約伯記 10章1節 到 10章22節   背景資料  上一筆  下一筆
Chit章是延續第九章約伯回答比勒達ê話。Tī第九章伊kā陳述ê重點khǹg tī上帝ê特性kah人ê卑微層面相對照,顯示出人對tī性命遭遇苦難ê無奈,kah上帝對人苦難ê冷漠,hō͘人感覺上帝kah人之間ê距離非常遙遠。

而tī chit章,伊認為繼續回答比勒達ê話並無特別ê意義,伊beh直接向上帝投訴,ná親像伊chìn前對提幔人以利法ê回應仝款。Tī這章中,lóng是約伯直接向上帝提出疑問,伊iáu-koh kā問題鎖定tī「上帝為甚麼beh創造人」chit-ê題目上。約伯kā重點khǹg tī受造ê人身上,伊beh爭取ê是:做一個人應該有ê性命生存空間。

Thang án-ne瞭解:約伯會kā問題轉向上帝,主要原因是比勒達既然ài伊chē聽聽古代先人長輩ê智慧之言,伊直接問上帝koh-khah能得tio̍h正確ê答案。因為上帝就是「遠古」ê智者,是智慧ê開端(參考箴言九:10)。伊猶原確信,人性命ê所有境遇,一定lóng kah上帝ê旨意有關,若beh chhōe古代先賢ê智慧話語,不如直接走chhōe上帝。

    第1節,chit節thang參考第三章24到25節、第七章11、16節。Tùi chit節thang看出約伯ê態度是無koh沉默,伊beh向上帝說明(á是講是提出訴訟)伊無辜tú-tio̍h ê苦難,beh傾吐「心內ê苦惱」。約伯連續用「厭煩」、「哀怨」、「苦惱」三種名詞來表示伊ê性命態度,這mā強化伊原本走chhōe死亡ê意念。

    第2到3節,thang參考第六章24節。約伯真清楚請求上帝「指示」伊,hō͘伊知影到底「犯甚麼過失」,chiah致使伊ê性命án-ne痛苦。伊質疑地上帝是m̄是「看輕親手所創造ê人」,若m̄是,án-ne到底問題tī tó位?伊甚至質疑地是m̄是上帝故意kā好人交hō͘邪惡ê人去踐踏?若chiâⁿ實án-ne,約伯認為he是非常殘酷ê作為。

    第4到5節,tī chit兩節約伯lóng以人ê現象kah上帝對比,其實,這並m̄是約伯原本ê真正用意,伊只是用chit種方式teh講述上帝是永恆ê全能者,而人是有限ê存在。因為án-ne,伊以一個受造ê人來問上帝:像伊遇tio̍h án-ne大ê苦難,怎樣ē-tàng有夠額ê氣力支支持落去?約伯是採用「反諷式」ê語句提出伊ê抗議。伊問上帝觀察人是m̄是kah人仝款只看外表?是m̄是上帝ê「壽命」mā「kah人ê壽命仝款短促」? 

    第6到7節,chit兩節thang回應頭前兩節,約伯想講ê就是:因為上帝鑒察人ê心思意念,必定會清楚伊是一個清白無罪ê人。所以伊非常肯定家己並無犯錯而需要承擔án-ne ê痛苦。Chia約伯用「追究」、「chhōe察」等詞,lóng teh表示非常詳細ê察驗。M̄-koh,對人來講,無論怎樣「追究」、「chhōe察」,lóng是會有無夠詳細、周全ê所在,因為人是有限ê。M̄-koh全能ê上帝應該無可能會有疏失chiah-tio̍h。因為án-ne,伊相信全能ê上帝必定會查看出伊是「無罪」ê。伊mā認為只有上帝ê手,chiah ē-tàng救伊脫離苦難。

    第8到9節,約伯相信人既然是上帝所創造,上帝若beh kā它毀壞mā是真簡單ê一件事。換句話講,性命tùi上帝來ê創造,上帝若beh收tńg來非常簡單,只不過是舉手之勞而已。因為án-ne,伊懇求上帝beh「會記得」伊是用土粉所造ê人,非常軟弱,實在是無法度承受án-ne重大ê災難。

