耶利米書 39章1節 到 39章18節   背景資料  上一筆  下一筆
Chit章thang參考列王記下第廿五章1到7節。

Kui章談及有關耶路撒冷被毀,猶大國滅亡ê記事。Chit章ê記事kah第五十二章ê記事內容相差不多。Chit章mā記載西底家王逃脫ê過程,以及受掠ê經過,包括伊被送到巴比倫王尼布甲尼撒面前受審、懲罰,kah伊ê家族被殺害ê經過。除了這以外,chit章mā記載巴比倫軍隊元帥釋放先知耶利米,並且記載tī這chìn前,先知耶利米bat傳達信息hō͘為伊向西底家王求情ê以伯‧米勒,講伊會因為保護先知而得tio̍h上帝保護ê恩典,免tī被掠到巴比倫去。

Koh講,chit章mā記載先知耶利米被巴比倫王尼布甲尼撒下命令釋放ê記事,m̄-koh這kah第四十章1到6節ê記載有真大ê出入;tī chia ê記載是:當耶路撒冷城淪陷ê時,巴比倫王尼布甲尼撒隨時下令釋放先知耶利米,並且吩咐人tio̍h好款待伊,kā伊交hō͘亞希甘ê kiáⁿ基大利,帶先知耶利米tńg來到同胞中間khiā起。Á tī第四十章1到6節是記載先知耶利米mā tī被俘虜ê人群中,直到人群行到「拉瑪」ê時chūn,尼布撒拉旦元帥chiah hō͘先知耶利米自由選擇去路,看是beh跟tòe in去巴比倫,á是想beh tńg來到家己ê故鄉,而且iáu送伊真chē禮物、糧食。先知耶利米選擇tńg來到家己ê同胞中,kah hiah-ê殘存ê老弱、sàn-chhiah ê人民做伙。

會有chit兩種無仝ê記載,真可能是因為傳承落來資料有差異致使ê結果,有kóa聖經學者認為第四十章ê資料乃是後來補上去ê,主要是想說明耶路撒冷城ê淪陷是出tī上帝旨意,m̄-koh上帝無bē記得祂ê忠實奴僕。

第1到2節,「西底家作猶大王ê第九年十月」,mā就是十月10日(參考列王記下廿五:1,耶利米書五十二:4,以西結書廿四:1—2),chit-ê時間mā是主前588年1月15日。Tī chit工,巴比倫ê「大軍進攻耶路撒冷」。

「第十一年四月九日,耶路撒冷城強被攻破了」,chit工應該就是tī主前586年7月18日(參考列王記下廿五:2—3,耶利米書五十二:5—6)。後來伊tī先知撒迦利亞時代,被掠到巴比倫去做奴隸ê以色列人民kā chit工列為禁食日(參考撒迦利亞書八:19)。

耶路撒冷城淪陷,距離北國以色列tī主前721年被亞述帝國消滅ê時,tú好是一百三十五年。Tī這長到一百三十五年ê時間裡,猶大國顯然無tùi北國以色列滅亡ê慘劇學tio̍h教示,非常可惜。

第3節,「耶路撒冷淪陷ê時,巴比倫王所有ê將領lóng到中央門,tī hia開庭」,這mā是戰勝國會對戰敗國ê主要將領、社會領袖進行審判,這就是現代所謂ê審判戰犯。這「中央門」的確實位置已經無法度thang考。真可能是分隔錫安山ê營樓kah下城ê城牆間。Mā有講是列王記下第十四章13節所講tī耶路撒冷城北面ê「以法蓮門」。出席ê巴比倫將領包括有「尼甲‧沙利薛」,chit-ê名ê意思是「尼甲保護王」,若án-ne,這可能是侍衛長。M̄-koh另外一位同名者是甚麼人,就m̄知了。Iáu有「三甲‧尼波」,這字可能是官職,卻m̄是人名。Iáu有一位可能是負責外交事務ê「掖西金」。

第4到7節,chit段經文thang參考列王記下第廿五章4到7節,耶利米書第五十二章7到11節。

Chia講述巴比倫軍隊怎樣掠到正tī逃亡中ê猶大西底家王kah伊ê臣僕,以及怎樣對待西底家王ê厝內人。西底家王受tio̍h非常殘酷ê對待,m̄-nā家己ê「兩隻目睭被挖出來」,而且伊ê gín-á以及「猶大所有貴族」,mā lóng tī伊ê「目睭前」被活活刣死,然後伊koh被用「鍊á鎖tiâu」,「帶到巴比倫去」,人生ê結局真正是一場悲劇。

