約伯記 3章1節 到 3章26節   背景資料  上一筆  下一筆
Tùi chit章開始直到第四十二章6節止,chit段經文lóng是用詩ê形體寫做ê。Kui本約伯記siōng重要ê部分mā是Tī chit段長篇詩歌,其中siōng主要是teh說明一件事:為甚麼好人mā會tú-tio̍h災難?這kah詩篇第一篇所寫ê好人「像移植溪水邊ê果子樹」,pháiⁿ人ná親像「糠秕被風吹散」完全無仝款。Chit段詩歌iáu有另外一個特色是用「對話」ê方式構成,主角除了約伯之外,iáu有伊ê chit三個好朋友。最後是一位「旁觀者」以利戶加入chit場對話,m̄-koh以利戶ê加入並無hō͘約伯申辯ê機會,因為近óa跟tòe tī以利戶了後(第三十二章到三十七章),是tùi第三十八章開始,是上帝直接回答約伯ê話語到第四十二章6節結束。

Tī chit段長到廿四章ê對話篇幅中,約伯都無提起伊ê財富kah家業破滅ê事,卻是一直teh探討性命ê苦難,kah上帝ê旨意。伊一直感覺上帝kah-ná遠離了伊,chiah會hō͘伊tú-tio̍h chit種痛苦,m̄-nā百病叢生,甚至性命陷入垂危ê狀態。因為án-ne,約伯一再要求上帝親自kah伊對話,而伊ê朋友則認為約伯ê心態真驕傲,chiah-ê朋友認為:人根本就無資格kah上帝對話,只有ē-tàng順服。

Chit章thang講是「約伯ê哀歌」,主要是約伯teh詛咒家己出世ê日子。Ài beh特別注意,tī chit章中伊並無詛咒上帝,mā無任何輕蔑上帝ê話語。伊是對家己性命ê悲傷,因為好景已無koh存在。Koh講,伊雖然詛咒出世ê日子,卻無提起自刣ê事,這kah先知以利亞、約拿等人想beh用死來抵抗上帝ê命令真無仝款。

第1到3節,以色列文化中,對性命ê出世lóng用極大ê歡樂來慶祝。M̄-koh約伯卻對家己ê「生日」發出「詛咒」ê聲音,表示伊已經陷入極大ê痛苦中。Chia ê第2到3節,伊向上帝發出祈願,以及伊性命中siōng大ê ǹg望。M̄-koh,約伯並m̄是teh向上帝祈求未來ê遠景,顛倒,伊tī哀嘆性命遭遇ê苦難。因為án-ne,用「詛咒」ê字眼,而且是tùi老母懷伊ê胎開始。這kah先知耶利米所詛咒ê哀歌仝款(參考耶利米書二十:14)。

第4到7節,約伯是teh祈求一切tńg來到創造ê原點,mā就是tī性命iáu未出現ê時。M̄-koh伊tī chia講無希望有光,伊chit種祈求其實mā蘊含tio̍h另外一個意義,伊並m̄是希望性命完全絕滅,卻是存在tio̍h一絲ǹg望,希望m̄是親像chit-má án-ne「昏暗」,卻是ē-tàng tńg來到本來之態—「重新開始」。聖經一再表示:只有上帝chiah有能力hō͘烏暗遮陽光(參考出埃及記十:21—22)。M̄-koh有趣味ê是,聖經mā一再描述上帝出現tī濃密ê雲中。因為án-ne,當約伯teh祈禱上帝用「密雲罩tiâu」伊出世ê hit工,表面上看起來kah-ná是teh講伊討厭出世ê日子,其實,這mā是teh隱喻祈求上帝出現tī伊苦難ê性命中。Án-ne,即使無慶祝,只有孤獨,lóng是比有性命卻beh受苦iáu來得好。

第8到10節,chia提起「海怪」,tī古早時認為有三種海怪是主管烏夜ê,一是戾龍(參考以賽亞書廿七:1)。二是拉哈伯(參考以賽亞書五十一:9,teh代表混沌kah邪惡ê氣力)。三是鱷魚(本節所講ê「海怪」,tī中文《和合本》是用「鱷魚」)。傳說中chit三種海怪lóng hō͘ 上帝禁錮tī深淵ê陰府中(參考啟示錄二十:1—3)。約伯是án-ne期待:當一切lóng tńg來到原點ê烏暗、混沌、亂象出現ê時,上帝一定m̄准,必定會出手平息chiah-ê現象,重新創造,hō͘一切lóng重新來過,ná親像創世記第六章5節所講ê,上帝看tio̍h「人類ta̍k個邪惡」,只好重新koh來仝款。約伯心中希望是án-ne。一切lóng重新來過,án-ne,伊就bē án-ne痛苦à。

