約伯記 24章1節 到 24章17節   背景資料  上一筆  下一筆
Chit章是繼續第廿三章約伯teh回答提幔人以利法ê話。Chit章主題受tio̍h第廿三章17節ê影響,因為Tīhi̍t節經文中,約伯提起縱hō͘家己被「烏暗弄瞎」目睭,伊mā不驚惶,因為只有上帝是伊所驚惶ê。Tī伊看起來,無論是烏暗á是光明,lóng是上帝創造ê,因為án-ne,對上帝來講並無所謂光明á是烏暗ê差別(參考詩篇一三九:12,啟示錄廿一:23)。

Chit章thang分做兩個段落來看,第一段是第1到17節,chit段誓約伯繼續回答以利法ê話。第二段是第18到25節,chit段經文是另外一個朋友瑣法聽約伯ê回應後,隨時搶發言。

Tī chit段經文中,約伯講述人犯罪ê具體行為,包括貪婪,欺壓別人等惡質行踏。M̄-koh伊mā同時質疑地為甚麼上帝會允准chiah-ê邪惡者做出hiah-ni̍h chē惡質ê事,卻無hō͘ in嚴厲ê懲罰?然後約伯替貧困窮乏ê人hoah冤枉,伊認為in哀嚎ê聲音,並無得tio̍h上帝ê垂憐。Á邪惡ê人卻是囂張跋扈,目中無人ê四界為非作pháiⁿ。

第1節,約伯ê連續質問伊看bē清楚到甚麼時chūn上帝chiah會審判作惡ê人,因為只有án-ne chiah ē-tàng hō͘人看見上帝ê「正義來臨」。

M̄-koh tio̍h注意ê是,聖經作者雖然提起「審判ê日期」,卻從來m̄-bat說明hit日子甚麼時chūn會來臨,因為時間是掌握tī上帝手中,是由上帝決定,m̄是人ē-tàng過問,連耶穌mā bat án-ne kā祂ê門徒講無人知影到底是甚麼時間,只有上帝知影(參考馬可福音十三:32)。

第2到8節,Tī chit段經文中,約伯tī chia指出惡人ê行為,包括有「挪移地界」,這是摩西律法嚴厲禁止ê行為(參考申命記十九:14、廿七:17)。這kah貪圖別人ê產業,想beh侵佔別人ê土地仝款,當然mā是違背十誡ê第十誡。

第二種是惡質行踏,就是「奪行孤兒ê驢á」,以及「the̍h寡婦ê牛作抵押」,這mā是以利法對約伯ê指控(參考約伯記廿二:9)。M̄-koh約伯tī chia則強調只有邪惡ê人chiah會做得出來chit種事。換句話講,約伯絕對bē做chit種事(參考約伯記三十一:16—17)。

第三種是拒絕hō͘「貧民享受應得ê權利」,這是teh指hō͘ sàn-chhiah人借錢免利息,以及到à安息年,thang除去奴隸ê身分(參考申命記十五:12—14)。Chia所謂「威脅sàn-chhiah人,hō͘ in逃走」,是teh指因為sàn-chhiah人無法度還所欠ê債務,債主想beh kā in賣掉,逼kahsàn-chhiah人只好想出所有ê辦法逃離債主ê掌控。先知阿摩司bat kā伊譴責hit時代ê以色列人有chit種行為(參考阿摩司書二:6—7a)。

    第四種是逼kah sàn-chhiah人像流浪ê街友仝款,為tio̍h生存只好佳哉「荒野搜chhōe食物」度日,ná親像「野驢á」仝款。

    第五種逼sàn-chhiah人「tī別人ê田裡收割」,m̄-koh卻是tī「邪惡人ê葡萄園摘取葡萄」,原因就是第2節提起ê,in ê田園已經被債主hō͘侵佔了,á是被邪惡ê人用計奪行。換句話講,in原本是田地ê主人,chit-má卻因為sàn-chhiah變成乞丐á是受雇ê奴僕。相對ê,邪惡ê人卻是興旺ê,因為in ê葡萄園繼續有收成,約伯用chit種方式提出疑問:為甚麼邪惡ê人無受tio̍h懲罰?