第8到10節,thang參考列王記下第廿五章8到12節,耶利米書第五十二章12到16節。

「巴比倫人放火燒了王宮kah民房,拆毀耶路撒冷ê城牆」,照列王記下第廿五章9到10節ê記載,是「尼布撒拉旦」下ê命令ài軍隊做ê。伊m̄-nā下令放火燒毀聖殿、王宮,kah一切耶路撒冷達官貴人ê房屋,mā拆毀了耶路撒冷ê城牆。列王記ê作者teh描述chit位指揮官下命令放火燒毀聖殿chìn前,kā聖殿所有一切貴重ê器物lóng盡可能搜刮,不存留任何值錢ê物件(參考列王記下廿五:13—17)。然後是「Kā hiah-ê siōng窮苦、無財產ê人留tī猶大,kā葡萄園kah田地分hō͘ in」,chiah-ê人可能就是lóng無能力叛亂、反抗ê人民,hō͘ in自生自滅。

第11到12節,「巴比倫王尼布甲尼撒命令」伊ê元帥beh kā先知「耶利米chhōe來,好好á待伊,bē-tàng傷害伊」,這表示巴比倫王bat聽過有關先知耶利米ê事。Chit對照猶大西底家身邊ê大官宦臣動輒kā先知耶利米關入牢獄,侮辱伊,差不多是完全顛倒ê方式。

第13到14節,就án-ne先知耶利米被巴比倫官員kā伊「tùi王宮ê監獄裡」釋放出來。伊會hō͘釋放ê原因可能是當巴比倫軍隊開入城內ê時,就tùi城婦人人民聽tio̍h關係先知耶利米ê消息,當時社會所疏忽ê siōng sàn-chhiah ê人民所講ê傳到巴比倫王尼布甲尼撒耳中,因為án-ne,巴比倫王就下令kā先知耶利米釋放,並且認為chit種先知應該hō͘ in尊崇。並且kā伊「交hō͘沙番ê孫á,亞希甘ê kiáⁿ基大利」,這亞希甘bat擔任約西亞王時代ê宮廷大臣(參考列王記下廿二:12),而伊ê kiáⁿ基大利則被巴比倫王任命為猶大省長(參考耶利米書四十:5)。M̄-koh後來伊被猶大以色列人民中一kóa激進派份子hō͘暗刣死(參考耶利米書四十一:2)。為tio̍h án-ne,先知撒迦利亞時代,以色列人民特別tī每年七月作為禁食日(參考撒迦利亞書八:19)。

先知耶利米被「安排tńg去厝裡」,伊決定「tńg去,tòa tī同胞中間」,伊chit種選擇真特別,因為若是伊選擇去巴比倫,應該會受tio̍h巴比倫王尼布甲尼撒ê禮遇,m̄-koh伊無án-ne做,因為真正需要幫助ê m̄是chit群被俘虜到巴比倫去ê菁英,卻是殘存留落來ê老弱窮苦同胞,in已經一無所有,無任何技術、顯赫ê教育背景、知識,而且身軀ê健康狀況必定真差,面臨ê是瘟疫、iau餓,是siōng需要鼓勵ê一陣人,因為in tī國家淪陷chìn前,就bat被hiah-ê達官顯要剝削到oh得生活,所以先知耶利米決定留落來陪伴in。

第15到18節,chit段經文是tī先知耶利米「iáu被關tī王宮監獄ê時chūn」,回應以伯‧米勒保護伊ê記事。若是kā chit段記事續接tī第三十八章13節後面,會比較khah暢順。先知耶利米對以伯‧米勒傳達信息,講上帝beh tńg來報伊,因為伊救助先知耶利米免遭殺害,因為án-ne,耶路撒冷城淪陷ê時,上帝會救伊kah伊ê厝內人ê性命免受tio̍h巴比倫軍隊殺害。

    Koh講,chit段經文mā提起耶路撒冷城bē koh再有過去hit種繁榮ê景象。

重新查詢 專卷研經 耶利米書系列
錯誤回報,請聯繫