約伯記 11章1節 到 11章20節   背景資料  上一筆  下一筆
Chit章是來探訪約伯ê第三位朋友拿瑪人瑣法ê發言,內容kah提幔人以利法、書亞人比勒達等等ê觀點仝款,lóng是認為約伯犯錯得罪上帝,chiah致使受難。Chit三位朋友lóng認為:人受難必定是kah犯罪有關,因為án-ne,獨獨悔改chiah ē-tàng得tio̍h上帝ê赦免,減輕罪所帶來ê懲罰。

Tùi約伯和chit三位朋友ê對話中,mā thang想tio̍h另外一個真重要ê議題:就是受苦ê人,心中是m̄是有上帝?如果答案是肯定ê,án-ne受苦ê人怎樣表達伊對上帝ê疼?伊ài如何描述伊心中ê上帝?而且tī人類歷史kah社會現象中,不時會看tio̍h:受苦ê人,in對上帝ê敬虔遠比一般人來得koh khah深、koh khah真實。

第1到2節,瑣法一發言,就指責約伯所講ê話是荒腔行板,甚至認為約伯ê話siuⁿ chē,聽不進朋友ê勸勉。瑣法認為m̄是「話講chē了就證明一個人有理」。

第3到4節,chit兩節真清楚講出瑣法對約伯確實真不滿,伊認為約伯tī態度上是無正確ê。伊講約伯ê話聽起來明明是就是「胡講八道」,伊認為:就算過去約伯真正無錯,m̄-koh chit-má單單tùi伊kah前兩位朋友ê對話中,就ē-tàng知影約伯已經是語無倫次。伊提醒約伯m̄-thang自認為有「道理」,mā m̄-thang認為家己「tī上帝面前乾清氣淨」。其實,約伯未bat講過家己tī上帝面前「乾清氣淨」,伊甚至iáu bat講過,ài上帝寬赦伊ê過犯(參考七:21)。伊一直認為上帝對伊siuⁿ過苛求,hō͘伊連吞嚥嘴瀾ê機會mā無(參考七:18—20)。意思是teh指上帝kā伊當做「完人」一般要求伊,無容允伊有一絲á輕鬆落來,這是約伯siōng受不了ê所在。

第5到6節,tī chia瑣法提出兩項「願望」,一是由上帝親自回答約伯ê話語。瑣法祈願上帝直接向約伯講話,mā teh表明in三位朋友已經無法度改變約伯,hō͘伊明白家己是一個罪人,所受ê苦難乃是罪有應得。除了上帝之外,親朋好友無任何方法thang改變伊。二是瑣法是希望上帝「開嘴駁斥」約伯所講ê話。瑣法認為只有上帝公開譴責約伯,chiah ē-tàng hō͘約伯啞口無言。後來確實是因為上帝親自開嘴講話,chiah hō͘約伯對家己過去所講ê感覺見笑,並且坐tī土粉kah爐灰中懺悔(參考四十二:6)。Koh講,瑣法是希望上帝指示約伯,免得約伯繼續án-ne自認為是。其實,tī瑣法ê認知中,認為約伯ê言詞kah褻瀆上帝無差別。因為án-ne,伊應該受koh khah大ê痛苦chiah-tio̍h。

    第7到10節,Tī chit段經文中,瑣法連續質疑地約伯對上帝ê認知到底有jōa-chē?而tùi約伯記第三十八到四十一章,上帝回答約伯所講ê話中,約伯承認家己對chiah-ê受造物ê認知確實真少。其實,何止約伯對上帝ê認bat真少,所有ê人對上帝ê認知lóng只有一小丁點而已。M̄-koh當瑣法teh歌頌上帝創造ê偉大ê時,伊是用chit種方式同時teh突顯約伯ê渺小kah無知。

