耶利米書 23章1節 到 23章8節   背景資料  上一筆  下一筆
Chit段經文是繼續第廿二章談起上帝對猶大人民ê領導者之警告,同時mā是對猶大人民ê警語。一個國家á是民族會墮落,領導者固然tio̍h負起瀆職、怠責ê責任,m̄-koh人民允准chiah-ê領導者怠忽職責mā tio̍h負責任。

Tī第廿二章24到30節是論到約雅斤王,照理應該繼續論到西底家王。雖然chia無明顯記錄出西底家王,m̄-koh卻thang看出chit段經文是論到伊kah伊ê幕僚人員,以及hit時chūn ê猶大人民ê問題。

第1到4節,聖經提供一個重要觀念:所有上主子民ê統治者,lóng是hō͘上帝賦予來照顧上帝子民ê,ná親像牧者為上帝放牧祂ê羊群仝款。Á chiah-ê統治者、領導者,除國王外,包括先知、祭司、眾長老lóng是。Chia先知指責in並無照上帝ê旨意,好好á看顧chiah-ê屬tī上帝ê羊群。Chit種顧羊人必定會遭tú-tio̍h帝嚴厲ê懲罰,因為án-ne講「慘lah」,因為上帝ài beh進行審判。上帝決定beh親自扮演好ê顧羊人,祂beh kā失散ê羊群,就是hō͘俘虜到「各國」ê羊群,尚且活teh「殘存ê子民集合起來」,上帝lóng tio̍h親自帶領in「歸回故土」。M̄-nā án-ne,chiah-ê殘存而被祂帶領tńg來ê子民,lóng kā得tio̍h上帝賜福,ē-tàng「chē子chē孫,人口繁盛」。而且iáu koh khah「派領袖照顧in」,這表示上帝beh重新揀選新ê領導者來帶領伊ê子民,ná親像選出新ê顧羊人來照顧祂ê羊群仝款。Án-ne,上帝ê子民就ē-tàng「無koh非常驚惶」,而且上帝mā「無koh懲罰in」。

第5到6節,「時chūn會到」,這是teh指上帝審判ê行動kah時刻。上帝beh「為大衛興起正義ê『枝子』」,mā就是一位新ê君王,伊會「以公平正義治國」,hō͘人民thang「安居樂業」,因為bē koh再有戰爭,á是有戰爭mā bē危kah到in khiā起生活ê所在(參考以西結書三十四:25)。人民thang「享受太平」ê生活。

第7到8節,這是重複第十六章14到15節ê句話。表示上帝過去帶領以色列人民離開埃及,帶領in進入應允ê迦南地,而chit-má是beh帶領in離開巴比倫帝國tńg來歸故鄉迦南地。Chit種新ê應允,就ná親像先知以賽亞所傳出ê信息,講以色列民族會建立一個全新ê國度,就ná新天新地一般,充滿上帝ê賜福(參考以賽亞書六十五:17—25)。

重新查詢 專卷研經 耶利米書系列
錯誤回報,請聯繫