第11到12節,tī前一段詩歌中,約伯講伊若是無出世是siōng好。M̄-koh chit種期待kah想法是不實在ê,因為伊已經出世,因為án-ne,伊只有ē-tàng哀嘆「為甚麼」tio̍h出世,不過卻tī事無補。就án-ne chit-má伊轉向出世後所tú-tio̍h ê苦難現況。因為án-ne,伊提起若是無老母kā伊抱tī膝上餵奶哺養,伊就ē-tàng m̄免存活落來,因為伊chit-má活得真痛苦。

第13到16節,這是一段非常有智慧ê詩歌。約伯講一出世就往生ê gín-á,雖然無享受過甚麼榮華富貴,m̄-koh卻thang kah hiah-ê王宮貴族別人仝款享受「安息」ê結果。換句話講:無論是甚麼背景之下,死,是所有ê人lóng會tú-tio̍h ê,就算是擁有滿屋金銀財寶ê財主,á是居高官爵位ê王公貴族mā然。Tī chit段詩歌中,約伯一再重複「安息」、「睡」、「長眠」、「同眠」等等chiah-ê字詞,真清楚表示人永遠ê長眠,chiah是脫離苦難ê siōng好途徑。

    第17到19節,tī chit三節中,約伯重複提起「安息」、「安寧」、「自由」等字詞,kah頭前第13到15節所用ê「睡」、「長眠」等字詞仝款。Á chia ê「pháiⁿ人」、「辛勞ê工人」、「囚犯」、「奴隸」等用詞,是kah第14到15節所用ê「君王」、「統治者」、「王子」等字詞相對照。M̄-koh in共同ê結果lóng是「長眠」,而且是「同眠」tī墳墓中。這其實說明tī人世間,無真正階級,因為大家lóng仝款ài面對死亡(安息)。

約伯記ê作者有意透過chit種筆法反駁箴言ê觀點。Tī箴言siōng常見ê講詞,是認為在世間行為之好kah pháiⁿ,結果是有區別ê;箴言ê看法是:好人一定會有好報,相對ê,pháiⁿ人必定會有痛苦ê懲罰,bē-tàng善終。M̄-koh約伯記ê作者提出無仝ê觀點是:好人kah pháiⁿ人、強者kah弱者lóng仝款,只要死後進入墳墓,lóng仝款得tio̍h「安息」。甚至對tī chiah-ê低階勞力ê工人、奴隸來講,死亡tú好是性命苦難ê解脫,即使是主人mā無法度對死去ê奴隸吆lim,因為死去ê奴隸bē chhap主人ê聲音。死亡,hō͘ in得tio̍h自由。換句話講:死亡,kā一切階級ê差別lóng消除掉,mā kā一切無公義hō͘消滅à。

第20到23節,約伯提出一種性命觀:真正苦難,是人雖然活teh,卻lóng無意義thang講,若beh án-ne,不如歸去(死亡)來得好。約伯並m̄是lóng無緣故地埋怨性命存在ê意義,卻是因為伊受tio̍h非常ê苦難後,無法度理解為甚麼性命是chiah-ni̍h痛苦?因為án-ne發出chit種質疑地。伊希望chit幾位朋友tī明白伊ê苦難了後,ē-tàng體會出伊講chiah-ê話ê原因(參考六:3b)。伊並無棄絕上帝,卻是伊m̄-bat:為甚麼上帝既然賞賜性命hō͘人類,卻hō͘人類受tio̍h苦難?而且所受ê苦難大大超過人所ē-tàng承受。

第24到26節,chit段詩歌表達出約伯tī面臨苦難ê時ê回應,伊用「吐氣」、「haiⁿ-haiⁿ叫哀號」、「驚惶」、「驚惶」、「無平安」、「煩惱」等詞來表達心內ê感受。伊講chiah-ê lóng是人ê心內siōng驚惶ê事,卻全降臨到伊ê身上。


重新查詢 專卷研經 約伯記系列
錯誤回報,請聯繫