耶利米書 30章1節 到 30章11節   背景資料  上一筆  下一筆
耶利米書tùi第三十章起到第三十三章止,這四章mā hông稱做是「安慰ê書信」,原因為chit四章lóng是講tio̍h被掠到外國去做奴隸ê以色列民族(註:這是包括tī主前721年被亞述帝國滅亡ê北國以色列人民在內,以及tī第二pái亡國後ê南國猶大人民),會重回故鄉重建家園。

這四章ê內容kah頭前第廿五到廿九章所提起ê亡國預言,tú好成做一個鮮明ê對照;頭前第廿五到廿九章lóng講到亡國ê情況,是beh猶大人民好好á tī異邦生活落去。Á tī chit四章裡則講上帝會帶領in重回故鄉重建家園。Chit種重回家園ê信息為受掠ê以色列民族確實帶來一股新ê ǹg望,無親像頭前幾章hiah-ni̍h憂悶、哀痛。

Tī chit四章中兩個重要ê信仰課題;其一是解釋上帝懲罰祂家己ê選民ê原因;其二是hō͘上帝ê選民看tio̍h新ê應允會為in帶來新ê秩序,kah新ê約。

Chit段經文非常清楚指出上帝對祂子民ê應允,就是上帝beh實踐祂對家己子民ê諾言,ài beh進行祂拯救ê工作,beh kā套tī全以色列人民身上ê鎖枷折斷,hō͘ in脫離巴比倫帝國ê箝制,ē-tàng自由地tńg去故鄉,重建家園。

第1到3節,上帝koh一pái透過先知耶利米傳出祂拯救ê信息。Chia講上帝ài先知耶利米kā祂「講過ê一切話lóng寫tī冊上」。類似chit種話koh一pái出現tī第三十六章2節,而且是koh khah詳細,時間範圍koh khah真闊,beh tùi約西亞王宗教改革時代到一直到teh beh亡國ê西底家王,上帝ài先知耶利米kā祂Tī chit段時間內所講ê話全部lóng記錄落來。記載chiah-ê lóng有一個重要用意,就是beh hō͘下一代ê kiáⁿ孫知影這代所發生ê各種事蹟。上帝講「時chūn會到」,祂beh hō͘家己ê子民「tńg來歸故土,重整家園」,mā就是上帝「賜hō͘ in祖先ê土地」,in會「重新擁有」。

第4到5節,「上主對以色列kah猶大人民講」,祂聽見「戰慄ê聲音」,這表示「驚惶」,不「平安」,這是teh指發生戰爭,而且廝刣ê非常厲害。

第6到7節,chit兩節用婦女臨產前hit種陣痛ê樣式來形容cha-po͘人tī戰爭中ê苦楚,因為戰敗所表現出來ê hit種驚惶kah不安,mā是戰敗者siōng-kài「痛苦ê時chūn」。M̄-koh tio̍h注意ê是,chit種戰爭是上帝發起ê,因為祂正teh進行拯救家己子民ê工作。因為án-ne,甚麼人敢抵擋上帝拯救家己子民ê工作,甚麼人就會tú-tio̍h極大ê痛苦。Á tī戰爭ê痛苦中,上帝ê子民iáu ē-tàng倖存落去。無論境遇jōa-ni̍h-á大ê痛苦,上帝並無棄sak in,顛倒ê,上帝會kah in同在,保護in,hō͘ in tī苦難中有生機。

第8到9節,chia講上帝拯救ê「hit一工」來到,就是上帝透過先知耶利米所講ê,以色列民族被掠到巴比倫七十年期滿時間來到ê「hit一工」,上帝「beh at斷套tī in頷頸上ê枷擔,斬斷鎖tiâu in ê鐵鍊」,這是teh回應第廿七、廿八兩章先知耶利米用象徵性ê方式,套tī頷頸上ê「枷擔」,形容、teh象徵猶大人民會hō͘巴比倫帝國俘虜去做奴隸ê記號。M̄-koh taⁿ,上帝beh tī he teh beh來臨ê日子裡,beh kā ná「枷擔」,kah箝制in行動ná親像囚犯仝款ê「鐵鍊」lóng總lóng phah斷,beh hō͘ in得tio̍h自由,in kā「無koh作外國人ê奴隸」(參考詩篇二:3)。上帝ê子民會清楚知影,tio̍h「事奉」上帝,而且會順服上帝揀選出來ê君王,帶領in敬奉上帝,聽從上帝ê旨意kah命令。

第10到11節,chit兩節koh一pái出現tī第四十六章27到28節。第10節mā thang參考以賽亞書第四十三章5到7節。上帝beh以色列kah猶大ê子民「m̄免驚惶」、「m̄-thang驚惶」,因為當上帝施行祂奇妙ê拯救工作ê時,mā是祂teh進行審判ê時刻,必定會有大災難降臨,帶來hiah-ê人恐慌kah不安。因為án-ne,chia tio̍h以色列kah猶大ê子民不要害驚、驚惶。上帝必定會kah in同在,beh「拯救in」,並kā hiah-ê統治in ê族群驅ta̍k出in khiā起ê土地。

重新查詢 專卷研經 耶利米書系列
錯誤回報,請聯繫