耶利米書 43章1節 到 43章13節   背景資料  上一筆  下一筆
Chit章記載chiah-ê來詢問上帝旨意,並且清楚得tio̍h in所想beh聽ê上帝信息了後ê反應,所採取ê行動kah in所chiù-chōa講ê話完全無相仝。In認為先知耶利米所傳達ê信息,並m̄是tùi上帝來ê旨意,卻是受tio̍h伊ê秘書巴錄ê影響chiah講hiah-ê話。因為án-ne,上帝ài先知耶利米用象徵性ê動作,並且koh一pái傳出上帝嚴厲ê警語,回應chiah-ê拒絕聽從上帝旨意ê人。

真正ê問題是:做一個人祈禱詢問上帝ê旨意ê時chūn,是beh上帝聽伊ê,iáu是人應該聽上帝ê?Chit章提出chit-ê嚴肅ê信仰功課,thang供大家思考kah反省。

第1節,先知耶利米照上帝指示hō͘伊ê話,「轉告以色列人」,而且是「每一句話」lóng清楚、無遺漏,這mā是先知應盡ê職責(參考列王記上廿二:14)。

第2到3節,chit兩節記載chiah-ê人聽了後ê反應,in是用「傲慢」ê態度回應先知耶利米。In認為先知耶利米「講白賊」,並且強調講伊所傳講ê並m̄是上帝所「吩咐」ê,因為先知耶利米講上帝「禁止」in去tòa埃及,m̄-nā是án-ne,甚至是即使去埃及,災難mā kā kah跟tòe in去到埃及á是任何in所到ê所在(參考耶利米書四十二:18)。並且認為先知耶利米所講ê,lóng是伊ê秘書「巴錄煽動」,chiah hō͘伊「反對」in去埃及避難,是想beh hō͘ in被巴比倫人「殺害」,á是被「掠到巴比倫去」。

第4節,chit節講in lóng拒絕聽從先知耶利米ê話,「m̄肯聽從上主ài in居留tī猶大ê命令」。

第5到7節,m̄-nā án-ne,chiah-ê人iáu做一件非常錯誤ê事,就是「Kā殘存在猶大ê人kah tùi各國回鄉ê難民lóng帶到埃及去」,這其中iáu包括先知耶利米kah伊ê秘書「巴錄」、「cha-po͘人、cha-bó͘人、兒童,kah眾公主」等lóng同齊帶去。這是kā in當做人質押去埃及,in認為安全、可靠ê所在。Á chit時chūn先知耶利米,一直保持沈默不語,因為伊知影無論是怎樣辯護lóng無法度改變chiah-ê人。In執意去「埃及」,後來in來到「答比匿」,這是設tī埃及尼羅河下游三角洲東部之孟沙勒湖以南ê所在。

第8到10節,上帝ài先知耶利米「當tio̍h以色列人,搬一kóa大石頭埋tī答比匿王宮門前廣場ê灰泥下」,這是一種用戲劇性ê表演方式來講預言,這主要teh表明:有一工,chiah-ê逃走到埃及去避難ê猶大菁英,會親像chiah-ê石頭仝款,被統治者控制tio̍h,無法度動彈,而chit位teh beh控制埃及王宮ê就是「巴比倫王尼布甲尼撒」,伊teh beh tī埃及ê土地頂面建造「寶座,thí開皇家ê帳棚」,這teh表示巴比倫王kā統治埃及ê意思。

第11到13節,chit三節lóng teh強調上帝beh透過「尼布甲尼撒beh來擊敗埃及」,而chit件預言確實發生tī主前568年,mā就是耶路撒冷被毀滅ê十八年後,巴比倫王尼布甲尼撒在位ê第三十七年,伊出兵討伐埃及,當時埃及ê法老王名叫亞瑪西士(Amasis),為tio̍h beh懲罰埃及不時tī亞細亞諸小國中製造動亂。雖然埃及並無被巴比倫消滅、統治,m̄-koh卻遇tio̍h巴比倫軍隊嚴重ê蹂躪,後來並且聽從巴比倫帝國ê警告,m̄敢繼續反抗。另外一方面,上帝mā同時beh出手摧毀埃及人民敬拜ê「日頭神」,這mā teh暗示埃及已經無法度抵抗巴比倫軍隊ê入侵。即使以色列人逃到埃及去避難,mā會「ná親像牧者除去衫褲頂面ê ka蚤」,tī埃及人眼中in ná親像「ka蚤」仝款,到時mā會hō͘跺掉。

重新查詢 專卷研經 耶利米書系列
錯誤回報,請聯繫