耶利米書 34章1節 到 34章22節   背景資料  上一筆  下一筆
Chit章ê歷史背景是tī主前589年,巴比倫ê軍隊kah其同盟國ê軍隊攻落猶大國ê真chē城鎮,只chhun耶路撒冷kah 拉吉kah亞西加chit兩個城鎮iáu teh作最後ê奮鬥,m̄-koh狀況mā已經岌岌thang危。Tùi chit章經文中,mā thang看tio̍h當時猶大社會ê生活情況,確實在生活kah行為上背離了上帝ê教示。

先知耶利米就真清楚指出猶大社會,假先知猖獗,四界欺騙以色列人民,而koh khah嚴重ê,是連先知、祭司mā參與欺騙人民,貪婪而m̄知見笑(參考耶利米書六:13、八:10)。Koh khah惡質ê是猶大人民去拜偶像神明了後,竟iáu敢走到聖殿去祈求上帝庇護in,護衛in安全(參考耶利米書七:8—11),以上chiah-ê行踏lóng是上帝非常討厭ê事。頂面所講chiah-ê lóng是主前第七世紀末期到第六世紀初期南國猶大社會ê景況。

Mā tùi chit章經文thang看tio̍h真正上帝ê奴僕,tī一個動盪不安ê世代裡,確實是oh得生存,in傳講ê是真實ê話,m̄-koh人民並無歡喜聽,因為上帝真實ê信息ē-sái hō͘ in心內會感覺艱苦心,有罪惡感。先知耶利米siōng痛苦ê事,就是當伊看見社會嚴重墮落ê景況ê時,伊一定tio̍h照實講出上帝beh伊傳出ê無受歡迎、而且帶有嚴厲警告ê信息,m̄-koh伊ê同胞卻拒絕聽從。Ē-sái講是當伊ê同胞Tī痛苦中發出哀號聲ê時,上帝soah koh ài伊傳所謂ê「希望信息」來安慰in。其實,chit兩種話lóng m̄是伊心中所想beh講ê。因為伊知影講出前者,會為家己帶來人民ê怨恨,m̄-koh ná soah koh是上帝ê命令,伊無法度拒絕,mā無法度抗拒。Á ài伊講出後者ê信息,soah koh m̄是家己心中所願,m̄-koh he卻是上帝beh伊傳出ê信息。

第1節,chit節講巴比倫王帶領「伊統治下各國各族ê軍隊teh圍攻耶路撒冷kah周圍城鎮」,chit時chūn上帝對先知耶利米啟示祂ê信息。這表示chit章經文ê時代背景是teh比第三十二到三十三章稍早ê時間,大約是tī主前589 á是588年。

第2到3節,chit兩節經文thang參考第三十二章3到5節。

Chit兩節koh一pái講出西底家王teh beh面臨ê悲慘運命,伊會hō͘俘虜「帶到巴比倫去」。Chit件事後來chiâⁿ實成真。詳細資料thang參考列王記下第廿五章6到7節,kah耶利米書第五十二章8到11節。

第4到5節,chit兩節是hō͘猶大末代國王西底家ê信息,講伊「會平安往生」,西底家王雖然無戰死戰場,mā無tī被俘虜了後馬上被處死。M̄-koh對伊來講,伊是hō͘凌辱到比一般俘虜á是囚犯iáu koh khah悲慘,因為伊ê kiáⁿ是當tio̍h伊ê面前被刣死,然後伊ê目睭被挖出來,koh再用銅鍊鎖tiâu伊了後,kā伊關到巴比倫ê監獄中直到死去(參考列王記下廿五:6—7),這是真悲慘ê結局,雖然有被「埋葬」,m̄-koh受tio̍h chit種待遇並無比被當場處死好gōa chē。因為伊是國王,卻是落魄、潦倒到「囚」死異鄉,而hō͘人感覺悲哀。

第6到7節,chia提起「拉吉」kah「亞西加」兩座城,這是設tī耶路撒冷西南方。之所以chhun落來這兩座城未被攻破,是因為埃及ê軍隊出來beh幫助猶大,m̄-koh,巴比倫尼布甲尼撒王並無想beh kah埃及ê軍隊起衝突,因為án-ne下令tio̍h軍隊撤退(參考耶利米書三十七:5),mā因為án-ne致使西底家王得tio̍h小khóa喘氣ê機會。M̄-koh chit種喘息時間真短,並無為猶大國帶來koh khah好ê無仝落場。

第8到11節,chit段經文是描述西底家王kah耶路撒冷人民立約,決定beh釋放家己同胞中,有人因為貧困而賣身做奴隸ê人。有幾個可能:

一是chit時是戰ê時,糧食供應有困難。Chē一個奴隸,等於chē一個負擔。釋放奴隸,hō͘ in家己去乞食,比主人養飼in koh khah容易,而且主人mā thang減輕負擔。表面上看起來kah-ná是善良,其實動機並無單純。

二是in認為chit-má釋放奴隸,á是允准以換得上帝保守耶路撒冷免受災難。M̄-koh tùi第11節來看,顯然並無達tio̍h chit-ê目的,就án-ne in就懊悔了,改變本來ê約定,kā被釋放離開ê奴隸koh「掠tńg來」。

三in可能是聽tio̍h埃及beh出兵來協防,而巴比倫王因為聽tio̍h埃及已經出兵來救援耶路撒冷,就趕緊撤兵。Án-ne,本來講過而且kā已經決定釋放奴隸ê約定之約撕毀,這清楚表示in並無遵守所應允ê約。

第12到14節,chit段經文說明耶路撒冷人民並無照所立ê約去行,in本來講beh釋放奴隸,m̄-koh後來soah koh反悔。頭前已經有提起會改變ê原因。M̄-koh這mā說明in並無照所立ê約來遵行,kah in ê「祖先不理」上帝,「m̄聽」上帝ê話仝款。

第15到16節,koh一pái重複敘述第8到11節所提起ê,in簽約同意beh釋放奴隸,m̄-koh無久就反悔了。M̄-nā án-ne,in iáu去kā已經釋放ê奴隸koh掠了tńg來。這是非常可惡ê行為,mā是引起上帝忿怒ê原因。

第17節,chit節講出上帝ê忿怒已經開始,mā說明上帝beh透過「戰爭、瘟疫kah饑荒」來懲罰in。

第18到19節,chit兩節thang參考創世記第十五章10節、17節等等。

Chit兩節講出以色列民族bat kah上帝立性命之約,chit-má卻無照所立ê約去做,án-ne kan-taⁿ會為in帶來詛咒kah災難,一點好處mā無。

第20到22節,因為猶大並無遵守所立ê約,因為án-ne,上帝beh「Kā in交hō͘想殺害in ê敵人」,這敵人就是teh指巴比倫帝國。Á這帝國會用非常殘酷ê手段對付in,hō͘「in ê屍體kā作飛鳥行獸ê食物」,猶大王西底家kah伊ê臣僕會被巴比倫軍隊掠去。雖然巴比倫bat因聽見埃及大軍beh來援助而撤退,m̄-koh上帝會koh一pái「命令巴比倫ê軍隊開tńg來chit-ê城」,換句話講,耶路撒冷目前ê解危並m̄是永久ê,只是暫時ê。In會koh一pái tńg來攻打耶路撒冷,hit-ê城會被「佔領」,被「燒毀」,kui個猶大境內ê城鎮lóng kā「荒廢,無人khiā起」。

重新查詢 專卷研經 耶利米書系列
錯誤回報,請聯繫