耶利米書 51章24節 到 51章35節   背景資料  上一筆  下一筆
這是上帝beh猶大人民看見上帝怎樣懲罰巴比倫帝國,而且上帝ê懲罰是hō͘ in差不多徹底毀滅。

第24節,chit節指出猶大人民會「親目看見」上帝ê報復tī懲罰巴比倫。上帝ê懲罰並m̄是默默去執行,卻是hō͘猶大子民親目看見,為tio̍h是beh hō͘ in知影,上帝並無會hō͘人隨意胡亂作為,mā bē袖手旁觀,祂是會受氣ê上帝,mā是會懲罰、報應ê上帝,祂一定會hō͘家己所建造ê世界有秩序。違反了上帝創造ê秩序,就beh受tio̍h懲罰。

第25到26 節,原本巴比倫帝國像一座高高在上ê山,因為伊有強大ê武力,因為án-ne征服並統治所有ê附近國家,hō͘ chiah-ê弱小á是被伊統治ê國家、民族總認為伊像一座高山仝款,無法度攀登到伊ê山嶺,只有ē-tàng仰望。M̄-koh chit-má上帝對伊ê懲罰,就是kā它「削平」落來,並且beh kā它「燒成火灰」,這表示上帝beh hō͘巴比倫帝國「永遠荒廢」,hō͘原本thang用ê「基石á是牆角石」,chit-má lóng變成不堪使用ê廢棄物。

第27到28節,「亞giú臘」,這是設tī亞美尼亞境內ê「凡湖」(Lake Van)西北pêng ê所在。

「米尼」,mā是tī「凡湖」附近。

「亞實基the̍h」,是西古提人ê祖先。Khiā起tī幼發拉底河上游地區。

「米底亞」,這是tī今á日伊朗ê西北部。Tī主前612年到609年間,當地居民bat kah巴比倫聯手攻打亞述。然後tī主前539年kah波斯聯手攻打巴比倫帝國,就是chia所講ê「米底亞諸王」ê意思。

Chia mā koh一pái提起攻打巴比倫帝國ê聯軍ê chē,ná親像「草蜢仝款chē ê軍馬」(參考四十六:23、五十一:14),表示來攻擊ê兵丁是chē到巴比倫根本就無法度抵抗,而當chiah-ê龐(pâng)大ê聯軍一過,巴比倫差不多就全部lóng被搜刮殆盡,ná親像草蜢過境一般,寸草不留。

第29到33節,chit段經文述講起來攻打巴比倫帝國ê情況,確實是震撼了kui個巴比倫帝國,因為這是上帝teh執行祂毀滅巴比倫帝國ê計畫,chit時chūn ê巴比倫城內ê人民發見ê時已經來不及反抗了,「巴比倫ê戰士驚惶失措」,m̄知該怎樣整軍反抗。就án-ne只好「放落武器,bih起來tī堡壘內面」。Chia講「巴比倫kā像phah粟á ê五穀場仝款被踐踏」,表示巴比倫非常軟弱ná親像輕到thang tòe風飄散ê糠秕仝款,根本不堪一擊。
	
第34到35節,chit兩節講出主前586年耶路撒冷被巴比倫王尼布甲尼撒毀滅ê時是hō͘洗劫一空。chit-má tú好顛倒,變成巴比倫帝國被波斯帝國侵犯,hiah-ê當年tī耶路撒冷被俘虜到巴比倫城ê以色列人民,開始歡呼,in大聲hoah講:「咱應該報復」,「應該追討血債」上帝beh巴比倫kā所吞落去ê戰利品全部lóng「交出」來。

重新查詢 專卷研經 耶利米書系列
錯誤回報,請聯繫