耶利米書 23章9節 到 23章32節   背景資料  上一筆  下一筆
Tùi第9節開始,一直到chit章ê結束,chit段經文是針對hiah-ê假先知所講ê懲罰信息。先知耶利米時代,mā是動亂ê時代,tī動亂時代中,siōng容易出現假先知來攪亂人民。

Chit段經文mā指出假先知ê真面貌,in專門講kóa不切實際ê信息,而chiah-ê信息lóng m̄是上帝ê啟示,是in家己ê想像。因為án-ne,上帝一定會用嚴厲ê懲罰對待in。

第9到10節,先知耶利米講伊「心破碎」,因為聽tio̍h假先知ê話,就會「全身pi̍h-pi̍h-chhoah」,表示無法度接受in用上帝ê名傳假ê信息?上帝「神聖ê話」kám是ē-tàng隨便用家己想講ê話取代。因為án-ne,先知耶利米形容家己聽hiah-ê假先知所傳達ê信息了後,鬱卒到極點,kah-ná「被酒灌醉ê人」仝款,m̄知該án怎講chiah好。伊講四界lóng有充滿tio̍h「對上主不忠ê人」,去拜偶像神明ê人民非常chē,m̄-koh chiah-ê lóng kah假先知ê行為有關。因為án-ne,上帝決定beh嚴厲懲罰,就是hō͘天空無koh落雨,土地乾旱,牧場ê草會lian去。

第11到12節,chia清楚指出上帝ê奴僕「先知kah祭司lóng m̄敬虔」。In甚至「tī聖殿裡做pháiⁿ事」,chit句話thang參考耶利米書第三十二章34節,另外參考列王記下第廿一章5節,以西結書第八章5節、10節、16節等等。Chiah-ê經文lóng清楚指出in是kā上帝ê聖殿,khǹg並列了偶像,拜上帝mā同時拜偶像神明。為chit-ê緣故,上帝決定beh「降災難」來「懲罰」in。

第13到14節,「撒馬利亞先知」是借用「巴力神明ê講預言」,這tú好說明chiah-ê先知m̄是屬tī上帝ê先知,in是名符其實ê假先知。續落來tī chia指出猶大「耶路撒冷眾先知koh khah 可惡」,in是無惡m̄做,包括「姦淫,講白賊,慫恿人做pháiⁿ事」等,in kah-ná bē記得家己是上帝ê奴僕。上帝決定用對待「所多瑪」kah「蛾摩拉」這兩城ê方式來懲罰in。

第15節,chit節重複耶利米書第九章15節ê話語。對tī無忠實ê上帝奴僕先知,上帝一定會嚴厲懲罰,beh hō͘ chiah-ê假先知「食苦果,lim毒水」,原因是tī各地「散播不敬虔ê風氣」,意思是teh指生活態度隨便,而且帶頭拜偶像。

第16到17節,上帝beh耶路撒冷人民m̄-thang koh再聽信hiah-ê假先知ê信息,因為in所hō͘ ê信息lóng是「虛幻」不實在ê假信息,m̄是上帝ài in講ê話,甚至危險來臨ê時chūn,mā講真安全,he是錯誤ê信息。

第18節,「上主ê天庭親自聽伊講話」,這表示是tùi上帝ê寶座發出ê信息。真正先知,會得tio̍h上帝ê啟示,講真實ê話。M̄-koh假先知kā家己所想ê,當做是上帝ê旨意來發言。另外一方面,上帝ê奴僕先知,khiā tī「上主ê天庭親自聽伊講話」,chit句話mā teh表示每一個先知lóng一定tio̍h面對tio̍h上帝ê審判。

