夠忠心,án-ne,延伸出來ê必定會hō͘以色列人民teh敬拜上帝ê事頂面輕忽,不慎重,甚至會棄sak上帝去拜偶像,chit種情形後來teh進入迦南地一段時間後就出現。因為án-ne,對祭司有嚴格ê要求是正確ê,因為in是以色列人民宗教信仰ê領導者。

因為以色列人民認為屍體是無清氣ê。因為án-ne,除非是kah祭司為仝一個家庭中ê關係者,若無祭司是bē-tàng摸tio̍h任何屍體ê。會有chit種限制,lóng是圍tī一個基本思維:上帝是聖潔ê,因為án-ne,事奉ê祭司mā一定tio̍h聖潔。保持聖潔就beh先tùi生活上siōng可能tú-tio̍h,而且會致使祭司tī祭祀禮儀上有無清氣ê事開始注意,喪禮就是其中siōng直接,siōng容易tú-tio̍h,mā是siōng需要特別注意ê事。

第1到4節,chia真詳細寫出容許祭司參與葬禮ê對象,包括有「父母、kiáⁿ、兄弟,á是未出嫁ê姊妹等近親」,m̄-koh bē-tàng「參加姻親ê葬禮玷污了家己」。

第5到6節,tī第十九章27到28節就已經有清楚記載,bē-tàng tī親人往生ê時,有chit種「剃頭、修鬍鬚,á是割家己ê身軀」等行為來表示哀悼,真可能因為he是迦南地人民ê風俗。特別是割傷家己ê身軀,真chē民間宗教會有chit種行為,表示有神力附身,ná親像台灣廟會中ê童乩。這tī耶和華宗教信仰中是嚴厲禁止ê。

第7到9節,祭司tī性行為上一定tio̍h嚴守聖潔規定,mā就是tī婚姻生活上一定tio̍h絕對忠實,因為祭司是代表以色列人民敬拜上帝,á上帝kah以色列人民之間有ná夫妻一般,需要絕對忠實。

Chit種忠實,包括祭司cha-bó͘-kiáⁿ ê工作mā是仝款,絕對bē-tàng有人去做妓女。其實,m̄-nā是祭司ê cha-bó͘-kiáⁿ bē-tàng淪為妓女,包括一般人民ê cha-bó͘-kiáⁿ mā lóng tī禁止之列(參考十九:29)。因為若是做妓女,就真容易成做廟妓,tī廟宇中服事迦南地ê人,這等於侮辱上帝子民ê聖潔記號。Chia真清楚規定,若是發見祭司ê cha-bó͘-kiáⁿ成做妓女,就beh用火燒死伊。

重新查詢 專卷研經 利未記系列
錯誤回報,請聯繫