士師記 8章13節 到 8章28節   背景資料  上一筆  下一筆
Chit段經文記載基甸凱旋tńg來途中,伊用「刺phè」懲罰疏割城ê人,mā親像以前對比努伊勒城人所警告ê,beh拆毀hit-ê城,伊án-ne做。

第13到17節,基甸活掠了一位疏割青年,ài伊列出hit-ê城重要首領kah長老名單,共計七十七人,然後照前所講過ê用「刺phè」懲罰hit-ê城ê chiah-ê領導者,並且拆毀了比努伊勒城,並且殺了hit-ê城ê人。

第18到21節,chit段經文thang明顯看出用血報仇ê古老社群生活態度。因為米甸領導者西巴kah撒慕拿 bat殺害基甸宗族ê人,因為án-ne,基甸原本ài伊ê kiáⁿ親手替宗族ê人報仇,m̄-koh伊太少年下不了手,最後是由基甸親手報仇,kā西巴kah撒慕拿刣死。

第22到23節,以色列人民因為基甸帶領in phah敗米甸盟軍,因為án-ne,請求基甸kah伊ê家族當in ê王,m̄-koh基甸拒絕chit項請求。第23節清楚講出基甸心中ê想法,伊kā以色列人民講:「上主beh統治lín。」這是一句真重要ê話。伊無願意當以色列人民ê士師,甚至伊ê kiáⁿ mā無妥當士師,真正以色列人民ê王、領導者是上帝!chit種信仰告白chiah是siōng重要ê。

第24到27節,chit段經文講出當時以色列人民tī迦南地ê宗教思想,已經會失去本來摩西、約書亞時代,帶領in kah上帝立落來「永遠之約」ê基本信仰精神。基甸知影伊ē-tàng帶領以色列人民用siōng少ê三百名軍隊擊潰敵方超過十二萬人以上ê大軍,而家己連一個損傷ê mā無,這絕對m̄是伊個人ê氣力所ē-tàng,是上帝親自帶領。M̄-koh tī第27節卻講tio̍h以色列人民koh tńg來到偶像崇拜ê罪行中,chit點是非常嚴重ê 錯誤。伊chit種行為真親像亞倫替以色列人民製造金牛仝款,只是亞倫是tī以色列人民ê要求下鑄造金牛(參考出埃及記三十二:1—6),á chit所在ê基甸卻家己提出beh收集所有ê耳環kah裝飾品,家己用chiah-ê物件鑄造偶像(以弗得),hō͘以色列人民棄sak了上帝。真可能本來基甸是用chit種方式hō͘人民有一個求得上帝旨意ê對象,免得in去敬拜偶像神明,無想tio̍h這尊偶像反tńg hō͘以色列人民根本無法度分別迦南ê神明kah上帝之間有甚麼差別。因為chia所用ê「偶像」,語音是「以弗得」,若是「以弗得」,則Tī聖經中是teh指祭司穿ê袍(參考出埃及記第廿八章、三十九:2—31)。不過,若是穿tī身上ê衫褲,卻是重達二十公斤,顯然有點á無jōa可能,比較像一尊偶像

Chit段經文mā看出以色列人民並m̄是一開始就相信基甸,是tī chit pái kah米甸、亞瑪力人ê戰役結束後,in chiah發覺基甸確實是in所需要ê領袖。伊要求以色列人民繳出in tùi米甸人身上chhiau-tio̍h ê耳環,比較khah正確應該是「鼻環」(參考創世記廿四:47)。這是迦南地人普遍ê一種裝飾品,tī chit裝飾品上有圖騰,表示有神明保護in。

第28節,chit節說明tī基甸ê統治領導之下,以色列人民有長到四十年太平ê生活。

重新查詢 專卷研經 士師記系列
錯誤回報,請聯繫