利未記 17章1節 到 17章9節   背景資料  上一筆  下一筆
Chit段經文是利未記ê第二部分,被稱做「聖潔ê法典」。Tī chit-ê十章中,lóng是用「耶和華上帝講,lín聖潔,因為我是聖潔ê」chit種話句為主軸,論述整部「聖潔ê法典」ê內容。

聖潔,有另外一個意義,就是「禁忌」。Mā就是bē-tàng隨便ê意思。因為án-ne,任何違反聖潔規律ê人,lóng「一定tio̍h tùi上帝ê子民中除名(á是開除)」。

Chit章主要teh說明兩件kah獻祭相關而且非常重要ê規律,一是獻祭一定tio̍h tī聖幕ê所在舉行。以前是tī曠野ê所在舉行,chit-má一定tio̍h tī聖幕門口,kā它交hō͘祭司執行獻祭ê禮儀(第5節)。因為曠野m̄是聖地,聖幕chiah是。曠野是當地原住民敬拜神靈ê所在,聖幕是以色列人民敬奉上帝ê處所。二是動物ê血絕對bē-tàng食,mā bē-sái食帶有血ê動物肉,因為血是性命,有贖罪ê功能。

Chit段經文詳細描述一定tio̍h遵守宰殺獻祭動物ê地點,就是只有ē-tàng tī聖幕門口ê所在,bē-tàng隨便tī其他所在。

第1到4節,chia真清楚,m̄是kā獻祭動物ê血流出來就算了,宰殺be̍h獻祭ê動物,一定tio̍h tī聖幕ê門口,這kah迦南地以及曠野居民,是tī各自厝裡宰殺獻祭ê牲畜無仝。這mā是一種分別為聖ê方式,表示耶和華宗教信仰ê特別所在。獻hō͘耶和華上帝ê牲禮,連宰殺ê地點lóng一定tio̍h聖化chiah thang。

第5到7節,tī無聖幕chìn前,in設立祭壇獻祭,chit-má聖幕已經造好了,聖幕內面有約櫃,因為án-ne,聖幕ê所在,就成做神聖ê所在,á獻祭就是敬拜上帝。因為án-ne,所有beh獻祭ê牲禮lóng一定tio̍h帶到聖幕前準備。

Koh講,祭司一定tio̍h用宰殺動物流出來ê血,hiù tī祭壇ê四周,這mā有聖化ê用意。注意第7節所提起ê「山羊鬼」,這是teh指曠野ê鬼神,是曠野游牧民族所敬拜ê神。嚴厲禁止以色列人民mā向chit-ê鬼神獻祭。

第8到9節,chit兩節真清楚說明,除了tī聖幕門口獻祭以外,其他所在lóng bē-tàng當做獻祭之地,包括khiā起tī in中間ê外僑mā tio̍h遵守chit-ê條例。

重新查詢 專卷研經 利未記系列
錯誤回報,請聯繫