    第10到12節,第11節,thang參考詩篇第一三九篇13節。

Tī chit段經文中,約伯講性命tùi上帝來ê創造,伊形容上帝孕育性命ê奇妙,包括老父ê精力kah老母ê胎盤。約伯認為上帝ná親像一個手藝非常細膩ê工匠,伊chit種講法teh表達:上帝對人ê認bat非常透徹,人無論怎樣遮掩、bih起來lóng無法度逃過上帝ê眼目。M̄-koh同時,作者mā用chit種方式teh吐露約伯ê心聲:伊有無犯罪,上帝siōng清楚。特別值得注意ê是tī第12節,伊講因為上帝ê看顧chiah hō͘伊ē-tàng「存活」,tùi chia就ē-tàng知影約伯非常清楚一件事:若m̄是因為上帝ê憐憫,人根本就無生存ê能力。上帝既然看顧脆弱ê人,mā就表示上帝對人ê疼非常大。當然chit種講詞mā tú好講出約伯心內ê矛盾,伊一方面認為上帝故意hō͘伊受苦,另外一方面伊koh真清楚知影,若無上帝ê看顧,人根本就無存活ê氣力。

第13到17節,Tī chit段經文中,thang看tio̍h約伯tī苦難中一直teh chhōe索一個答案:為甚麼上帝beh懲罰伊?為甚麼無犯罪ê人,性命會tú-tio̍h苦難?如果上帝創造人,是beh表達祂奇妙ê疼,án-ne,hō͘無犯罪ê人受苦,án怎ē-tàng彰顯上帝ê疼?因為伊無法度chhōe-tio̍h答案,因為án-ne,伊認為一定是上帝故意kā災難降tī伊身上,並m̄是因為伊有甚麼無法度赦免ê罪,mā m̄是伊有甚麼特別ê過錯,卻是上帝「存心傷害」伊。

Tī chia,約伯認為上帝m̄-nā對伊監視得真親密,而且iáu故意chhōe伊ê碴。另外一方面,chit兩節經文mā回應了以利法ê看法,he就是上帝連天使mā無放過(參考約伯記四:18),而人ê等級若比上帝ê奴僕—天使—khah低(參考詩篇八:4—5),án-ne koh怎樣ē-tàng得tio̍h上帝ê赦免?因為án-ne,約伯認為上帝án-ne詳細teh監視伊,已經hō͘伊感覺見笑、無地自容,因為án-ne「m̄敢扛起頭來」。若是上帝像獅仝款追phah獵物,伊lóng無法度佳哉免得tī苦難中。

注意第16節ê「用奇蹟來傷害我」,原本上帝ê奇蹟,是用來彰顯祂拯救ê慈愛,就親像上帝用神跡奇事來拯救以色列人民脫離埃及奴隸生活ê苦難。M̄-koh仝款ê一件神跡,對上帝beh懲罰ê埃及人來講,卻是一種傷害。

    第18到22節,Tī chit段經文中,約伯koh一pái表達伊對性命ê苦楚感覺非常無力,對出世為人ê意義提出質疑地,ná親像伊tī第三章所敘述過ê仝款。

第18節,thang參考耶利米書第二十章17節。

約伯ê giâu疑是:性命中如果只有苦難ê話,人為甚麼beh出世?Thài會無ài就tī老母ê腹中死去,án-ne會來得比較好過。伊認為初生後ê性命若beh án-ne痛苦,伊寧可選擇bē出世,直接tùi母胎裡往墳墓內底行。Ná親像一個無出世就死tī老母腹中ê胎兒仝款。約伯tī chia向上帝祈求,就hō͘伊性命最後ê chit-ê階段過得爽快些,因為病痛纏身hō͘伊已經lóng無生趣,表示伊對性命已經感覺極大ê討厭。

注意第22節所提起ê「烏暗、死蔭、迷離」,kah「連光mā幽暗」,chiah-ê用詞lóng是以色列人對陰間ê瞭解。

重新查詢 專卷研經 約伯記系列
錯誤回報,請聯繫