士師記 10章6節 到 10章18節   背景資料  上一筆  下一筆
Tùi第6節開始紹介耶弗伊,篇幅真長,直到第十二章7節chiah結束。Á紹介chiah-ê有記事ê士師,lóng會有一句真重要ê踏話頭:「以色列人koh得罪上主。」續落來就是in tī受tio̍h外族入侵了後,因為痛苦而祈求上帝幫助。就án-ne上帝koh差派士師來帶領in。Chit種句型差不多就是士師記ê紹介士師ê時ê主軸經文。

第6到9節,chit段經文以色列人民背叛上帝,去拜迦南地人民siōng主要ê神明巴力kah「亞斯伊錄」,這「亞斯伊錄」是迦南地居民敬拜ê女神,主掌生育、繁殖kah戰爭ê神明。Ná親像台灣民間宗教ê「註生娘娘」仝款ê神明。以色列人民chit種行為引起上帝憤怒,tùi án-ne hō͘非利士人kah亞捫人入侵佔領,統治in長到十八年之久,而且入侵ê範圍差不多是全部以色列民族khiā起ê地區,包括tī約旦河東岸,以及南部ê猶大地區全lóng陷落。

第9到14節,chit段經文真清楚說明in每pái tú-tio̍h痛苦就祈求上帝,過去上帝lóng會垂聽,chit pái上帝並無koh聽in祈求,ài in去求告in跟tòe迦南人所拜ê神明。M̄-koh以色列人民Tī痛苦中chiah體會tio̍h in所拜ê hiah-ê迦南神明其實是虛假ê神,就算耗盡了所有力量祈求,mā bē有任何反應。因為án-ne,in 回轉求上帝。Tī第11節上帝特別提起幾個迦南地原住民族ê名單,包括有亞摩利人、亞捫人、非利士人、西頓人、亞瑪力人,kah馬雲人,以及tī迦南地西北邊ê強大民族埃及人等。

第15到16節,chit兩節說明以色列人民終其尾曉悟了家己ê 錯誤,表示願意接受上帝ê懲罰,chit種態度mā表示出真實悔改ê人才有ê認真態度。In同時kā chiah-ê迦南神明lóng除掉,只希望ē-tàng因為án-ne而得tio̍h上帝ê拯救。

第17到18節,亞捫人準備ài攻擊tòa tī基列ê以色列人民,雖然以色列人民mā準備好應戰,m̄-koh卻m̄知甚麼人chiah是好ê領導者。因為án-ne,in出了一個附帶有鼓舞作用ê獎賞,就是甚麼人帶領以色列人民抗敵成功,甚麼人就當以色列tī基列ê領袖。



重新查詢 專卷研經 士師記系列
錯誤回報,請聯繫