士師記 16章1節 到 16章22節   背景資料  上一筆  下一筆
Chit章講tio̍h參孫ê墮落kah死去,mā結束伊當以色列人民長到二十年士師。其實,tī參孫ê身上所隱喻出來ê,ná親像以色列人民仝款,chit章所講ê參孫kah妓女睏,ná親像teh講以色列人民去拜偶像神明仝款。也kah先知何西阿所傳達ê信息仝款。只有tńg來歸到上帝懷前,chiah有重新得tio̍h性命力量ê機會,這就是參孫ê事件。

Chit段經文ē-sái講是參孫記事ê第二部分,描寫伊kah一位妓女睏,差一點á被迦薩人攻擊,後來koh愛上一位名叫黛利拉ê cha-bó͘-gín-á,結果非利士人利用chit-ê cha-bó͘人,hō͘參孫徹底失敗,成做一個lóng無力量ê弱者。

第1到3節,chit段經文講參孫到非利士人ê迦薩城kah一個妓女睏,這表示伊已經無koh是「離俗人」,卻是一個不守潔淨禮儀ê以色列人。其實這mā teh暗示 tī參孫ê身上就thang看tio̍h kui個以色列人民ê縮影。迦薩城ê非利士人原本埋伏tī厝外準備ài beh殺害參孫,結果被參孫發見,伊提早tī半暝就離開了迦薩城,hō͘ hit-ê城ê非利士人想beh突擊伊ê計畫落空。M̄-nā án-ne,參孫氣力之大,mā kā hit-ê城ê城門連框帶扇、門閂lóng拆掉扛tī肩頭殼頂,氣力之大明明是叫看tio̍h ê人heⁿh驚kah講bē出話來。M̄-koh無人知影伊chit種大氣力是tùi何而來?

第4到5節,ná親像頂pái伊ê bó͘ hō͘人利誘套出參孫謎語ê謎底,chit-má koh有非利士人ê五個首領想用一千一百塊銀á作o͘-se,這確實是一大筆金錢,為tio̍h beh hō͘參孫愛上ê非利士cha-bó͘人黛利拉來探聽參孫ê氣力tùi何而來。

第6到9節,果然,黛利拉接受o͘-se beh探聽出參孫ê氣力來源。Á參孫並無因為頂pái妓女ê事有警覺性,伊iáu是kā黛利拉講,thang用「七根iáu未乾ê新絞繩綑綁」伊。Á黛利拉並m̄是真正愛參孫,卻是只愛金錢,伊the̍h-tio̍h錢就去通報hiah-ê想beh殺害參孫ê首領,而參孫卻tī cha-bó͘人中間沉淪落去。雖然chit pái並無成功,m̄-koh至少說明參孫顯然並無覺醒。

第10到12節,這是黛利拉第二pái詢問參孫,ài怎樣ê方式chiah會kā伊綑綁得tòa。伊koh講了,方式是the̍h新索á,結果是無效果,仝款被參孫扯斷。這引發一個問題:參孫是知影伊所疼ê chit-ê cha-bó͘人beh套出伊ê秘密,á是參孫真tú hông愛情沖昏了頭?

第13到14節,這是黛利拉第三pái誘騙出參孫講出制止伊力量出現ê方式,chit pái參孫講出伊頭殼頂頭毛ê辮子,而這已經jú來jú接近伊真實力量ê來源頭毛à。Chit pái mā是hō͘參孫脫離綑綁ê災難。M̄-koh伊iáu是無覺醒。

第15到17節,這是黛利拉第四次探聽參孫力量來源,雖然參孫拒絕講出真相,m̄-koh到落尾iáu是不堪黛利拉ta̍k工問伊、糾纏tio̍h伊,最後終其尾kā真相講出來,就是kā伊ê頭毛剪掉,因為he是伊一出世就被獻祭hō͘上帝成做「離俗人」ê記號,只要剪掉頭毛,伊就kah一般人仝款。M̄-koh參孫bē記得,若kā chit teh代表kah上帝之間有約ê頭毛辮子之記號剪掉,就表示伊kah上帝之間ê關係mā徹底破壞à。

其實thang án-ne瞭解:參孫ê頭毛,等同tī以色列男嬰出世第八工就需要割禮做為分別為聖ê記號。因為這割禮ê記號teh代表以色列人民kah上帝ê約。若是kā這記號lóng鄙視(siùⁿ)了,就等於鄙視(siùⁿ)kah上帝ê約仝款。Án-ne,上帝mā bē繼續賞賜hō͘立約子民有特別ê性命力量。

第18到21節,果然,黛利拉kā chit重要ê秘密通知了非利士人,另外一方面,伊hō͘盡了方法hō͘參孫睏落眠,然後非利士人kā伊頭殼頂ê七根頭毛編織ê辮子hō͘剪掉,參孫就án-ne會失去力量。Chia講參孫ê頭殼頂有綁「七根」辮子,「七」tú好teh表明「神聖」ê數字,說明伊kah上帝之間有特殊ê「神聖」關係。taⁿ參孫kā kah上帝之間teh代表約之關係ê記號完全破壞,就會hō͘伊陷入tī性命siōng苦難ê環境中,m̄-koh參孫已經bē記得chit件事loh。上帝無koh kah伊同在,伊就會失去力量。Á非利士人掠tio̍h伊,並m̄是隨時刣死伊,卻是凌遲伊,m̄-nā挖出伊ê目睭,hō͘伊變成chheⁿ-mê,帶伊到迦薩監獄關起來,做推磨ê苦役。

第21節,chit節講參孫ê頭毛慢慢長出來,就為下一段經文預先做序言。

重新查詢 專卷研經 士師記系列
錯誤回報,請聯繫