耶利米書 35章1節 到 35章19節   背景資料  上一筆  下一筆
Chit章kah第三十六章lóng是談起有關猶大王約雅敬執政ê時代,上帝ài先知耶利米去傳達ê信息內容。Chit兩章kah第廿五、廿六章,以及第四十五到四十八章ê背景仝款。如果kā此第三十五、三十六chit兩章續接tī第廿六章了後,讀起來mā會感覺真順。

列王記下第廿三章31到34節chit段經文thang看tio̍h約雅敬當猶大王ê時,猶大國是埃及ê附庸。這就是為甚麼tī巴比倫ê軍隊進攻耶路撒冷城ê時chūn,猶大王會向埃及求救ê原因背景。Koh講,埃及確實mā負起宗主國ê責任派兵出去救援猶大國,而巴比倫ê軍隊mā因為埃及軍隊出來救援,趕緊撤兵tńg來營。M̄-koh巴比倫撤軍ê時間非常目nih-á。

Tùi猶大國末期ê國勢非常軟弱,因為án-ne,其他強權國家lóng想beh吞滅伊,包括有巴比倫、埃及lóng想beh當猶大ê宗主國。Á猶大ê後期幾位國王lóng有一種心態,想sńg兩大國之間ê政治「槓桿遊戲」,就是利用埃及kah巴比倫二強之間ê衝突kah矛盾,來化解家己國家目睭前ê危機。另外一點,mā是頭前提過ê,一個國家會án-ne被外國勢力所侵,往往m̄是因為外國有甚麼特別ê氣力,卻是因為家己內政失調、腐敗、墮落等等,引起人民對政府失去信心帶來ê結果。Mā因為án-ne,無論猶大王án怎sńg弄政治手段,siōng chē mā kan-taⁿ ē-tàng得tio̍h目nih-á ê空間kah時間,tùi kui個國家、社會ê存亡來看,並無實質ê幫助,除非是痛下決心tùi大力改革著手,án-ne chiah是正本之道。

第1節,「約雅敬作猶大王」,第三十六章1節mā是仝款tī約雅敬執政時代。伊是tī主前609到598年執政。是埃及國王尼哥所立ê王,原名叫「以利亞敬」,尼哥替伊改名,這表示伊只有ē-tàng聽從埃及ê政令,是埃及ê附庸國君王,beh年年向埃及進貢,而且iáu koh khah隨時提防來自北pêng ê巴比倫帝國ê入侵。

第2到5節,chit節講tio̍h「利甲人」,這是以色列人民中一個派別,kah基尼人有姻親關係(參考歷代志上二:55),kah以色列人民相處非常友善(參考撒母耳記上十五:6、三十:29)。以遊牧過生活,是敬虔、忠實tī耶和華上帝信仰ê團體。Bat幫助過耶戶清理拜偶像ê門戶,表明in對耶和華宗教信仰ê堅持(參考列王記下十:15—17)。

上帝ài先知耶利米帶利甲人去「談話」,in可能就是tī猶大國兵荒馬亂ê時代,以難民身分湧入耶路撒冷ê(參考第11節)。為甚麼tio̍h chhōe in談話?有一種可能,就是beh知影in是m̄是已經失去久長以來祖先所堅持ê敬虔生活方式。因為án-ne,chia講先知耶利米chhōa in到「聖殿裡ê一個房間,hō͘ in lim酒」。這房間真可能就是聖殿裡ê「廂房」(參考列王記上六:5),thang當做倉庫,á是作為輪值祭司á是利未人歇睏過瞑ê所在。透過「lim酒」,就thang測出in是m̄是iáu繼續過頂真ê日常生活。先知耶利米照上帝ê命令去做。就去chhōe利甲人ê代表「亞撒尼亞以及伊所有ê兄弟kah kiáⁿ」lóng帶入聖殿裡ê重要廂房去,為tio̍h是beh表示tī hiah-ê廂房中,in即使是lim酒,mā無人會知影。這mā是teh考驗一個人是m̄是真正遵守原則,á是真實純潔ê一個方式。另外一方面,先知耶利米用chit種方式有另外一種目的,是beh hō͘猶大ê眾高官看見,hō͘ in知影chiah-ê逃難到耶路撒冷城ê利甲人,in非常忠實遵守摩西ê規律過簡樸生活。相對ê,猶大官員、眾領袖卻是bē記得眾祖先透過摩西所規定落來ê律法,而且是過奢華ê生活,即使tī國家危難當頭ê時chūn,生活樣式照樣非常奢侈。

第6到11節,chit段經文是利甲人回應先知耶利米ài in lim酒所講ê話。Mā tùi chit段經文ē-tàng看出利甲人確實是真忠實ê族群,雖然in歷經了kúi-nā代,iáu是仝款遵守祖先所留落來ê教示—「不lim酒」。

Chia in提起「祖先約拿達」,伊就是協助北國以色列王耶戶ê一位忠實臣僕。對上帝絕對忠誠,嚴守摩西律法。In「終生tòa帳棚」,這表示in堅持過簡樸ê生活樣式,而且是一直過遊牧ê生活,對tī安定ê農業生活,保持距離。所以無「葡萄園á是田地」,án-ne就ē-tàng維護in祖先傳承落來ê簡樸生活樣式。只是因為「尼布甲尼撒王侵犯這地ê時」,chiah逼kah in tī不得已ê情況下,移居「進耶路撒冷」來避難,好「逃避巴比倫kah敘利亞ê軍隊」。

第12到14節,chit兩節講上帝ài先知耶利米問問「猶大kah耶路撒冷ê人民」,為甚麼in無法度親像利甲人án-ne,「聽」上帝ê話,「服從」上帝ê「指示」?

第15到16節,chit段經文lóng是以利甲人嚴格遵守祖先「約拿達ê命令」,到chit-má「都無人lim酒」。Ē-sái講是,相對tī猶大kah耶路撒冷ê人民,上帝是「一再地差派」祂ê奴僕「先知」向in傳講上帝ê信息,「勸in放棄邪惡ê生活,作正直ê事」,mā警告in「bē-tàng膜拜服事別ê神明」,m̄-koh in lóng是m̄聽。而且chiah-ê警語iáu帶有是m̄是ē-tàng夠繼續tī上帝賞賜hō͘ in祖先khiā起ê土地頂面為要件,in iáu是仝款「lóng是m̄聽,mā m̄-chhap」。相對tī「利甲ê kiáⁿ約拿達ê kiáⁿ孫」所表現出來ê樣式,猶大ê以色列人民則呈現出完全顛倒ê態度。

第17節,chit節講出上帝決定採取懲罰行動來對付猶大人民,chit種方式就是「降大災難tī猶大kah耶路撒冷人民身上」。原因是in對上帝ê話完全無反應。換句話講,in所表現出來ê行為,tú好kah in領受ê懲罰仝款。

第18到19節,chit兩節kah第17節是相對ê結果。Tī第17節講tio̍h上帝beh懲罰猶大kah耶路撒冷ê人民,而這兩則講上帝beh賜福hō͘利甲人。Á賜福ê方式是hō͘「利甲ê kiáⁿ約拿達加頭尾會有男丁事奉」上帝,這是一句真重要ê「應允」。所謂「男丁」,tī古時是表示性命ê延續,而且是有性命力kah生產力。Koh講,聖經時代ê以色列民族一直保有一個觀念:ē-tàng事奉上帝乃是siōng大ê榮譽。

重新查詢 專卷研經 耶利米書系列
錯誤回報,請聯繫