約伯記 2章1節 到 2章13節   背景資料  上一筆  下一筆
Chit章mā是teh描述天庭開會ê景況。上帝就是天庭ê主人,祂主持會議。值得注意ê是,chit章所描述ê天庭開會之情景,其實kah第一章真相近,而撒旦對約伯攻擊ê態度kah手段,是koh khah強硬、殘酷,這可能kah第一pái ê失敗有關係。

第1到2節,上帝tī天庭開會ê時,koh一pái詢問撒旦ê話,kah第一章7節所記載ê仝款。

第3節,上帝主動向撒旦提起,約伯是一個「正直ê好人」,是「敬畏」上帝ê人,無做過「任何pháiⁿ事」。尤其是上帝bat tī撒旦要求之下hō͘撒旦去測試約伯,而且hit-pái ê測試,hō͘約伯tú-tio̍h慘重ê損失kah打擊,特別是伊ê十個kiáⁿ lóng因為án-ne而往生,m̄-koh約伯iáu是kah以往仝款,對上帝忠誠。

第4到5節,撒旦認為he是因為約伯想beh保全性命,寧可「棄sak其他一切」,撒旦認為只要ē-tàng侵害到約伯ê身軀,必定ē-tàng改變約伯對上帝ê態度。

Chia撒旦講「以皮換皮」,這是流行tī當時ê一句俗語,mā是遊牧民族siōng常用ê一種貨物交易方式,是商場上「等值」買賣ê一種方式。撒旦ê意思是teh指chiah-ê外物ê傷害,不足為奇,m̄-koh若是侵害到伊ê身軀,表示身軀ê深處,結果就會無仝款,伊認為約伯一定會「咒罵」上帝。
第6節,聽撒旦chit種講法,上帝允准撒旦thang去傷害約伯ê身軀,m̄-koh bē-tàng傷害伊ê性命。這mā說明任何一個人ê性命tī上帝ê眼中,lóng是絕對珍貴ê(參考詩篇一一六:15)。上帝留落來約伯ê性命,是beh伊為tio̍h án-ne事做見證。

    第7到10節,撒旦開始tùi約伯ê肉體攻擊開始,hō͘伊「tùi頭到腳長了毒瘡」,意思是teh指全身lóng受tio̍h病菌ê攻擊。Chia ê「毒瘡」一字,kah申命記第廿八章35節所用ê字仝款。因為án-ne,有kóa學者認為這是癩ko病。假使這chiâⁿ實是癩ko病,照當時ê觀點,患chit種病症,就表示chit-ê人一定是大大得罪上帝,chiah會受tio̍h報應。逼kah約伯一定tio̍h去坐tī「糞埽堆」中家己療傷。連伊ê bó͘ mā對伊chit種忠實tī上帝ê態度發出怨言,甚至iáu建議伊咒罵上帝,這顯然是撒旦贏了一半,hō͘約伯ê bó͘咒罵上帝,m̄-koh約伯iáu是仝款無為所動,伊甚至kā伊譴責ê bó͘是「胡講」。伊認為人無應該tī上帝賜福ê時,就歡喜;若tú-tio̍h災禍,就埋怨上帝。這表示伊iáu-koh堅持對上帝忠誠。

    第11到13節,chit三節是tùi第三章開始,直到第廿七章ê序文,ná親像第一到二章ê結構仝款。Tī chit段真長ê篇幅中,lóng是用對話ê方式來進行,探討約伯和chit三個朋友,對性命ê苦難kah上帝之間關係ê看法。作者特別提起約伯chit三位朋友ê名是:提幔人以利法;書亞人比勒達,iáu有拿瑪人瑣法等。In陪tio̍h約伯坐tī土腳哀傷長到「七工七夜不講一句話,因為in看見約伯ê痛苦hiah-ni̍h深重」。

重新查詢 專卷研經 約伯記系列
錯誤回報,請聯繫