第六種是sàn-chhiah人連夜間禦寒ê外衫mā被奪取,致使in tī暗時teh睏ê時一定tio̍h「thǹg-pak-theh」,真是悽慘。

第七種是連beh chhōe一個避雨ê所在,mā bē-tàng得,因為土地無了,當然koh-khah無可能擁有屬tī家己ê厝。In只有ē-tàng四界流蕩,寄居tī別人ê厝。雨季來臨ê時,in mā只有ē-tàng bih-tī巖石洞穴中,求得暫時ê安居。

第9到12節,Tī chit段經文中,約伯繼續為sàn-chhiah人呼喊,講出in ê困境。包括有幾個現象:

第一種是富人「the̍h sàn-chhiah人ê kiáⁿ抵償債務」,hō͘ chiah-ê細漢ê gín-á ná親像「孤兒」仝款,過悲慘ê生活。

第二種是富人對sàn-chhiah人ê苦境是無m̄是關心,致使sàn-chhiah人出門無衫褲thang遮蔽身子,iáu tio̍h「替人背禾捆」thàn點工資。In工作到非常辛苦,mā無法度歇睏、食飯。

    第三種是sàn-chhiah人無歇睏ê機會,因為in已經被抵押為邪惡者ê奴隸,即使替in「搾橄欖油」,in mā無法度得tio̍h橄欖渣thang食;為主人「踹葡萄製酒」,卻得bē-tio̍h葡萄汁thang lim,以解工作流汗乾渴ê需要。Án-ne看起來,邪惡ê人繼續為非作pháiⁿ,卻無得tio̍h應該有ê懲罰,而貧困ê人卻一再受tio̍h欺負、虐待。

第四種是就算身軀已經受傷而痛苦「haiⁿ-haiⁿ叫」,甚至因為iau餓hō͘身軀接近「垂死」邊緣,上帝kah-ná lóng聽bē-tio̍h in ê呼求聲音,á是上帝根本是聽而不聞、「m̄-chhap」?

約伯用chit種方式提出抗議,想表達ê是:上帝怎樣thang án-ne好款待邪惡ê人,而hō͘困苦sàn-chhiah ê人受tio̍h án-ne不公ê對待?約伯teh描述chiah-ê情景ê時,主要mā是teh說明一件事:為甚麼上帝m̄聽聽chiah-ê sàn-chhiah人哀哭ê聲音而隨時伸手幫助in?為甚麼上帝m̄聽聽hiah-ê作惡者tī奢華宴樂中ê歡笑聲而hō͘ in嚴厲ê懲罰?伊以sàn-chhiah人ê景況反問上帝:為甚麼不懲罰作惡ê人?卻hō͘已經夠困苦ê貧民繼續過艱困ê生活?

第13到17節是teh描述邪惡者ê面貌。作者用四種身分來描述邪惡者,包括有:

第一種:拒絕光明者。Chit種人會拒絕光,是因為光會暴露in惡質ê行踏。聖經siōng ài用「光」來表示拯救。詩篇ê作者mā講上帝ê話語、教示,就是性命ê「光」、「燈」(參考詩篇一一九:105)。相對tī光,就是烏暗。

    第二種是殺害窮困ê人,in ê手路看起來ná親像「光明正大」,其實根本是「烏道」ê行踏。In殺害人ê手路,就是頭前所講ê,逼sàn-chhiah人「做到死」,無hō͘ in生存落去ê空間。然後繼續貪婪(作賊ê意思)ê各種惡質行為。

第三種提起chiah-ê富有ê人,á是有權勢ê人mā lóng陷入了淫亂ê網羅中,然後koh想出所有ê辦法「遮tio̍h面孔,m̄ hō͘別人看見伊」,其實上帝看kah非常清楚。M̄-koh tio̍h注意ê事chia提起「姦夫」á是淫亂,mā是teh指去拜偶像ê意思,表示in心中無上帝ê話語。

第四種是in ê行為kah「盜賊」根本就無兩樣。In會強行「破門入室」到sàn-chhiah人厝裡,搜刮了一切,然後「bih起來」,認為無人知影in所做ê。  

第17節是頂面所講chiah-ê 可惡ê人共同ê特徵是認為in ê所做所為無人看見。M̄-koh in soah koh驚hō͘人發見,因為án-ne,in利用「烏夜」去做bē-tàng告人ê事。

其實chit種想法是愚戇ê想法。因為無論是烏暗á是光明tī上帝看起來都無差別(參考詩篇一三九:12)。

重新查詢 專卷研經 約伯記系列
錯誤回報,請聯繫