約伯記 29章1節 到 29章25節   背景資料  上一筆  下一筆
Tùi chit章開始到第三十一章,這三章是約伯tī頭前三回合答辯後ê一個總結。Mā thang kā第廿七章當做是約伯和其三位朋友ê答辯終止,如果án-ne,則這三章乃是一個獨立ê單元。若這三章是約伯答辯ê總結,這便是約伯ê自我陳述,伊無koh對朋友所講ê話直接回答,á是作反駁,看起來kah-ná是teh向上帝說明家己性命ê苦難境遇,mā是約伯平鋪直敘講出家己心內ê感受。

Thang kā這三章分做三個段落來看:一是第廿九章,伊期待ē-tàng親像過去仝款生活,lóng無煩惱mā無痛苦。二是第三十章,敘述目前所tú-tio̍h ê狀況。三是第三十一章,伊懇求上帝做出正義ê審判,iáu伊清白。其實,tī chit三章經文中thang看出真chē類似約伯tī以前kah伊三個朋友對話ê內容。

第1到2節,約伯講「jōa-ni̍h-á希望koh再有往昔ê歲月」,mā「像過去上帝保守我ê日子」,表示taⁿ伊已經無koh擁有像過去hit種風光、榮耀煥發ê景象。確實,頭前第一到三章已經真清楚描述伊性命siōng坎坷ê遭遇,差不多thang用「潦倒、落魄」來表示。過去因為有「上帝保守」事業chiah ē-tàng達tio̍h顛峰ê狀態,並m̄是靠家己得tio̍h ê成就。這mā是約伯記ê一個主題:若是無「上帝保守」、賜福,就等於喪失一切。因為án-ne,tī chit兩節伊表示希望ē-tàng親像過hit種,有上帝同在、保守。

第3到6節,chit段詩歌是teh回顧過去風光ê日子ê景況。伊提起上帝ê亮光「常照」tī伊「頭殼頂」,並且伴伊行過「幽暗」ê旅程。雖然hit時chūn伊少年,m̄-koh上帝ê「仁慈」卻「庇蔭」到伊kah伊ê厝,這是極大賜福。Mā因為án-ne,hō͘伊ê kiáⁿ lóng圍tī身邊(參考詩篇一二八:3),而且有「飲用不盡ê奶」、「湧流橄欖油」,chia ê「奶」kah「油」lóng是用來形容約伯原本富裕ê生活(參考約伯記一:2—3),甚至ē-sái講是奢華ê生活(中文《和合本》用「奶chē thang洗腳」,thang想像約伯ê富裕奢華ê生活)。

第7到10節,chit段詩歌約伯是描述伊kah當時社會各階層人士非常好ê互動關係,而且有淡薄á受大家ê尊敬。

    第11到17節,是約伯teh敘述伊幫助別人ê事,mā用chit種方式teh反駁伊ê chiah-ê朋友指責伊是邪惡ê人ê證據。伊講只要是「聽見」、「看見」,約伯所做ê事ê人,大家「lóng o-ló」,這kah伊ê chit三個朋友一再指責伊,甚至詛咒伊大無相仝。對sàn-chhiah人,約伯講伊一直lóng真「樂意幫助」,孤兒來求助,伊一定「伸出援手」,mā因為照顧寡婦ê家庭,in bē致使有後顧之憂,心內會「欣慰」。M̄-nā án-ne,伊koh khah進一步幫助hiah-ê殘障、弱勢者,包括「盲人」、「跛子」,甚至當「sàn-chhiah人ê老父」,意思是teh指提供sàn-chhiah者生活所需要ê,而且伊iáu為「生份人伸冤」,chit種情操koh khah偉大。因為「生份人」mā thang表示外邦人、寄居者,chiah-ê人tī以色列社會中,真容易被欺負。M̄-koh約伯成做in ê保護者,hō͘ in免受冤屈。伊mā想辦法hō͘ hiah-ê「強暴者」失去勢力,救出hiah-ê「hō͘ in欺壓ê人」,伊會án-ne做,是為tio̍h beh履行摩西律法上ê教導,做一個「正義」ê使者,用「公道」對待周遭ê人。這tī早期社會koh-khah是難得。

    第18到20節,約伯有種想法,mā是伊心中ê一種願望,就是親像伊án-ne富有社會正義、公道,而且會伸出援手救助困苦、孤寡、外出ê人,理當會得tio̍h上帝特別ê賜福,ē-tàng享長壽而且「壽終正寢」。Tio̍h注意chia所講ê「壽終正寢」,原本是講「死tī厝內」,這是東方社會認為一個享受長壽者siōng大ê福氣。Mā thang án-ne了解:約伯期待chit種長壽歲數,主要mā teh表示án-ne則thang繼續成做「盲人ê目睭、跛子ê腿、sàn-chhiah人ê老父」,hō͘ chiah-ê人受tio̍h照顧。其實,chit兩節mā thang講是象徵kiáⁿ孫相當chē,家勢興旺無衰退,ná親像溪水邊ê果子樹,繼續不斷開花、結果繁殖下一代。家族ê氣力bē「減退」,這是人siōng大ê期待。

    第21到25節,chit段經文thang看出約伯teh期待ê性命願景。當約伯講出chit段話語ê時,mā是teh說明伊心內ê痛苦,因為伊已經失落chit份期待。Chit段話mā是描述約伯siōng痛心ê感受,伊chit-má已無法度得tio̍h心中期待想beh擁有ê。伊原本想像家己所累積ê性命經驗,thang成做別人ê啟蒙者、教導者。當伊講完後,聽伊教導ê人lóng m̄需要加上任何補充,這mā表示約伯所講thang滿足所有人ê需要,ná親像作穡人teh期待天降「春雨」仝款ê渴望。Tī chia約伯mā強調伊ê教導kah chiah-ê朋友大無相仝;因為伊ê教導ē-sái講是「和善ê笑容」,對苦難ê性命有極大ê「鼓勵」,tī眾人眼中,ná親像一個性命ê指引者一般,就kah-ná一個明智ê「君王」帶領軍隊仝款,hō͘跟tòe ê兵丁bē「失望」,而會得tio̍h適當ê鼓舞。

重新查詢 專卷研經 約伯記系列
錯誤回報,請聯繫