這mā是一般人不時發出ê疑問:怎樣明白上帝ê旨意?基本上,tī基督教信仰內面,受造物是無法度明白造物主ê旨意。當聖經講人是上帝用「地上ê土粉」(參考創世記二:7)造物ê時,已經teh說明人是tī上帝ê旨意kah計畫之下被創造出來。因為án-ne,除非是上帝親自啟示,若無,就無任何一個人ē-tàng明白上帝創造ê計畫,á是祂ê旨意。因為án-ne,講上帝偉大便是teh凸顯人ê渺小。看hit-ê無邊ê天際,而人只不過是這天際中ê微小一粒,如仝一個粒細沙hit種渺小而已;地kah海洋lóng是萬物共生之地,而人只是萬物中ê其一,比起這廣大無比ê大地kah海洋,人koh算是甚麼?瑣法用「天」、「陰間」、「地」,kah「海洋」表示地ê四個「極點」,已經遠遠超出人ê能力範圍,就算有siōng好ê工具mā無法度測量世界ê高、深、長、寬等。M̄-koh,上帝卻ē-tàng命令海水分開,mā ē-tàng hō͘天開窗落雨,hō͘大地裂開,hō͘邪惡ê氣力被關tī陰間、深淵ê所在,而人則對chiah-ê lóng無所知。Án-ne,人有甚麼能力thang阻止上帝ê行動?根本無可能!

    第11到12節,上帝是一個細察人心ê上帝,因為án-ne,祂「清楚」每件事經過實況,koh khah清楚所有受造者ê心內意念,虛假ê人,一定瞞不過上帝ê眼目。第12節比較特別,因為經文內容kah-ná kah頭前ê經文連結bē起來,真可能保存原文ê過程中有遺漏。Chia瑣法舉「野驢á」為例,這指廣大曠野中流蕩ê驢á,無受拘束,真oh馴服。瑣法用野驢á譬喻講約伯ná親像野驢á仝款,無知到極點,根本就是真oh溝通,ná親像一個愚笨ê人,就算是對伊一再解釋說明,伊iáu是m̄-bat。意思指約伯明明是無藥thang救à。

    第13到15節,瑣法勸約伯tio̍h「存心正直」,意思是teh指ài伊雙手潔淨、心靈謙卑,án-ne chiah ē-tàng chhōe-tio̍h上帝,而hō͘性命得tio̍h存活ê機會。第14節mā是真重要ê一節,因為chit節指出一個人即使是tī外面犯罪,chiah-ê罪所帶來ê污穢,mā會污染伊所khiā起ê厝kah全家。相對ê,做一個人潔淨了後,伊kah伊ê全家mā會同時受益(參考使徒行傳十一:14、十六:31)。上帝ê恩典是tùi一個人而恩澤到全家。瑣法講chit種人chiah ē-tàng lóng無愧疚地面對上帝。其實,tī約伯ê觀點裡,每一個人面對上帝ê時,lóng會感覺虧疚,因為上帝是chiah-ni̍h聖潔,而人卻是污穢、不潔。

    第16到20節,瑣法認為約伯若是知影走chhōe上帝,則伊所有tú-tio̍h ê「禍患」,mā就是伊chit-má所tú-tio̍h ê苦難,lóng會因為為伊悔改而得tio̍h上帝憐憫,並且得tio̍h上帝koh-khah chē ê祝福,chiah-ê祝福會遮蓋所有一切ê苦難。性命mā會因為án-ne ná親像晨曦一般發出亮光,甚至mā會親像「透中晝」ê陽光,hō͘烏暗消失。因為chhōe上帝ê人,必定會得tio̍h上帝ê庇護,ē-tàng安然入眠。M̄免擔心敵人會來偷襲。因為知影走chhōe上帝ê人,上帝就會成做伊siōng好ê保護者。Tī瑣法ê觀點裡,約伯如成(chiâⁿ)實悔改走chhōe上帝,上帝一定會恢復伊以往ê興旺,甚至比以前koh-khah chē。若無,只有ē-tàng親像邪惡ê人仝款,只有等待死亡ê來臨,bē有性命ê ǹg望。

重新查詢 專卷研經 約伯記系列
錯誤回報,請聯繫