耶利米書 47章1節 到 47章7節   背景資料  上一筆  下一筆
Chit章是論到有關非利士人ê問題。久長以來,以色列民族kah非利士人之間一直是冤家不斷。非利士人khiā起ê所在ē-sái講是迦南地siōng肥ê地區,包括沿海ê城市有亞實突、亞實基倫、迦薩,kah比較khah內陸ê迦特、以革倫等五個城市。當地拜ê是「大袞神」(參考撒母耳記上五:2),以及迦南人siōng崇敬ê神明巴力‧西卜(參考列王記下一:2)。In mā是非常慓悍善戰ê民族,bat kā以色列人phah得落花流水,連約櫃lóng搶奪過去(參考撒母耳記上四:10—11)。雖然án-ne,tī以色列人民ê眼中,非利士人iáu-koh是無清氣ê民族而輕視in ê身分(參考士師記十五:18,撒母耳記上三十一:4)。

Chit章mā談起關係非利士人ê一kóa城市被攻打ê情景,包括迦薩、亞實基倫等chit兩個城市在內,m̄-koh卻差不多看bē-tio̍h這兩城市有任何反應,這mā teh表示chit兩個城市ê傷亡非常慘重。

第1節,「tī埃及王進攻迦薩」,埃及是tī南部,m̄是北部,而第2節soah講「北方」,這是teh指巴比倫帝國。chit-má ê問題是:新興ê大帝國是巴比倫,應該m̄是埃及。Tī《七十人譯本》聖經中就無chit句「tī埃及王進攻迦薩」,直接就提起「有關非利士ê事」,因為án-ne,有bē少聖經學者認為chit句「tī埃及王進攻迦薩」是出tī編輯者家己加上ê註腳,m̄-koh卻是錯誤ê註釋。

M̄-koh mā有kóa學者認為chit篇預言真可能是歷史背景ê無仝,並m̄是teh談論主前568年以後ê事,卻是tī主前605年ê事件,hit時埃及確實為tio̍h beh預防巴比倫帝國tī巴勒斯坦地區成做龍頭老大,而影響tio̍h埃及tī中東地區之經濟利益kah影響力,因為án-ne,派兵去攻打巴比倫。就tī迦基米施一役,埃及輸了(參考四十六:2),而巴比倫帝國tī he年卻趁勢攻打了非利士人ê城市,而且造成真大ê傷害,這就是chit首詩歌第5到7節所描述ê內容。
 
第2節,chit節提起「河水tī北方漲起來,成做一股氾濫ê洪流」,這是用尼羅河氾濫成災ê景象形容teh beh來攻打非利士人ê巴比倫軍隊ê勢力,表示力量大到無法度抵擋,唯一避免災難ê方式,就是趕緊逃走。

第3節,「戰馬蕭蕭」、「戰車轔轔」、「車輪轆轆」等,chiah-ê詞句lóng是teh形容巴比倫軍隊ê雄壯樣式,連原本siōng真gâu相戰ê非利士人mā只有ē-tàng坐以待斃,根本就無力反抗。

第4節,這是比較khah麻煩ê一節,因為「泰爾」kah「西頓」並m̄是非利士人ê城市,卻是屬tī腓尼基人ê城市,mā是沿海城市。會hō͘列入攻擊ê對象,真可能kah chit節下半句「滅絕tùi迦斐託島沿海來ê遺民」有關。這「迦斐託島」是非利士人ê發源地(參考阿摩司書九:7),tī創世記第十章14節真清楚記載,非利士人就是「克里特人」ê kiáⁿ孫。In後來移民到迦南地ê沿岸地區定居。

有一個可能是因為非利士人ê「亞實突」、「亞實基倫」、「迦薩」等chit三個城市,lóng是屬tī沿海地區。Á沿海城市有一個特色,就是經濟貿易往來頻繁,因為án-ne,巴比倫帝國kā kah非利士人來往密切ê城市mā lóng算入攻擊ê對象,這有一個重要作用,切斷經濟來源。另外一種可能,就是泰爾kah西頓bat tī物資上支援非利士人抵抗巴比倫軍隊,因為án-ne連帶成做被攻打ê對象。

第5節,chit節用「悲傷」、「死寂無聲」等等chiah-ê詞表示「迦薩人」kah「亞實基倫人」遇tio̍h巴比倫軍隊嚴厲攻擊ê結果是傷亡非常慘重,這兩城市ê非利士人差不多無法度承受了,情況嚴重到teh要被滅絕,致使連hoah叫ê聲音mā無了。

第6到7節,chit兩節講這兩城市ê非利士人祈求上帝罷手饒了in,m̄-koh上帝顯然並無接受。可見這兩城市ê人tī上帝眼中必定是非常惡質。Chia所謂「上主ê寶劍」,意思是teh指巴比倫軍隊。因為巴比倫就是上帝ê奴僕(參考廿五:9、廿七:6、四十三:10),奴僕只聽主人ê命令行事,因為án-ne,如果上帝無喊停,巴比倫ê軍隊kan-taⁿ會繼續進兵攻擊,bē罷手。M̄-koh上帝beh「叫它揮動phut刣」,除非有上帝ê命令,若無,上帝ê奴僕—巴比倫軍隊—kan-taⁿ會繼續攻擊。 

重新查詢 專卷研經 耶利米書系列
錯誤回報,請聯繫