耶利米書 5章1節 到 5章11節   背景資料  上一筆  下一筆
Chit章是先知耶利米teh指責耶路撒冷ê人民,mā就是南國猶大人民背叛上帝ê罪行,四界可見。因為án-ne,上帝懲罰ê方式,就是beh召集猶大ê敵人來攻擊in。上帝決定beh嚴厲懲罰in,是因為伊看輕mā拒絕上帝奴僕先知傳達ê信息。

Chit段詩歌是上帝kah先知耶利米之間ê對話。上帝ài先知耶利米去chhōe看是m̄是有公正ê人,結果先知耶利米並無chhōe-tio̍h,chit時伊chiah醒悟過來,原來上帝beh嚴厲懲罰猶大人民是對ê。

第1節,thang kā chit節對照創世記第十八章關係亞伯拉罕kah上帝之間ê對話,是真類似ê。上帝beh亞伯拉罕看是m̄是ē-tàng tī所多瑪城chhōe-tio̍h「十個」無辜ê人,上帝就bē毀滅所多瑪城。Á tī創世記第十九章則說明連一個mā無。Taⁿ對耶路撒冷城,上帝提出只要「chhōe-tio̍h一個正直忠誠」,上帝就會「赦免」耶路撒冷。上帝beh亞伯拉罕tī所多瑪城chhōe「十個」,卻tī chia向耶路撒冷人提出「看māi kám-ē-tàng chhōe-tio̍h一個正直忠誠ê人」,若是thang,「上主就會赦免耶路撒冷」,其實,chit句話ê意思是teh指連一個mā無。

第2節,chit節thang參考以賽亞書第廿九章13節。

猶大人民並m̄是真心敬拜上帝,卻是用虛假ê心回應上帝揀選ê疼。

第3節,chit節講出以色列人民真正ê問題,就是m̄驚上帝懲罰(參考耶利米書二:30),mā可能是過去ê懲罰太輕了pah,chiah hō͘ in ê心iáu-koh「固執成性,m̄肯棄sak罪惡」。

第4節,chit節講tio̍h猶大人民真正「sàn-chhiah」,是在tī對上帝ê話語「無知」。Chit種「無知」會致使in「m̄知上主ê道路,m̄知上帝ê法則」。詩人bat真清楚描述上帝ê律法kah法則會幫助人認清性命ê準則(參考詩篇十九:7—11)。

第5節,chia真清楚指出猶大人民ê領袖,並m̄是m̄知「上主ê道路」、「上帝ê法則」,其實in清楚,真正ê問題是in「否認上主ê權威,m̄肯服從」。原因是in已經跟tòe迦南地ê人去拜偶像神明了,並且認為偶像神明chiah是賞賜hō͘ in一切ê神(參考何西阿書二:5—8)。

第6節,「獅」、「豺狼」、「花豹」等等chiah-ê lóng是當時迦南地不時出現ê凶猛野獸。先知耶利米用chiah-ê凶猛ê野獸來形容敵人,in teh beh像chiah-ê凶猛ê野獸攻擊猶大,原因是in「一再棄sak上帝」,犯罪非常嚴重。

第7到8節,chit節講出上帝tī容忍到一個段落了後,決定收tńg來祂ê赦免,因為人亂使用上帝ê恩典。因為以色列人民進入迦南地了後,就因為享受tio̍h上帝賞賜ê一切,過富裕生活了後,卻bē記得上帝ê恩典,只知影四界去拜偶像神明,對上帝不忠ê意思。Chit兩節用「飽暖思淫」、「chhōe娼妓」、「慾火旺盛」、「垂涎別人ê bó͘」chiah-ê詞句,lóng是teh說明猶大人民拜偶像神明ê動作真頻繁,而且熱情khah贏過對上帝ê敬拜。

第9到10節,為tio̍h猶大人民悖逆ê行為,上帝決定beh「召敵人來毀壞」teh象徵以色列民族ê「葡萄園」,ài kā hiah-ê m̄聽從上帝旨意ê「枝子」hō͘ in「phut掉」。

注意chit句「只是不徹底kā它摧毀」,chit句話thang參考耶利米書第四章27節、第五章18節,lóng是teh表示上帝beh保留hiah-ê對祂忠誠ê子民,mā就是所謂ê「殘存」ê子民。

第11節,chia講「以色列人kah猶大人」,這是teh指雅各所有ê kiáⁿ孫,包括十二支派所有ê人民。意思是teh指分裂後ê南北兩國人民lóng仝款,北國以色列tī主前721年亡國,南國猶大並無因為án-ne而警醒,顛倒ê,in照樣犯下北國以色列人民所犯ê罪過,甚至是koh khah嚴重(參考耶利米書三:8,以西結書廿三:11)。

重新查詢 專卷研經 耶利米書系列
錯誤回報,請聯繫