約伯記 27章1節 到 27章12節   背景資料  上一筆  下一筆
Chit章mā是kah第廿四到廿六章仝款,約伯所講ê話,伊ê朋友聽bē落去,就koh插嘴回應。M̄-koh卻無一定是teh回應約伯所講ê,in只希望約伯ē-tàng承認家己犯罪。M̄-koh約伯一直認為伊ê受苦,並m̄是因為伊有犯錯。卻是一定有上帝特別ê旨意。伊只是想beh瞭解上帝到底是有甚麼計畫。

Chit章thang分做兩個段落,一是第1到12節,是約伯teh回應比勒達ê話,續落來是第二部分ê第13到23節,chit段是瑣法回應約伯ê話。

Chit段經文是約伯一貫ê言論,tī第九章35節、第十章7節、第十三23到24節、第十九章25節、第廿三章7節等等經文,lóng thang看出約伯teh表達伊無辜受難ê心境,伊希望上帝iáu hō͘伊清白。

    第1到2節,「約伯續落來發言」,表示約伯迫不及待ê搶tio̍h講話,可能是因為約伯已經聽bē落去伊chiah-ê朋友所講ê話。約伯用「chiù-chōa」ê語氣表示上帝對伊並無「公道」。原因是伊無法度理解所遇tio̍h ê苦難ê原因。

第3到6節,約伯講「只要上帝ê活氣iáu teh我內面」,chit句話表示上帝kah伊之間ê關係尚且存在,無脫離á是切斷。Mā就是講,只要伊iáu活teh,一定會用實際ê行動來見證家己講話真實不欺。Á上帝是thang tùi伊ê心內證實伊所講ê話lóng是真實ê。約伯用koh khah堅定ê語氣講伊ê chiah-ê朋友一再指責伊犯罪,m̄-koh堅持家己是「無辜」ê,伊絕對無放棄chit種立場,直到往生lóng是án-ne。第6節ê「堅持」表示絕對m̄ kah邪惡、扭曲ê事妥協ê意思。

第7到10節,真清楚ê,約伯tī chia所指ê「敵人」kah「攻擊我ê人」,就是teh指伊ê chit三位朋友(參考十九:2—3)。伊講chiah-ê人lóng該受tio̍h「懲罰」。這mā是伊反擊ê一種方式。伊認為對上帝不敬虔ê人所講ê話不值得注意聽,上帝mā bē注意聽in haiⁿ-haiⁿ叫ê聲音,因為in m̄-bat向上帝祈禱「求告過」。

第11到12節,chit節thang用來比較第廿五章,kah第廿六章5到14節比勒達所講ê話。Tī chit兩段經文中,比勒達對約伯講伊所認bat ê上帝非常偉大,而chit-má卻變成約伯kā伊講ê朋友伊所認bat ê上帝非常偉大。伊chit種講法,其實是teh諷刺伊ê chiah-ê朋友,講in並無真正認bat上帝。約伯清楚知影上帝乃是「全能者」,chit種觀念是非常正統ê信仰態度。續落來約伯一再認為伊ê chiah-ê朋友所講ê,lóng真不切實際,伊講chiah-ê朋友所敘述ê上帝,kah事實有真大ê cheng差,是真「荒謬」之言。


重新查詢 專卷研經 約伯記系列
錯誤回報,請聯繫