耶利米書 36章1節 到 36章10節   背景資料  上一筆  下一筆
Chit章kah第三十五章ê背景仝款,mā是約雅敬作猶大王ê時發生ê事,時間大約是tī主前600到604年間。Chit一章mā是耶利米書中真重要ê一章,因為咱thang tùi chit章知影先知耶利米是透過口授ê方式,ài伊ê秘書寫落來上帝傳達hō͘伊ê話。因為án-ne,有bē少聖經學者根據chit點,認為耶利米書就是由秘書巴錄抄寫而成ê一本經冊。

Tùi chit章thang看tio̍h先知耶利米預言國王約雅敬m̄-nā「無後代好繼承大衛ê王位」,而且「屍體會被hiat-ka̍k tī野外,日時頭受炎陽燒灼,瞑間受寒霜侵襲」(參考第30節)。Thang想像會tio̍h,先知耶利米就是因為對國王約雅敬講chiah-ê無禮貌、有損國王尊嚴ê話,結果因為án-ne受難被監禁。

Chit段經文說明尼利亞ê kiáⁿ巴錄,伊是先知耶利米ê秘書,mā照先知耶利米ê吩咐,一一地記落來先知耶利米口述ê話,然後the̍h去耶路撒冷宣讀hō͘猶大以色列人民聽,希望án-ne ē-tàng喚醒in,hō͘ in趕緊悔改。

第1節,「約雅敬作猶大王ê第四年」,chit句話thang參考第廿五章1節。

Chit一年是主前605年,chit年mā是巴比倫王尼布甲尼撒王就任ê第一年,上帝對先知耶利米講話。

第2到3節,上帝ài先知耶利米kā祂所講ê話,「每一件事lóng tio̍h記錄落來」,而且tùi「約西亞王ê時代到今á日」所講過ê話,mā就是講tùi主前639年直到chit-má,「有關以色列、猶大,kah列國ê每一件事」,全部lóng tio̍h記錄落來。上帝期待用chit種方式,ē-tàng喚醒hiah-ê悖逆ê猶大人民悔改「棄sak邪惡ê道路」,án-ne,上帝就會「赦免in ê罪惡過犯」。

第4節,為tio̍h beh kā上帝hō͘伊ê信息lóng記錄落來,先知耶利米請伊ê秘書「尼利亞ê kiáⁿ巴錄」來做記錄,伊「一一口授」hō͘巴錄。

巴錄,chit-ê名ê意思是「伊是應該受o-ló ê人」。伊是西底家之王宮大臣西萊雅ê兄弟(參考五十一:59),是先知耶利米ê得力助手,替先知耶利米寫落來上帝ê啟示,mā替伊收藏上帝beh伊購買tī亞拿突ê土地契約冊(參考三十二:1—12),當耶路撒冷被巴比倫攻陷ê時,伊kah先知耶利米lóng被猶大人押到埃及ê答比匿(參考四十三:6)。

第5到7節,先知耶利米tī chia提起伊「被禁止上聖殿」,這是因為伊bat tī聖殿門口傳講上帝ê信息,親像:第七章2到15節、第十九章14節到第二十章6節、第廿六章2到6節等等,伊ê話語引起人民kah市政府官員ê忿怒,因為án-ne被禁止繼續tī民眾聚集siōng chē ê所在—耶路撒冷聖殿ê所在傳講任何話語。M̄-koh上帝iáu是beh伊hō͘秘書巴錄去,而且時間是tī「下pái禁食ê日子」,到聖殿去「向群眾大聲宣讀」上帝hō͘先知耶利米ài伊記錄落來ê話語。Án-ne,有可能「hō͘ hiah-ê tùi各地來ê猶大人ē-tàng聽見」,而會知影悔改,「棄sak in邪惡ê道路」,這tú好說明先知運動ê共同主題:呼籲人民tio̍h悔改,認罪。所謂「邪惡ê道路」,是teh指去拜偶像。
第8節,「巴錄照」先知耶利米ê指示去做,tī聖殿民眾聚集ê所在「宣讀了上主ê話」。

第9節,「約雅敬作猶大王ê第五年九月」,這是主前604年12月。這年九月ê禁食,真可能kah巴比倫軍隊攻陷了tī巴勒斯坦ê亞實基倫,而且開始進兵耶路撒冷有密切關係。然後猶大「人民為取悅上主,宣佈禁食」,in希望用chit種方式取悅上帝。M̄-koh chit種想法kah方式lóng是錯誤ê。

第10節,巴錄就án-ne照先知耶利米ê話去做,伊tī靠近「新門」ê所在宣讀先知耶利米ài伊記錄落來ê冊卷內容。

重新查詢 專卷研經 耶利米書系列
錯誤回報,請聯繫