第19到20節,chit兩節經文tī第三十章23到24節koh一pái重複出現。

「上主ê忿怒像強烈ê旋風」,這是描述上帝非常受氣。「旋風」,teh代表威脅性命ê氣力。「pháiⁿ人」,就是teh指chiah-ê假借上帝ê名發言ê人,而且是發出錯誤ê信息來迷惑上帝ê子民。上帝發出ê忿怒,會一直到「完成家己一切ê計畫」chiah會停止,chit時chūn,以色列人民「chiah會完全明白」chit位帶領in tńg去故鄉ê上帝chiah是in ê主宰。

第21到22節,上帝真清楚甚麼人是真正先知,甚麼人是假ê。假先知會一再假借上帝ê名發言。相對ê,真正先知是傳達上帝hō͘伊ê信息,並且忠實地kā上帝ê信息傳達出來,hō͘聽tio̍h上帝信息ê子民知影tio̍h「棄sak邪惡,m̄做pháiⁿ事」。

第23節,「我是無所不在ê上帝。」chit句話講出基督教所信仰ê上帝之三大特性:一是無所不能、二是無所不知、三是無所不在。Chia上帝講祂是無所不在,mā同時teh表示kui個宇宙lóng是祂創造ê,祂是主。

第24節,chit節thang參考詩篇第一三九篇7到12節,真清楚說明上帝m̄-nā是tī所有ê空間,包括所有ê時間在內,lóng是屬tī上帝ê範圍。因為án-ne,chia講「無論天地ê toh一個角落」lóng會有上帝teh看顧。

第25到27節,chit節真清楚講tio̍h有人冒用上帝ê名講預言「騙人」,chit種人就是所謂ê「假先知」。Chit種人siōng大ê特點,就是會對民眾講,伊tī「夢中得tio̍h」上帝ê啟示。其實,ná夢是in「家己編造ê」,m̄是真實ê。因為是虛構ê夢,chiah會hō͘人民「bē記得」上帝,無koh相信上帝。

確實在聖經中有一種屬tī主前第八世紀出現ê「以羅伊文獻」資料,記載上帝會透過天使、異象、夢等三種方式來hō͘人瞭解祂beh講ê話á是祂ê旨意。

Chiah-ê假先知就是用chit種tī「夢中」遇tio̍h上帝ê方式來欺騙人,結果hō͘相信ê人民mā tòe in誤入「歧途」,偏離了上帝ê旨意kah教導。M̄-nā án-ne,「in騙人」iáu m̄知tio̍h收斂,國家已經面臨存亡ê時刻,卻iáu teh繼續欺騙ê行為。

第28節,chit節講出審判ê一個基礎,就是分開、分辨清楚。真假先知之間siōng大ê差別就是,真先知會「忠實地傳達」上帝ê信息,而假先知kan-taⁿ會「做夢」,然後用所講ê「夢語」來欺騙人。這ná親像「雜草kah麥á」,是完全無相仝ê物件仝款。

第29節,chit節講上帝ê「信息像燄火」,這mā是先知耶利米ê經歷(參考耶利米書二十:9),ē-sái領受tio̍h信息ê先知即使面臨性命ê危險mā tio̍h講出來。Á上帝ê信息mā「像一把擊碎巖石ê鐵鎚」hit種有力。只要是真正kā上帝ê信息忠實傳達出來,確實注意聽ê人一定會悔改,就ná尼尼微城ê人民仝款。

第30到32節,chia講tio̍h假先知ê手段,就是歡喜彼此利用,chit種作法ná親像詐騙集團ê方式,彼此利用來欺騙無知ê人民,假先知就是「彼此引用對方ê話」,而且除了講「白賊」外,mā會kā所講ê hō͘ in誇大,kā in家己編織出來ê夢話當做是上帝ê話teh「傳達」。其實,chit種行為等於是亂使用上帝ê名仝款,是十誡所禁止ê行為(參考出埃及記二十:7),上帝一定會對付chit種人。因為chit種人對眾人m̄-nā無好處,反tńg會誤導人民行入歧途,棄sak上帝。

重新查詢 專卷研經 耶利米書系列
錯誤回報,請聯繫